રૂપાણી સરકારે શંકરસિંહ બાપુને મહાત્મા મંદિરમાં બર્થ ડે સેલિબ્રેશનનું સંમેલન કરવા દેવાની કેમ ના પાડી ? જાણો વિગત

મહાત્મા મંદિર ખાતે પહેલીવાર કોઈ રાજકીય સંમેલન યોજાવાનું હતું. જોકે, મહાત્મા મંદિરના સંચાલકોએ રિનોવેશનનું કારણ આગળ ધરીને કાર્યક્રમ માટે સ્થળ આપવાનો ઇનકાર કરી દીધો છે. બીજી તરફ રાજકીય વર્તુળોમાં એવી ચર્ચા છે કે ભાજપે કોઈ ખોટા સંકેત ન જાય તે માટે મહાત્મા મંદિર ફાળવ્યું નથી.

નોંધનીય છે કે, શંકરસિંહ 21 જુલાઇએ જન્મદિને જ રાજીનામુ ધરી કોંગ્રેસને અલવિદા કરે તેવી શક્યતા છે. સમસંવેદના સંમેલનને નામે યોજનારા જન્મદિવસ સમારંભનું કાર્યક્રમ સ્થળ મહાત્મમંદિર રાખવામાં આવ્યું હતું. જોકે, મહાત્મા મંદિરના સંચાલકોએ સમારકામનું કારણ દર્શાવી કાર્યક્રમને મંજૂરી આપવાનો ઇનકાર કરી દીધો છે. હવે આ સંમેલન ગાંધીનગર ટાઉનહોલ ખાતે યોજાવાનું છે.

અમદાવાદઃ છેલ્લા કેટલાય સમયથી કોંગ્રેસમાં વિખવાદ ચાલ્યા કરે છે અને વિધાનસભામાં વિરોધપક્ષના નેતા શંકરસિંહ વાઘેલા વંકાયેલા છે. શંકરસિંહ વાઘેલાએ પોતાના જન્મદિને ગાંધીનગર સ્થિત મહાત્મા મંદિરમાં સમર્થકોને એકઠા કરવાનું એલાન કર્યું છે. જોકે, રૂપાણી સરકારે બાપુને બર્થ ડે સેલિબ્રેશન માટે મહાત્મા મંદિર આપવાનો ઇનકાર કરી દેતાં અનેક તર્ક-વિતર્ક સર્જાયા છે.

ભાજપે હાલના તબક્કે શંકરસિંહ મુદ્દે કોઈ ખોટા સિગ્નલ ન જાય તેવું વલણ અપનાવ્યું છે. ભાજપ કોંગ્રેસના આંતરિક મામલામાં પડવા નથી માગતો તેવો સ્પષ્ટ સંકેત બાપુ અને તેમના સમર્થકો તથા ભાજપના કાર્યકરોને પણ આપવા માટે મહાત્મા મંદિર નહીં ફાળવવાનો નિર્ણય લેવાયાની ચર્ચા છે.

સામાન્ય રીતે મહાત્મા મંદિર સરકારી કાર્યક્રમો અને બિનરાજકીય કાર્યક્રમો માટે ઉપયોગમાં લેવાય છે. આ સંજોગોમાં શંકરસિંહનો રાજકીય કાર્યક્રમ મહાત્મા મંદિરમાં યોજાય તો એવા સંકેત જાય કે, ભાજપે જ શંકરસિંહ વાઘેલા પાસે આ કાર્યક્રમ કરાવડાવ્યો છે અને ભાજપનું તેમને પીઠબળ છે.