Mehsana Fake Lawyer : નકલી પોલીસ બાદ હવે નકલી વકીલનો પર્દાફાશ

કડીમાં એક દંપતીએ હાઈકોર્ટ અને સુપ્રીમ કોર્ટના વકીલ તરીકેની ખોટી ઓળખ આપીને એક વેપારી પાસેથી રૂ. 3.27 લાખની ઠગાઈ આચરી છે. આ દંપતીએ વેપારીને દુષ્કર્મના ખોટા કેસમાં ફસાવી દેવાની ધમકી આપીને પૈસા પડાવ્યા હતા. આ મામલે કડી પોલીસ મથકે ફરિયાદ નોંધાઈ છે.કડીના નાની કડી વિસ્તારમાં કરિયાણાની દુકાન ચલાવતા રામસંગજી ઠાકોરે તેમના પાડોશી નિલેષભાઈ પ્રજાપતિ પાસેથી ઉછીના આપેલા રૂ. 6 લાખ પરત લેવાના હતા. આ માટે કાયદાકીય મદદ મેળવવા તેઓ વકીલની શોધમાં હતા. ત્યારે તેમણે કડીના જકાતનાકા પાસે નર્મદા કોમ્પ્લેક્સમાં ‘એ.આર. રાવલ એડવોકેટ’ નામનું બોર્ડ જોયું હતું.રામસંગજી અને તેમના પત્ની જ્યારે આ ઓફિસે પહોંચ્યા, ત્યારે ત્યાં અવિનાશ રાવલ અને ફાલ્ગુની રાવલ હાજર હતા. પુરુષે પોતાની ઓળખ હાઈકોર્ટના એડવોકેટ તરીકે અને સ્ત્રીએ સુપ્રીમ કોર્ટના એડવોકેટ તરીકે આપી હતી. વેપારીએ પૈસા વસૂલાતની વાત કરતા જ આ દંપતીએ તેમને ધમકાવવાનું શરૂ કર્યું. તેમણે કહ્યું કે, "જો તમે પોલીસ કેસ કરશો તો સામેવાળાની પત્ની તમારા પર બળાત્કારનો ખોટો કેસ કરશે અને તમારે 20 વર્ષની સજા થશે."આ દંપતીએ પોલીસ અને કોર્ટમાં ઓળખાણ હોવાનું જણાવી બધું ‘સેટિંગ’ કરાવી આપવાના બહાને વેપારી પાસેથી ટુકડે-ટુકડે રોકડ રકમ પડાવવાનું શરૂ કર્યું. વેપારીએ ડરના માર્યા અલગ-અલગ સમયે કુલ રૂ. 3,27,000 ચૂકવ્યા હતા.જોકે, બાદમાં આરોપીઓએ વધુ રૂ. 3.5 લાખની માંગણી કરતા વેપારીને શંકા ગઈ. તેમણે તપાસ કરતા ઓફિસને તાળું મારેલું જોવા મળ્યું. વધુ તપાસ કરતા જાણવા મળ્યું કે અવિનાશ રાવલ નામનો કોઈ વકીલ અસ્તિત્વમાં જ નથી.