Gujarat Assembly : ફાવતું ન હોય તો AAPમાં આવી જાવ, ઇટાલિયાના સમર્થકની કિરીટ પટેલને અપીલ

Gujarat Assembly : ફાવતું ન હોય તો AAPમાં આવી જાવ, ઇટાલિયાના સમર્થકની કિરીટ પટેલને અપીલ

ગુજરાત વિધાનસભાના પરિસરમાં હાલમાં એક ખૂબ જ રસપ્રદ અને રમૂજી ઘટના જોવા મળી છે. વિસાવદરના આગેવાનો જ્યારે વિધાનસભાની મુલાકાતે આવ્યા હતા, ત્યારે આમ આદમી પાર્ટી (AAP) ના ધારાસભ્ય ગોપાલ ઇટાલિયા અને કોંગ્રેસના ધારાસભ્ય ડૉ. કિરીટ પટેલ વચ્ચે અચાનક મુલાકાત થઈ ગઈ. વાતચીત દરમિયાન ગોપાલ ઇટાલિયાના એક સમર્થકે કિરીટ પટેલને મજાકમાં કહી દીધું કે, "સાહેબ, જો તમને કોંગ્રેસમાં ફાવતું ન હોય તો AAP માં આવી જાવ." આ સાંભળતા જ ત્યાં હાજર તમામ લોકો ખડખડાટ હસી પડ્યા હતા. રાજકીય ખેંચતાણ વચ્ચે બનેલી આ હળવી ઘટના અત્યારે રાજકીય વર્તુળોમાં ભારે ચર્ચાનો વિષય બની છે.

વિધાનસભા પરિસરમાં શું બન્યું?

બન્યું એવું કે, વિસાવદરની મોટી મોણપરી જિલ્લા પંચાયતના આગેવાનો અને હોદ્દેદારો ગુજરાત વિધાનસભાની કામગીરી જોવા માટે ગાંધીનગર આવ્યા હતા. આ દરમિયાન ધારાસભ્ય ગોપાલ ઇટાલિયા તેમની સાથે ઉભા રહીને વિધાનસભા વિશે ચર્ચા કરી રહ્યા હતા.

બરાબર એ જ સમયે પાટણ બેઠકના કોંગ્રેસના ધારાસભ્ય ડૉ. કિરીટ પટેલ પણ ત્યાંથી પસાર થઈ રહ્યા હતા અને તેઓ પણ આ ગ્રુપ સાથે જોડાઈ ગયા. કિરીટ પટેલે પણ આગેવાનો સાથે ઊભા રહીને વિધાનસભામાં કઈ રીતે કામગીરી થાય છે અને ધારાસભ્યો કેવી રીતે પ્રશ્નો ઉઠાવે છે તેની સમજણ આપવાનું શરૂ કર્યું.