Kheda Rain : ખેડામાં પોણા 2 ઇંચ વરસાદ, અંડરપાસમાં ભરાયા પાણી

Kheda Rain : ખેડામાં પોણા 2 ઇંચ વરસાદ, અંડરપાસમાં ભરાયા પાણી 

ખેડા જિલ્લામાં અચાનક વાતાવરણમાં પલટો આવ્યો. નડિયાદ, મહેમદાવાદ, મહુધા, કઠલાલ, કપડવંજ, ડાકોર, ઠાસરા અને માતરમાં ભારે પવન અને વીજળીના કડાકા ભડાકા સાથે વરસાદ વરચ્યો. એકાએક ભારે પવન ફૂંકાતા રસ્તા પર ધૂળની ડમરીઓ ઉડતા લોકો મુશ્કેલીમાં મુકાયા. નડિયાદમાં તો કેટલાક વિસ્તારોમાં જળબંબાકારની સ્થિતિ સર્જાઈ. માઈ મંદિર, ખોડિયાર અંડર પાસમાં પાણી ભરાતા લોકોને હાલાકીનો સામનો કરવો પડ્યો. ડભાણ રોડ પર કલેક્ટર કચેરીના ગેટ નજીક ભૂવો પડ્યો. ખેડા તાલુકામાં સૌથી વધુ પોણા બે ઈંચ વરસાદ ખાબક્યો. જ્યાર માતર-નડિયાદમાં દોઢ-દોઢ ઈંચ, મહુધામાં એક ઈંચ, કપડવંજ, વસોમાં પોણો-પોણો ઈંચ વરસાદ ખાબક્યો.

વડોદરાના શિનોર તાલુકા સહિત સાધલી, અવાખલ, ટીંબરવા, ઉતરાજ, તેરસા અને તરવા જેવા ગામોમાં ગાજવીજ અને તોફાની પવન સાથે વરસાદ વરસ્યો હતો. શિનોરના મુખ્ય બજારમાં વરસાદી પાણી નદીની જેમ વહેતા જોવા મળ્યા હતા.

બોડેલી અને આસપાસના ઢોકલીયા, ચાચક, આલિખેરવા અને મોડાસર વિસ્તારોમાં પણ ધોધમાર વરસાદ વરસ્યો હતો. વરસાદ અને તોફાની પવનને કારણે વાતાવરણમાં ઠંડક પ્રસરી હતી, જોકે તલ અને મગ જેવા પાકને નુકસાન થવાની ભીતિ પણ વ્યક્ત કરવામાં આવી રહી છે.

ડભોઈ, પાદરા અને સાવલીમાં પણ ભારે પવન સાથે વરસાદ પડતા અનેક વિસ્તારોમાં વીજ પુરવઠો ખોરવાયો હતો અને વાહન વ્યવહારને અસર પહોંચી હતી.