Rajkot News: મેડિકેર હોસ્પિટલની ભયાનક અને ઘોર બેદરકારી, તાવની સારવારમાં મહિલાની જિંદગી કરી બરબાદ

રાજકોટની જાણીતી મેડિકેર હોસ્પિટલ અને ત્યાંના કથિત 'નિષ્ણાત' ડો. અમિત વસાણીની એક ગંભીર ભૂલ અને દવાની ખોટી માત્રાએ એક પરિણીત મહિલાની આખી જિંદગી બરબાદ કરી નાખી. સામાન્ય તાવની સારવાર માટે હોસ્પિટલમાં દાખલ થયેલી નિર્દોષ મહિલા પર જાણે દવાઓનો પ્રયોગ કરવામાં આવ્યો હોય તેમ, ઇન્જેક્શન અને દવાઓના હેવી ઓવરડોઝ આપી દેવાયા. આ આંધળા બહેરા વહીવટના પરિણામે મહિલાના માથાના તમામ વાળ ખરી ગયા, આખા શરીરની ચામડી ઉખડી ગઈ અને બોનસમાં આખી જિંદગી ભોગવવી પડે તેવી ડાયાબિટીસની ગંભીર બીમારી પણ આવી ગઈ. આ ભયાનક રિએક્શન બાદ જ્યારે પરિવારે અન્ય ડોક્ટરની સલાહ લીધી, ત્યારે ચોંકાવનારો ખુલાસો થયો કે ડો. અમિત વસાણીની તમામ દવાઓ તાત્કાલિક અસરથી બંધ કરવી પડે તેમ હતી. પીડિત પરિવારે હોસ્પિટલની તિજોરી ભરવા માટે ₹૨૫ લાખથી વધુનું આંધણ કર્યું, પરંતુ બદલામાં મેડિકેર હોસ્પિટલે તેમને માત્ર અને માત્ર જીવનભરનું અસહ્ય દુઃખ ભેટમાં આપ્યું.આટલી ભયાનક બેદરકારી છતાં તંત્ર અને તબીબોની સાંઠગાંઠ એટલી મજબૂત છે કે વર્ષ ૨૦૨૪માં જિલ્લા કલેક્ટર, એસપી અને ખુદ આરોગ્ય મંત્રી સુધી લેખિત રજૂઆતો કરવા છતાં આ 'પગારદાર યમદૂતો' સામે કોઈ કડક પગલાં લેવાયા નથી. આરોગ્ય મંત્રીના આદેશ બાદ ગુજરાત મેડિકલ કાઉન્સિલે માત્ર દેખાડો કરવા ખાતર પીડિત પરિવાર અને ડોક્ટરને સાંભળ્યા ખરા, પરંતુ ન્યાય આપવાના બદલે એક અત્યંત હાસ્યાસ્પદ જવાબ પધરાવી દીધો. કાઉન્સિલે જાણે કોઈ બાળકને વઢતા હોય તેમ ડોક્ટરને માત્ર 'ઠપકો' આપીને હાથ ધોઈ નાખ્યા!  આ મજાકથી કંટાળીને હવે પીડિત પરિવારે ડો. અમિત વસાણી સામે કાયદેસરની પોલીસ ફરિયાદ કરી ન્યાયની આખરી ગુહાર લગાવી છે. સૌથી મોટો અને હાસ્યાસ્પદ તમાશો તો ત્યારે જોવા મળ્યો જ્યારે હોસ્પિટલના બે માલિક ડોક્ટરો ગોળ-ગોળ જવાબો આપવા મેદાને પડ્યા. જેમની સામે સીધા આક્ષેપો છે તેવા ડો. અમિત વસાણીએ પોતાની ભૂલ સ્વીકારવાને બદલે અન્ય ગેસ્ટ્રોલોજીસ્ટ ડો. નીરવ પીપળીયાની દવા પર દોષનો ટોપલો ઢોળી દીધો. તો વળી બીજા તબીબ ડો. અંકુર વરસાણીએ મેડિકલ સાયન્સને બાજુ પર મૂકીને અંધશ્રદ્ધા જેવો તર્ક આપતા એવું કહી દીધું કે, "આ તો દર્દીના નસીબ ખરાબ હતા એટલે રિએક્શન આવ્યું, આમાં કોઈનો વાંક નથી!" લાંબી કાનૂની અને શારીરિક લડત બાદ દોઢ વર્ષે મહિલાને આંશિક રિકવરી તો આવી છે, પરંતુ આ અહંકારી અને લાપરવાહ ડોક્ટરોને જેલના સળિયા પાછળ ધકેલવા માટે પરિવાર આજે પણ મક્કમ છે.