CUET-UG 2023: કોમન યૂનિવર્સિટી એંટ્રન્સ ટેસ્ટના બીજા તબક્કા માટે થયા અધધ 14 લાખ રજીસ્ટ્રેશન

યુજીસીના ચેરમેન એમ જગદેશ કુમારે આપી માહિતી

CUET-UG 2023: આ વર્ષે કોમન યુનિવર્સિટી એન્ટ્રન્સ ટેસ્ટ માટે લગભગ 14 લાખ વિદ્યાર્થીઓએ રજીસ્ટ્રેશન કરાવ્યું છે. યુજીસીના ચેરમેન એમ જગદેશ કુમારે માહિતી આપી છે કે CUET-UGની બીજી આવૃત્તિ માટે લગભગ 14 લાખ અરજીઓ મળી હતી. જે ગયા વર્ષ કરતાં 41 ટકા વધુ છે. BHU અને અલ્હાબાદ યુનિવર્સિટી પછી દિલ્હી યુનિવર્સિટીએ સૌથી વધુ સંખ્યામાં CUET-UG અરજીઓ મેળવી છે. તેમણે કહ્યું હતું કે, CUET-UG માટે સૌથી વધુ અરજીઓ ઉત્તર પ્રદેશમાંથી મળી છે.

યુજીસીના ચેરમેન એમ જગદેશ કુમારના જણાવ્યા પ્રમાણે, ઉત્તર પ્રદેશ બાદ સૌથી વધુ અરજી દિલ્હી અને બિહારના વિદ્યાર્થીઓ પાસેથી મળી છે.

આ વર્ષે અંડર ગ્રેજ્યુએટ યુનિવર્સિટી ટેસ્ટ 21 થી 31 મે 2023 દરમિયાન લેવામાં આવશે. આ પરીક્ષા માટેની સિટી સ્લિપ 30મી એપ્રિલે જારી કરવામાં આવશે. CUET UG 13 ભાષાઓમાં હાથ ધરવામાં આવશે- આસામી, બંગાળી, અંગ્રેજી, ગુજરાતી, હિન્દી, કન્નડ, મલયાલમ, મરાઠી, ઉડિયા, પંજાબી, તમિલ, તેલુગુ અને ઉર્દુ. નેશનલ ટેસ્ટિંગ એજન્સીએ દેશમાં લગભગ 1,000 પરીક્ષણ કેન્દ્રોની ઓળખ કરી છે, જ્યાં દરરોજ પરીક્ષા માટે મોટી સંખ્યામાં પરીક્ષણ કેન્દ્રોનો ઉપયોગ કરવામાં આવશે. દેશભરની કેન્દ્રીય યુનિવર્સિટીઓ અને અન્ય સહભાગી યુનિવર્સિટીઓમાં પ્રવેશ માટે આ પરીક્ષાનું રાષ્ટ્રીય સ્તરે આયોજન કરવામાં આવે છે.

CUET-UG Exam 2023: હવે બે નહીં પણ ત્રણ શિફ્ટમાં આયોજીત થશે પરીક્ષાઓ

CUET UG Exam: યુનિવર્સિટી ગ્રાંટ કમિશન દ્વારા એક મહત્વનો નિર્ણય લેવામાં આવ્યો છે. યુનિવર્સિટી ગ્રાંટ કમિશનના ચેરમેને નિર્ણય લીધો છે કે, હવેથી કોમન યુનિવર્સિટી એન્ટ્રન્સ ટેસ્ટ અંડર ગ્રેજ્યુએટ (CUET UG) બેને બદલે ત્રણ શિફ્ટમાં લેવામાં આવશે. અગાઉ યુજીસીએ ગયા વર્ષે માર્ચમાં જાહેરાત કરી હતી કે, તમામ કેન્દ્રીય યુનિવર્સિટીઓમાં અંડરગ્રેજ્યુએટ પ્રવેશ સામાન્ય પ્રવેશ પરીક્ષા દ્વારા હાથ ધરવામાં આવશે.

યુજીસીના અધ્યક્ષ એમ. જગદેશ કુમારે એક ખાસ વાતચીત દરમિયાન જણાવ્યું હતું કે, કોમન યુનિવર્સિટી એન્ટ્રન્સ ટેસ્ટ અંડરગ્રેજ્યુએટ હવે ત્રણ શિફ્ટમાં લેવામાં આવશે. તેમજ JEE અને NEET જેવી મહત્વની પ્રવેશ પરીક્ષાઓ સાથે તેને મર્જ કરવાની યોજના ઓછામાં ઓછા બે વર્ષ અગાઉ જાહેર કરવામાં આવશે. યુજીસીના અધ્યક્ષે માહિતી આપી હતી કે, યુનિવર્સિટી ગ્રાન્ટ્સ કમિશન અને નેશનલ ટેસ્ટિંગ એજન્સી એ બાબત સુનિશ્ચિત કરવા માટે સજ્જ છે કે, CUET-UGની બીજી આવૃત્તિ ભૂલ-મુક્ત છે.

તેમણે ઉમેર્યું હતું કે, ગત વખતે પરીક્ષા દરમિયાન ઘણી ખામીઓ સામે આવી હતી, પરંતુ આ વર્ષે તમામ મુદ્દાઓ ઉકેલાઈ ગયા છે. વિદ્યાર્થીઓના અનુભવને ધ્યાનમાં રાખીને આ આયોજન કરવામાં આવ્યું છે. આ ઉપરાંત અમે ખાતરી આપવા માટે તૈયાર છીએ કે, પરીક્ષા દરમિયાન કોઈ ગેરરીતિ નહીં થાય. વિદ્યાર્થીઓએ માત્ર તેમની પરીક્ષાની જ ચિંતા કરવી.

 

Education Loan Information: