અમદાવાદઃ સગીરાને મિત્ર સાથેના ફોટા બતાવી બે ક્લાસમેટે શું કરી માંગણી? શું આવ્યો અંજામ?

અમદાવાદઃ બાવળામા ધોરણ 11 સાયન્સમા અભ્યાસ કરતી 16 વર્ષીય સગીરાએ ગળેફાંસો ખાઈ આપઘાત કરી લેતાં ભારે ચકચાર મચી ગઈ છે. તેના જ ક્લાસમેટ દ્વારા મિત્ર સાથેના ફોટા વાયરલ કરી દેવાની ધમકી આપી બીભત્સ માંગણી કરવામાં આવતાં સગીરાએ આ પગલું ભર્યું હતું. સગીરાએ આપઘાત કરતાં પહેલાં સૂસાઇડ નોટ લખી છે, જેમાં તેણે પોતાના આપઘાત પાછળનું કારણ જણાવ્યું હતું.

બાવળાની રીયા સોસાયટીમાં રહેતી અને ધોરણ 11 સાયન્સમાં અભ્યાસ કરતી સગીરાએ ગત બુધવારે સાંજે ઘરમાં ગળે ફાંસો ખાઈ આપઘાત કર્યો હતો. પરિવારજનોને ઘટનાની જાણ થતા તાત્કાલિક હોસ્પિટલ ખસેડાઈ હતી. પરંતુ ફરજ પર હાજર તબીબોએ સગીરાને મૃત જાહેર કરી હતી. આ અંગે બાવળા પોલીસે તપાસ કરતા સગીરાના રૂમમાંથી સૂસાઇડ નોટ મળી આવી હતી.

આ સૂસાઇડ નોટમાં 2 સગીર યુવકો દ્વારા તેને બ્લેક મેઈલ કરવામાં આવતી હોવાનો ઉલ્લેખ કર્યો છે. સગીરાએ સુસાઇડ નોટમાં લખ્યું હતું કે, તેની સાથે ક્લાસીસમાં અભ્યાસ કરતા બે સગીર તેને છેલ્લા કેટલાય સમયથી મિત્ર સાથેના ફોટો વાયરલ કરવાની ધમકી આપતા હતાં તથા તેની પાસે બીભત્સ માગણીઓ કરતા હતા. જો સગીરા તેવું નહીં કરે તો તેના ફોટો સોશિયલ મીડિયામાં વાયરલ કરી દેવાની ધમકી પણ આપતા હતા.

આ ધમકીથી બદનામ થવાના ડરે આખરે સગીરાએ આપઘાત કરી લીધો હતો. સગીરાના આપઘાતથી હાલમાં પરિવરજનો શોક મગ્ન થઈ ગયા છે. ઘટનાની તપાસ કરતી બાવળા પોલીસે આ અંગે ગુનો નોંધી 3 સગીર યુવકોની અટકાયત કરી હતી અને હાલ આ 3 સગીર આરોપીની જુવેનાઇલ એક્ટ મુજબ પોલીસે ધરપકડ કરી છે.