Ahmedabad Vatva Murder Case: અમદાવાદના વટવા વિસ્તારમાં એક ખૂબ જ ચોંકાવનારી અને રૂવાંડા ઊભા કરી દે તેવી હત્યાનો બનાવ સામે આવ્યો છે. અહીં જમવામાં માત્ર એક કીડી નીકળવા જેવી નજીવી બાબતે થયેલા ઝઘડામાં 4 મિત્રોએ ભેગા મળીને પોતાના જ મિત્રને નિર્દયતાથી મોતને ઘાટ ઉતારી દીધો. વટવાની સતેજ હોમ્સ સોસાયટીના એક ફ્લેટમાંથી ભારે દુર્ગંધ આવતા આ હત્યાકાંડનો પર્દાફાશ થયો હતો. પોલીસે ગણતરીના દિવસોમાં જ આ મર્ડર મિસ્ટ્રી ઉકેલી નાખી છે અને હરિયાણાથી 1 સગીર સહિત કુલ 4 આરોપીઓની ધરપકડ કરી લીધી છે. ચાલો જાણીએ આખી ઘટના શું હતી અને કેવી રીતે પોલીસે આરોપીઓને ઝડપી પાડ્યા.
ફ્લેટમાંથી આવતી દુર્ગંધે ખોલ્યો હત્યાનો ભેદ
અમદાવાદના વટવા પોલીસ સ્ટેશન વિસ્તારમાં આવેલી સતેજ હોમ્સ સોસાયટીમાં ગઈ 27 મેના રોજ એક ફ્લેટમાંથી ખૂબ જ ખરાબ વાસ આવી રહી હતી. આ દુર્ગંધ એટલી હદે હતી કે આસપાસ રહેતા લોકો માટે ત્યાં ઊભા રહેવું અને શ્વાસ લેવો પણ મુશ્કેલ થઈ ગયો હતો. આથી સોસાયટીના ચેરમેને મકાનમાલિકને જાણ કરી. મકાનમાલિકે જ્યારે ફ્લેટ પર આવીને દરવાજો ખોલ્યો, તો તેમના પગ નીચેથી જમીન સરકી ગઈ. ફ્લેટના બેડરૂમમાં એક યુવકની લાશ પડી હતી, જેના મોઢામાં ડૂચો મારેલો હતો અને હાથ-પગ બાંધેલી હાલતમાં હતા. તરત જ વટવા પોલીસને જાણ કરવામાં આવી અને પોલીસે ઘટનાસ્થળે પહોંચીને તપાસનો ધમધમાટ શરૂ કર્યો.
મૃતકની ઓળખ અને 4 શંકાસ્પદ મિત્રોની શોધખોળ
પોલીસની પ્રાથમિક તપાસમાં સામે આવ્યું કે મૃતકનું નામ ઇમરાન સિંધા હતું, જે મૂળ વડોદરાનો રહેવાસી હતો અને છેલ્લા 2 વર્ષથી પોતાના પરિવારથી અલગ રહેતો હતો. પોલીસે તપાસ કરી કે ઇમરાન સાથે ફ્લેટમાં બીજું કોણ-કોણ ભાડે રહેતું હતું. તપાસમાં 4 નામ સામે આવ્યા: વિરેન્દ્રસિંઘ બધેલ ઉર્ફે વીરુ, ચંદ્રમોહન શર્મા ઉર્ફે ચંદુ, રવિ રકતુ શાહ અને એક સગીર વયનો છોકરો. પોલીસે તેમનો સંપર્ક કરવાનો પ્રયાસ કર્યો પણ બધાના મોબાઈલ બંધ આવતા હતા. પોલીસને જાણવા મળ્યું કે આ ચારેય જણાએ પોતાના સિમ કાર્ડ તોડીને ફેંકી દીધા છે. આથી પોલીસનો શક પાક્કો થઈ ગયો કે હત્યા આ ચારેયે ભેગા મળીને જ કરી છે.
આ પણ વાંચોઃ ગાંધીનગરમાં 4 વર્ષની બાળકી પર દુષ્કર્મ કરનાર નરાધમને છેલ્લા શ્વાસ સુધી આજીવન કેદ
પોલીસને થાપ આપવા 8 શહેરોમાં ભાગ્યા, અંતે પલવલથી પકડાયા
આરોપીઓને પકડવા માટે વટવા પોલીસ અને ઝોન 8 LCB ની અલગ-અલગ ટીમો બનાવવામાં આવી. પોલીસથી બચવા માટે આ આરોપીઓ અમદાવાદથી ટ્રાવેલ્સ પકડીને પહેલા જયપુર ભાગ્યા હતા. ત્યારપછી તેઓ જયપુરથી આગ્રા, ફતેહાબાદ, ધોલપુર, મથુરા, ગુરુગ્રામ, વૃંદાવન અને વજીરાબાદ એમ અલગ-અલગ શહેરોમાં પોલીસને થાપ આપવા ભાગતા ફર્યા હતા. પરંતુ તેઓ અમદાવાદ પોલીસથી બચી શક્યા નહીં અને બાતમીના આધારે હરિયાણાના પલવલ ખાતેથી એક ખાનગી બસમાંથી ચારેયને ઝડપી લેવામાં આવ્યા.
'તમે મટન ખાવ છો તો કીડીમાં શું વાંધો છે?' અને થઈ ગઈ હત્યા
પોલીસે આરોપીઓને અમદાવાદ લાવીને કડક પૂછપરછ કરી, ત્યારે હત્યાનું જે કારણ સામે આવ્યું તે સાંભળીને પોલીસ પણ અચંબામાં પડી ગઈ. બન્યું એવું હતું કે, સગીર આરોપીએ ભોજન બનાવ્યું હતું અને તેમાં એક કીડી નીકળી હતી. ઇમરાનના જમવામાં કીડી આવતા તેણે સગીરને બિભત્સ ગાળો બોલવાની શરૂ કરી દીધી. ઝઘડા દરમિયાન ઇમરાને તેમને એમ પણ મહેણું માર્યું કે, "તમે માંસ-મટન ખાવ છો, તો એક કીડીમાં શું તકલીફ છે?"
આ વાત પર ઝઘડો એટલો બધો વણસી ગયો કે સગીર સહિત ચારેય આરોપીઓએ ભેગા મળીને ઇમરાનને માર મારવાનું શરૂ કરી દીધું. ઝપાઝપીમાં કોઈએ રસોડામાંથી એક ભારે વસ્તુ લાવીને ઇમરાનના માથામાં ફટકારી દીધી. ઇમરાન બૂમાબૂમ કરવા લાગ્યો એટલે ચારેયે ભેગા મળીને તેના મોઢામાં ડૂચો મારી દીધો, તેને ઊંધો પાડીને હાથ-પગ બાંધી દીધા અને અંતે ગળું દબાવીને તેની ક્રૂરતાથી હત્યા કરી નાખી. હાલમાં વટવા પોલીસે 3 આરોપીઓની ધરપકડ કરી છે અને 1 સગીર વિરુદ્ધ કાયદેસરની કાર્યવાહી હાથ ધરીને, આ કેસમાં અન્ય કોઈ કારણ કે વ્યક્તિ સામેલ છે કે કેમ તે દિશામાં તપાસ તેજ કરી છે.
આ પણ વાંચોઃ અમદાવાદમાં ફિલ્મી દ્રશ્યો: 26 ગુનામાં વોન્ટેડ ધમા બારડનો PI પર પિસ્તોલથી હુમલો, પગમાં ગોળી વાગતા ઝડપાયો