Kheda Gang Rape News: ખેડા શહેરમાંથી એક અત્યંત ચોંકાવનારી અને શરમજનક ઘટના સામે આવી છે, જ્યાં એક 17 વર્ષની સગીરા સામૂહિક દુષ્કર્મનો શિકાર બની છે. મુખ્ય આરોપી સહિત 9 જેટલા નરાધમોએ ભેગા મળીને આ સગીરાને પોતાની હવસનો શિકાર બનાવી હતી. પ્રેમજાળમાં ફસાવીને અને વીડિયો વાયરલ કરવાની ધમકી આપીને સતત 3 વર્ષ સુધી આ હેવાનોએ સગીરાનું શારીરિક શોષણ કર્યું હતું. આખરે ભાંડો ફૂટતા પરિવારજનોએ હિન્દુ સંગઠનોની મદદ લઈને પોલીસ ફરિયાદ નોંધાવી છે, જેના પગલે પોલીસે 8 આરોપીઓને ઝડપી પાડીને જાહેરમાં તેમનું સરઘસ કાઢ્યું છે.
પ્રેમજાળમાં ફસાવી અને પછી શરૂ કર્યો બ્લેકમેલિંગનો ખેલ
મળતી માહિતી મુજબ, આજથી 3 વર્ષ પહેલાં પરવેઝ પઠાણ નામના મુખ્ય આરોપીએ આ 17 વર્ષની સગીરાને પોતાની પ્રેમજાળમાં ફસાવી હતી. ત્યારબાદ તેણે સગીરાના કેટલાક અશ્લીલ ફોટા અને વીડિયો ઉતારી લીધા હતા. આ ફોટા અને વીડિયો સોશિયલ મીડિયા પર વાયરલ કરી દેવાની તેમજ જાનથી મારી નાખવાની ધમકી આપીને પરવેઝ અવારનવાર સગીરા સાથે દુષ્કર્મ આચરતો હતો.
મિત્રોને પણ આ કુકર્મમાં સામેલ કર્યા
ચોંકાવનારી વાત તો એ છે કે આરોપી પરવેઝ પઠાણે પોતાના અન્ય 8 મિત્રોને પણ આ કુકર્મમાં સામેલ કર્યા હતા. તેણે સગીરાને પોતાના મિત્રોના હવાલે પણ કરી દીધી હતી. આ તમામ આરોપીઓએ ભેગા મળીને સતત 3 વર્ષ સુધી સગીરાને પીંખી નાખી. આ ત્રાસ સહન ન થતા આખરે સમગ્ર ઘટનાની જાણ પરિવારજનોને થઈ. જે બાદ પરિવારજનોએ હિન્દુ સંગઠનોની મદદ લીધી અને પોલીસ મથકે જઈને તમામ આરોપીઓ વિરુદ્ધ વિધિવત ફરિયાદ નોંધાવી.
પોલીસે કાઢ્યું આરોપીઓનું સરઘસ
આ ગંભીર ફરિયાદ મળતા જ પોલીસ તાત્કાલિક એક્શનમાં આવી ગઈ હતી. પોલીસે ગણતરીના સમયમાં જ મુખ્ય આરોપી પરવેઝ પઠાણ સહિત માહિર પઠાણ, ફૈઝાન પઠાણ, તૌફિક પઠાણ, અયાન પઠાણ, મોઈન પઠાણ, મારૂફ પઠાણ અને સલમાન પઠાણ એમ કુલ 8 આરોપીઓની ધરપકડ કરી લીધી છે. જ્યારે સાહિલ પઠાણ નામનો એક આરોપી હજુ પણ પોલીસ પકડથી દૂર છે.
ઝડપાયેલા તમામ નરાધમોના હાથમાં કાયદાના દોરડા બાંધીને આજે પોલીસે આખા ગામમાં તેમનું સરઘસ કાઢ્યું હતું. ચુસ્ત પોલીસ બંદોબસ્ત વચ્ચે આ તમામ આરોપીઓને ઘટનાસ્થળે લઈ જઈને સમગ્ર ક્રાઈમ સીનનું રિ કન્સ્ટ્રક્શન કરવામાં આવ્યું હતું. આરોપીઓના નીકળેલા આ વરઘોડાને જોવા માટે મોટી સંખ્યામાં ગ્રામજનો પણ ઉમટી પડ્યા હતા.