Hun To Bolish | હું તો બોલીશ | સેમિકન્ડક્ટર ક્ષેત્રે હરણફાળ

સાણંદથી ભારતની ટેક ક્રાંતિના નવા અધ્યાયનો પ્રારંભ. દેશને તકનીકી ક્ષેત્રે વૈશ્વિક મહાસત્તા બનાવવાના હેતુથી અને આત્મનિર્ભરતા હાંસલ કરવા માટે વડાપ્રધાન નરેન્દ્ર મોદીએ શનિવારે ગુજરાતના સાણંદમાં રૂપિયા 22516 કરોડના ખર્ચે નિર્માણ પામેલા અત્યાધુનિક માઇક્રોન સેમિકન્ડક્ટર પ્લાન્ટનું વિધિવત ઉદ્ઘાટન કર્યું હતું. ફેબ્રુઆરી 2026 માં શરૂ થયેલો આ પ્રોજેક્ટ દેશની હાર્ડવેર ક્ષમતાને નવી ઊંચાઈઓ પર લઈ જશે અને હજારો યુવાનો માટે રોજગારીની નવી તકો ઊભી કરશે. આ ભવ્ય સમારોહમાં વડાપ્રધાને ઉપસ્થિત જનમેદનીને સંબોધતા જણાવ્યું હતું કે વીતેલી 20મી સદીમાં દુનિયાનું સંચાલન ક્રૂડ ઓઇલ દ્વારા થતું હતું, પરંતુ વર્તમાન 21મી સદી માત્ર ને માત્ર માઇક્રોચિપ દ્વારા સંચાલિત થશે. અત્યાર સુધી દુનિયામાં ભારત સોફ્ટવેર ક્ષેત્રે પોતાનો ડંકો વગાડતું હતું, પરંતુ હવે સમય આવી ગયો છે કે હાર્ડવેર મેન્યુફેક્ચરિંગમાં પણ દેશ પોતાની તાકાત બતાવે. તેમણે મક્કમતાથી કહ્યું કે ભારત હવે વૈશ્વિક સ્તરે અત્યંત ભરોસાપાત્ર અને સક્ષમ ભાગીદાર બની ચૂક્યું છે. સામાન્ય રીતે આવા વિશાળ પ્રોજેક્ટને મંજૂરી મળતાં અને તેનું નિર્માણ થતાં વર્ષો લાગી જાય છે. પરંતુ સાણંદના આ પ્રોજેક્ટની કામગીરી ઐતિહાસિક રહી છે. જૂન 2023 માં અમેરિકામાં કરાર થયા, સપ્ટેમ્બરમાં ખાતમુહૂર્ત થયું અને માત્ર 900 દિવસના ટૂંકા ગાળામાં અહીં વ્યાવસાયિક ઉત્પાદન પણ શરૂ કરી દેવામાં આવ્યું છે. આ ઝડપ સ્પષ્ટ નીતિ અને વિકાસ પ્રત્યેની સરકારની પ્રતિબદ્ધતા દર્શાવે છે. કેન્દ્રીય મંત્રી અશ્વિની વૈષ્ણવે પણ આ સફરને અદભુત ગણાવી હતી અને ભારતના વધતા ઈલેક્ટ્રોનિક્સ ઉત્પાદનના આંકડાઓ રજૂ કર્યા હતા.