ખુશખબરઃ પીએફ ઉપાડ પર હવે એમ્પ્લોયરની મંજૂરી જરૂરી રહેશે નહીં
નવી દિલ્હીઃ પીએફ ઉપાડ ઉપર હવે એમ્પ્લોયરની મંજુરીની જરૂર રહેશે નહીં. આનાથી કર્મચારીઓને સીધો ફાયદો થઇ શકે છે. એવા કર્મચારી જે પીએફની રકમ ઉપાડી ચુક્યા છે તે જાણે છે કે, આ પ્રક્રિયા કેટલી જટિલ હોય છે. તેનું કારણ એ છે કે, આના માટે આપને એમ્પ્લોયર પાસેથી ટ્રાન્સફર અથવા તો ઉપાડ માટે ફોર્મ ઉપર મંજુરી લેવાની જરૂર પડે છે. આ પ્રક્રિયા ખુબ જ લાંબી હોય છે.
એમ્પ્લોઇલક્ષી હોતી નથી પરંતુ હવે સ્થિતિ બદલી શકે છે. કારણ કે એમ્પ્લોઇઝ પ્રોવિડંડ ફંડ ઓર્ગેનાઇઝેશન (ઇપીએફઓ)એ એવા લોકો માટે નવા ફોર્મ જારી કરવામાં આવ્યા છે જેમની પાસે યુનિવર્સલ એકાઉન્ટ નંબર છે. આ ફોર્મ ઉપર આપને એમ્પ્લોયર પાસેથી પ્રમાણપત્ર અથવા તો મંજુરીની જરૂર રહેશે નહીં. યુએએન આધારિત ફોર્મ ૧૯નો ઉપયોગ કરવો પડશે. આના પર કર્મચારીને માલિક પાસેથી હસ્તાક્ષર કરવાની જરૂર પડશે નહીં.
આ સુવિધા એવા તમામ લોકોને મળશે જે લોકોને યુએએન નંબર એક્ટિવ થયેલા છે અને કેવાયસી ડિટેઇલ્સ પૂર્ણ કરવામાં આવેલી છે. જેમ કે, બેંક એકાઉન્ટ આધાર કાર્ડ સાથે જોડાયેલું છે. હાલમાં આ ફોર્મ ઓનલાઈન જમા કરવામાં આવે છે પરંતુ ઇપીએફઓ હવે આ સુવિધાને ટૂંક સમયમાં જ ઓનલાઈન આપનાર છે. જેથી જ્યારે પણ પીએફની રકમ ઉપાડવાની જરૂર પડશે તો આ બાબતોને ધ્યાનમાં લેવી પડશે.
ઇપીએફ હેઠળ કોઇ કર્મચારી પીએફમાં ફાઈનલ સેટલમેન્ટ માટે એપ્લાય કરી શકે છે. જ્યારે તેમની વય ૫૫ વર્ષની થઇ જાય અથવા તો તે નોકરીથી નિવૃત્તિ લઇ લે છે. કર્મચારી વ્યાજ સહિત સમગ્ર રકમના ઉપાડ માટે અરજી કરી શકે છે. આ ઉપરાંત ઇપીએફઓ તરફથી એક વિન્ડો શરૂ કરવામાં આવી છે જે હેઠળ નિવૃત્તિની નજીક પહોંચી ગયેલા કર્મચારીઓ પીએફના એક હિસ્સાથી ઉપાડ માટે અરજી કરી શકે છે. ૫૪ વર્ષથી વધુ વયના કોઇપણ કર્મચારી વ્યાજ સહિત ૯૦ ટકાની રકમને ઉપાડી શકે છે. આ ઉપરાંત જો કોઇ કર્મચારી ૬૦ દિવસથી વધુ સમય સુધી બેરોજગાર રહે છે તો તે પીએફની સમગ્ર રકમ ઉપાડી શકે છે.