Hun To Bolish | હું તો બોલીશ | આ યુદ્ધ કોને-કોને દઝાડશે ?

પશ્ચિમ એશિયામાં સર્જાયેલી યુદ્ધની ભયાનક સ્થિતિને કારણે હાલમાં સમગ્ર વિશ્વ પર ત્રીજા વિશ્વયુદ્ધના વાદળો ઘેરાઈ રહ્યા છે. ઈરાને 28 ફેબ્રુઆરી 2026 ના રોજ ઈઝરાયલ સહિત 5 દેશોમાં આવેલા અમેરિકી સૈન્ય મથકો પર ભીષણ હુમલા શરૂ કરતા આંતરરાષ્ટ્રીય સ્તરે અફરાતફરી મચી ગઈ છે. આ હુમલાઓના વળતા જવાબમાં અમેરિકા અને ઈઝરાયલે સંયુક્ત રીતે ઈરાનના પરમાણુ મથકો અને મિસાઈલ ઉત્પાદન કેન્દ્રોને નિશાન બનાવવાની સત્તાવાર જાહેરાત કરી દીધી છે. ખાડી દેશોએ પોતાની સુરક્ષાને ધ્યાનમાં રાખીને હવાઈ માર્ગો બંધ કરી દીધા છે, જેના કારણે વૈશ્વિક પરિવહન અને અર્થતંત્ર પર ગંભીર અસર પડવાની ભીતિ સેવાઈ રહી છે. અલ જઝીરાના તાજા અહેવાલ મુજબ, ઈરાને પોતાની સૈન્ય શક્તિનું પ્રદર્શન કરતા ઈઝરાયલની સાથે સાથે અબુ ધાબી, કુવૈત અને બહેરીનમાં આવેલા અમેરિકી સૈન્ય અડ્ડાઓ પર પણ ક્ષેપનાસ્ત્ર મારો કર્યો છે. બહેરીનમાં સ્થિત અમેરિકાના નૌકાદળના મથક પર ઈરાની બેલિસ્ટિક મિસાઈલો ત્રાટકતા ભારે નુકસાનના અહેવાલ પ્રાપ્ત થયા છે. આ પરિસ્થિતિની ગંભીરતાને સમજીને કતાર, કુવૈત અને સંયુક્ત આરબ અમીરાત જેવા દેશોએ તત્કાલ પ્રભાવથી પોતાના હવાઈ ક્ષેત્ર બંધ કરી દીધા છે, જેથી નાગરિક વિમાનોને યુદ્ધની ઝપેટમાં આવતા બચાવી શકાય.