Honda Elevate facelift: ભારતીય ઓટોમોબાઈલ માર્કેટમાં વધુ એક દમદાર એન્ટ્રી થઈ છે. હોન્ડા કાર્સ ઈન્ડિયાએ તેની લોકપ્રિય કોમ્પેક્ટ SUV ની નવી અને અપડેટેડ આવૃત્તિ, હોન્ડા એલિવેટ ફેસલિફ્ટ (Honda Elevate Facelift) ને સત્તાવાર રીતે બજારમાં ઉતારી છે. આ શાનદાર કાર હ્યુન્ડાઇ ક્રેટા, રેનો ડસ્ટર, નિસાન ટેકટન અને મારુતિ વિક્ટોરિસ જેવી પ્રખ્યાત કાર્સને આકરી સ્પર્ધા આપવા માટે સંપૂર્ણપણે સજ્જ છે. આ ભવ્ય લોન્ચિંગ ઈવેન્ટ સાથે જ કંપનીએ તેના માઈલેજના સત્તાવાર આંકડાઓ અને નવા ફીચર્સ પરથી પડદો ઉઠાવી લીધો છે.
એન્જિન પાવર અને નવું માઇલેજ
નવી હોન્ડા એલિવેટ ફેસલિફ્ટમાં કંપનીએ તેના સૌથી ભરોસાપાત્ર 1.5-લિટર, 4-સિલિન્ડર વાળા નેચરલી એસ્પિરેટેડ i-VTEC પેટ્રોલ એન્જિનનો ઉપયોગ ચાલુ રાખ્યો છે. આ પાવરફુલ એન્જિન 119 bhp નો મહત્તમ પાવર અને 145 Nm નો પીક ટોર્ક જનરેટ કરવાની ક્ષમતા ધરાવે છે.
માઈલેજની વાત કરીએ તો, તેના 6-સ્પીડ મેન્યુઅલ (MT) વેરિઅન્ટનું માઇલેજ જૂના મોડેલ જેટલું જ એટલે કે 15.31 કિમી/લીટર દાવો કરવામાં આવ્યું છે. જોકે, કેટલાક યાંત્રિક ફેરફારોને કારણે તેના CVT ઓટોમેટિક વેરિઅન્ટના માઇલેજમાં નજીવો ઘટાડો નોંધાયો છે. આ નવું CVT મોડેલ હવે 16.61 કિમી/લીટરની માઈલેજ આપશે, જે અગાઉના મોડેલની 16.92 કિમી/લીટરની માઈલેજ કરતાં 0.31 કિમી/લીટર ઓછી છે.
આકર્ષક બાહ્ય ડિઝાઇન અને નવા વેરિઅન્ટ્સ
ગ્રાહકો માટે આ ફેસલિફ્ટ મોડેલ કુલ 5 ટ્રીમ લેવલમાં ઉપલબ્ધ કરાવવામાં આવ્યું છે: SV, V, VX, ZX અને એકદમ નવું ઉમેરાયેલું પ્રીમિયમ ZX+ વેરિઅન્ટ. ખાસ વાત એ છે કે, ટોપ-એન્ડ 'ZX+' વેરિઅન્ટને એક ખાસ 'બ્લેક એડિશન' તરીકે પણ બજારમાં મુકવામાં આવ્યું છે. જેની પ્રારંભિક કિંમત 11.80 લાખ રૂપિયાથી શરૂ થાય છે.
કારના એક્સટીરિયર લુકને વધુ સ્પોર્ટી બનાવવામાં આવ્યો છે:
ફ્રન્ટ પ્રોફાઇલ: ગ્રિલની બરાબર ઉપર એક નવી સેગમેન્ટેડ LED DRL સ્ટ્રીપ આપવામાં આવી છે, જે બંને હેડલેમ્પ્સને એકબીજા સાથે જોડે છે. આગળની ગ્રિલમાં નવી મેશ પેટર્ન અને શાનદાર ગ્લોસ-બ્લેક ફિનિશ જોવા મળે છે.
નવો લોગો પ્લેસમેન્ટ: હોન્ડાના લોગોને હવે ગ્રિલની મધ્યમાંથી ખસેડીને બોનેટની કિનારી પર મુકવામાં આવ્યો છે.
રીઅર પ્રોફાઇલ: પાછળના ભાગમાં પણ એક આકર્ષક નવો LED લાઇટ બાર ઉમેરાયો છે, જે બંને ટેલલેમ્પને જોડે છે.
કલર અને ક્લેડીંગ: કલર ઓપ્શનમાં અદભુત નવો 'નોર્ડિક ફોરેસ્ટ પર્લ' રંગ સિંગલ અને ડ્યુઅલ-ટોન બંને વિકલ્પોમાં મળશે. નીચેના બોડી ક્લેડીંગને જૂના મેટ ફિનિશમાંથી બદલીને પ્રીમિયમ ગ્લોસ-બ્લેક ફિનિશ આપવામાં આવ્યું છે.
સેગમેન્ટ-ફર્સ્ટ ઇન્ટિરિયર ફીચર્સ અને કિંમત
કારની કેબિનને અત્યંત આરામદાયક અને આધુનિક બનાવવામાં આવી છે. હોન્ડાએ આ નવી SUV માં ઘણી 'સેગમેન્ટ-ફર્સ્ટ' (આ કેટેગરીમાં પ્રથમ વાર) સુવિધાઓ આપી છે. તેની સૌથી મોટી ખાસિયત એ છે કે હવે આગળની બંને પાવર સીટોની સાથે પાછળના મુસાફરો માટે પણ રીઅર વેન્ટિલેટેડ સીટો આપવામાં આવી છે. આનો અર્થ એ છે કે, કારમાં બેઠેલા તમામ મુસાફરો હવે ઠંડી અને વેન્ટિલેટેડ સીટોનો આનંદ માણી શકશે.
સલામતી અને ટેકનોલોજીના ભાગરૂપે તેમાં અદ્યતન 360-ડિગ્રી પાર્કિંગ કેમેરા અને પાછળ બેસનારાઓ માટે કેપેસિટીવ-ટચ રીઅર LED રીડિંગ લેમ્પ્સનો સમાવેશ કરાયો છે. આ ઉપરાંત, CVT ઓટોમેટિક વેરિઅન્ટ્સમાં ઓટો-હોલ્ડ ફંક્શન સાથેની આધુનિક ઇલેક્ટ્રોનિક પાર્કિંગ બ્રેક પણ આપવામાં આવી છે.
Car loan Information:
Calculate Car Loan EMI