Surat: સુરતના સરથાણામાં બે યુવક તણાયા, એકનો મૃતદેહ મળ્યો

સુરતના સરથાણા જકાતનાકા આઉટર રિંગ રોડ પર પાણીમાં યુવકો તણાવવાની અત્યંત દુઃખદ ઘટના સામે આવી છે. પૂરના પાણીમાં યુવકોના તણાવાનો દ્રશ્યો પણ સીસીટીવીમાં કેદ થયા હતા. ત્યારે પ્રશાસન અને સ્થાનિકની ભારે જહેમત બાદ આખરે પાણીમાં તણાયેલા અલ્પેશ દેસાઈનો મૃતદેહ મળી આવ્યો છે. જ્યારે સંદીપભાઈ ચોવડીયા નામના યુવકની હજુ પણ યુદ્ધના ધારણે શોધખોળ હાથ ધરવામાં આવી છે. ઘટનાની જાણ થતા રાજ્ય સરકારના મંત્રી પ્રફુલ પાનસેરીયા પણ તાત્કાલિક ઘટનાસ્થળ પર પહોંચીને પરિસ્થિતિની સમીક્ષા કરી. મંત્રી પ્રફુલ પાનસેરીયાએ સ્થાનિક અધિકારીઓને જરૂરી માર્ગદર્શન આપ્યુ. સાથે જ વિકટ સમયમાં વહીવટી પ્રશાસન સંપૂર્ણપણે સંવેદનશીલતા અને પ્રતિબદ્ધતા સાથે અસરગ્રસ્ત પરિવારોની સાથે હોવાની હૈયાધારણા આપી હતી.