નવી દિલ્હીઃ ભાજપે બોલિવૂડ ઇન્ડસ્ટ્રી સાથે જોડાયેલી વધુ એક હસ્તી હંસરાજ હંસને  લોકસભા ચૂંટણીની ટિકિટ આપી છે. પાર્ટીએ ઉત્તર- પશ્વિમ દિલ્હી બેઠક પરથી જાણીતા સિંગર હંસરાજ હંસને ઉમેદવાર બનાવવ્યા છે. હંસરાજ હંસને ભાજપના વર્તમાન સાંસદ ઉદિત રાજના સ્થાન પર ટિકિટ આપવામાં આવી છે. ઉદિત રાજે ટિકિટ નહી મળવાની અટકળો બાદ ભાજપમાંથી રાજીનામું આપવાની જાહેરાત કરી હતી અને પોતાના નામ આગળથી ચોકીદાર હટાવી લીધું હતું. હંસરાજ હંસ લાંબા સમયથી ભાજપ સાથે જોડાયેલા રહ્યા છે. તેમણે 2017માં દિલ્હી નગર નિગમની ચૂંટણીમાં ભાજપ માટે પ્રચાર કર્યો હતો. મોડી રાત્રે જ્યારે ટિકિટ નહી મળવાના અહેવાલો બાદ ઉદિત રાજના સમર્થકોએ ભાજપના કાર્યાલય પર હોબાળો મચાવ્યો હતો. હંસરાજ હંસે 2009માં અકાલી દળ સાથે જોડાઇને રાજકીય સફરની શરૂઆત કરી હતી. બાદમાં તેઓ કોગ્રેસમાં સામેલ થયા હતા. અહીં લગભગ બે વર્ષ રહ્યા બાદ તે ડિસેમ્બર 2016માં ભાજપમાં જોડાયા હતા.