શાહરૂખ ખાનને ધમકી આપવાના કેસમાં મુંબઈ પોલીસે આરોપી ફૈઝાન ખાનની ધરપકડ કરી છે. હવે તેને રાયપુર કોર્ટમાં રજૂ કરવામાં આવશે. પોલીસ દ્વારા તેને નોટિસ આપવામાં આવી હતી પરંતુ તે પૂછપરછ માટે આવ્યો ન હતો. આ પછી પોલીસે તેની તેના ઘરેથી ધરપકડ કરી હતી. હવે પોલીસ તેને રિમાન્ડ પર લેવાની માંગ કરશે.
બોલિવૂડ સુપરસ્ટાર શાહરૂખ ખાનને હાલમાં જ જાનથી મારી નાખવાની ધમકી આપવામાં આવી હતી, જે બાદ સમગ્ર ઈન્ડસ્ટ્રીમાં ખળભળાટ મચી ગયો હતો. બાંદ્રા પોલીસને એક કોલ દ્વારા શાહરૂખ ખાનને જાનથી મારી નાખવાની ધમકી મળી હતી, ત્યારબાદ પોલીસ આ મામલાની તપાસમાં વ્યસ્ત હતી. હવે આ કેસમાં પોલીસે આરોપી ફૈઝાન ખાનની સવારે ધરપકડ કરી છે.
મહારાષ્ટ્ર પોલીસે આરોપીની છત્તીસગઢ, રાયપુરથી ધરપકડ કરી છે. આરોપી ફૈઝાનને આજે મંગળવારે રાયપુર કોર્ટમાં રજૂ કરવામાં આવશે. મહારાષ્ટ્ર પોલીસે ગયા અઠવાડિયે આરોપી ફૈઝાન ખાનના નામે નોટિસ જાહેર કરી હતી. મુંબઈ પોલીસે પ્રથમવાર ફૈઝાનની બે કલાક પૂછપરછ કરી હતી. પૂછપરછ દરમિયાન ફૈઝાને ખુલાસો કર્યો હતો કે તેના નામના નંબરનો ઉપયોગ શાહરૂખ ખાનને 50 લાખ રૂપિયાની ખંડણી માટે જાનથી મારી નાખવાની ધમકી આપવા માટે કરવામાં આવ્યો હતો. ધમકીભર્યા કોલના 5 દિવસ પહેલા તે મોબાઈલ ખોવાઈ ગયો હતો.
પોલીસ રિમાન્ડમાં લેવાની માંગણી કરશે
ફૈઝાને વધુમાં જણાવ્યું હતું કે, તેણે રાયપુરના ખમરડીહ પોલીસ સ્ટેશનમાં મોબાઈલ ખોવાઈ જવાની જાણ પણ કરી હતી. મુંબઈ પોલીસ દ્વારા ફૈઝાન ખાનને નોટિસ આપવામાં આવી હતી, ત્યારબાદ તેને આજે સવારે પૂછપરછ માટે પંડારી પોલીસ સ્ટેશન બોલાવવામાં આવ્યો હતો, પરંતુ જ્યારે ફૈઝાન નોટિસ પર પૂછપરછ માટે ન પહોંચ્યો ત્યારે તેને તેના ઘરેથી અટકાયતમાં લેવામાં આવ્યો હતો. મળતી માહિતી મુજબ, હવે પોલીસ તેને રાયપુર કોર્ટમાં રજૂ કરીને રિમાન્ડ પર લેવાની કોશિશ કરશે.
5મી નવેમ્બરે જાનથી મારી નાખવાની ધમકી આપી હતી
5 નવેમ્બરે એક કોલ દ્વારા બોલિવૂડના બાદશાહ શાહરૂખને ત્રણ જાનથી મારી નાખવાની ધમકી આપવામાં આવી હતી. ધમકીભર્યા કોલ પર કહેવામાં આવ્યું હતું કે જો શાહરૂખ ખાન 50 લાખ રૂપિયા નહીં આપે તો તેને મારી નાખવામાં આવશે. આ સિવાય જ્યારે ફોન કરનારને તેની ઓળખ વિશે પૂછવામાં આવ્યું તો તેણે તેનું નામ હિન્દુસ્તાની લખવાનું કહ્યું. આ પછી પોલીસે કોલ ટ્રેસ કરીને તપાસ શરૂ કરી હતી.