Nagpur Murder and Rape Case: નાગપુરમાં એક અત્યંત ચોંકાવનારી અને હચમચાવી નાખનારી ઘટના પ્રકાશમાં આવી છે. હુડકેશ્વર પોલીસ સ્ટેશન વિસ્તારમાં એક યુવકે તેની પરિણીત પ્રેમિકાની ગળું દબાવીને હત્યા કરી નાખી હતી, એટલું જ નહીં પરંતુ ક્રૂરતાની તમામ હદો વટાવીને મૃતદેહ પર પણ બળાત્કાર ગુજાર્યો હતો. પોલીસે આ અમાનવીય કૃત્ય કરનાર આરોપીની ધરપકડ કરી છે અને સમગ્ર મામલાની ગહન તપાસ શરૂ કરી છે.
ગઈકાલે બનેલી આ દર્દનાક ઘટનાએ સમગ્ર નાગપુર શહેરને સ્તબ્ધ કરી દીધું છે. પોલીસે જણાવ્યું કે આરોપી રોહિત ગણેશ ટેકામે મહિલા સાથે શારીરિક સંબંધ બાંધવાની ઈચ્છા વ્યક્ત કરી હતી, પરંતુ જ્યારે મહિલાએ ઈન્કાર કર્યો ત્યારે આવેશમાં આવીને તેણે આ ઘાતકી કૃત્યને અંજામ આપ્યો હતો. પોલીસે મેડિકલ રિપોર્ટને ટાંકીને જણાવ્યું કે મૃતદેહ પર બળાત્કાર થયો હોવાની પુષ્ટિ થઈ છે, જે આ કેસને વધુ બિભત્સ અને અમાનવીય બનાવે છે.
આ કેસનો ખુલાસો ત્યારે થયો જ્યારે પીડિતાની નાની પુત્રી શાળાએથી ઘરે પરત ફરી હતી અને માતાને મૃત હાલતમાં જોઈ હતી. બાળકીએ તાત્કાલિક આ ઘટના અંગે જાણ કરતાં પોલીસે ઘટનાસ્થળે પહોંચીને તપાસ શરૂ કરી હતી. હુડકેશ્વર પોલીસે ત્વરિત કાર્યવાહી કરીને આરોપી રોહિત ગણેશ ટેકામની ધરપકડ કરી લીધી છે.
પોલીસના જણાવ્યા અનુસાર, 32 વર્ષીય પરિણીત મહિલા હુડકેશ્વર ખુર્દ વિસ્તારમાં રહેતી હતી. તે મૂળ મધ્યપ્રદેશની વતની હતી અને છ વર્ષ પહેલાં પતિ સાથે નાગપુર કામની શોધમાં આવી હતી. પીડિતાનો પતિ ઢાબા પર કામ કરે છે અને મોડી રાત્રે ઘરે પરત ફરે છે, અને તેને દારૂની લત પણ છે. આરોપી રોહિત ટેકામ, જે કન્સ્ટ્રક્શન એન્જિનિયર છે, તે બે વર્ષ પહેલાં હુડકેશ્વર ખુર્દમાં એક બિલ્ડિંગના બાંધકામ દરમિયાન પીડિતાના સંપર્કમાં આવ્યો હતો અને ત્યારથી તેઓ પ્રેમ સંબંધમાં હતા.
પોલીસે વધુમાં જણાવ્યું કે, પ્રેમસંબંધ શરૂ થયા બાદ જ્યારે પીડિતાનો પતિ ઘરે ન હોય ત્યારે રોહિત અવારનવાર તેને મળવા જતો હતો. ગુરુવારે (6 ફેબ્રુઆરી) પણ જ્યારે પીડિતાનો પતિ કામ પર ગયો હતો ત્યારે તેણે રોહિતને પોતાના ઘરે બોલાવ્યો હતો. રોહિત મહાલગાંવ કપાસી ખાતે પોતાનું કામ અધવચ્ચે છોડીને પીડિતાના ઘરે પહોંચ્યો હતો.
પોલીસ તપાસમાં ખુલાસો થયો છે કે રોહિત અને પીડિતાએ સાથે મળીને દારૂ પીધો અને ભોજન કર્યું હતું. ત્યારબાદ રોહિતે પીડિતા પાસે શારીરિક સંબંધ બાંધવાની માંગણી કરી, પરંતુ પીડિતાએ ઈન્કાર કરી દીધો હતો. જેના કારણે રોહિત ગુસ્સે ભરાયો અને આવેશમાં તેણે પીડિતાનું ગળું દબાવીને હત્યા કરી નાખી. એટલું જ નહીં, તેણે મૃતદેહ પર પણ બળાત્કાર ગુજાર્યો અને પછી ઘટનાસ્થળેથી ભાગી ગયો હતો.
હુડકેશ્વર પોલીસે આ કેસમાં હત્યા અને બળાત્કારનો ગુનો નોંધીને આગળની કાર્યવાહી હાથ ધરી છે. પીડિતાના મોબાઈલ ફોનના કોલ રેકોર્ડિંગ અને અન્ય પુરાવાઓના આધારે પોલીસે આરોપી રોહિત ટેકામની ધરપકડ કરી છે અને હાલમાં તેની પૂછપરછ ચાલી રહી છે. આ ઘટનાએ સમગ્ર વિસ્તારમાં ભારે ચિંતા અને ગમગીની ફેલાવી છે.
આ પણ વાંચો....
સાયલામાં ધોળા દિવસે ખૂની ખેલ: "મારાથી સારા લગ્ન કેમ કર્યા?" કહી યુવાનને રહેંસી નાંખ્યો