Gujarat University News: ગુજરાત યુનિ.ના પૂર્વ VCએ ભરતી કરેલા તમામ અધિકારી-કર્મચારી સસ્પેન્ડ

અખિલ ભારતીય વિદ્યાર્થી પરિષદ (ABVP)ના ઉગ્ર વિરોધ અને ગેરરીતિની રજૂઆતો બાદ ગુજરાત યુનિવર્સિટીના ઈંચાર્જ કુલપતિ દ્વારા તાત્કાલિક ધોરણે એક ઉચ્ચ સ્તરીય તપાસ કમિટીની રચના કરી પૂર્વ વીસી નીરજા ગુપ્તાના સમયમાં નિમણૂક પામેલા 10 ઉચ્ચ અધિકારીઓ અને કર્મચારીઓને યુજીસીના ધારાધોરણોના ભંગ બદલ યુનિવર્સિટી કેમ્પસ ખાતેથી તાત્કાલિક અસરથી સસ્પેન્ડ કરી દેવામાં આવ્યા છે.

ગુજરાત યુનિવર્સિટીના વિવિધ વિભાગોમાં પૂર્વ કુલપતિના શાસનકાળ દરમિયાન કરવામાં આવેલી હંગામી અને કોન્ટ્રાક્ટ આધારિત ભરતીઓમાં મોટો ભ્રષ્ટાચાર અને નિયમોનું સ્પષ્ટ ઉલ્લંઘન થયું હોવાની રજૂઆતો સામે આવી હતી. આ નિમણૂકોમાં ઉમેદવારોને યુજીસીના નિયમ મુજબ નક્કી કરેલા ધોરણો કરતાં અત્યંત ઊંચા પગાર ચૂકવીને યુનિવર્સિટીની તિજોરીને નુકસાન પહોંચાડવામાં આવ્યું હતું. આ મુદ્દાને લઈને એબીવીપી દ્વારા યુનિવર્સિટી પરિસરમાં 11 કરોડ રૂપિયાના ગંભીર આર્થિક નુકસાનના આરોપો સાથે ભારે વિરોધ દર્શાવી મોરચો કાઢવામાં આવ્યો હતો. વિદ્યાર્થી સંગઠનના આંદોલન અને મૌખિક તેમજ લેખિત રજૂઆતોને પગલે ઈંચાર્જ કુલપતિએ પરિસ્થિતિની ગંભીરતા સમજી તપાસ સમિતિની રચના કરી હતી. કમિટીની પ્રાથમિક ભલામણોના આધારે શ્રીનિવાસ રાવ સુરેડ્ડી, માનસિંઘ રાજોરા, બિશ્વજીત અધિકારી, દિનેશ કુમાર, ડૉ. પાવન પંડિત, ચંદ્રશેખર ઝા, ડૉ. રાજ ચાવલા, સોનલ મલ્હોત્રા અને પરેશ સોની સહિત 10 કર્મચારીઓને સસ્પેન્ડ કરાતાં યુનિવર્સિટીના વહીવટી આલમમાં ભારે સન્નાટો છવાઈ ગયો છે.