Happy birthday Kiara Advani: અભિનેત્રી કિયારા અડવાણી ધીમે-ધીમે ઈન્ડસ્ટ્રીમાં પોતાનું સ્થાન બનાવવામાં સફળ રહી છે. આજે કિયારા તેનો 30મો જન્મદિવસ ઉજવી રહી છે, કિયારાનો જન્મ 31 જુલાઈ, 1992ના રોજ મુંબઈમાં થયો હતો. કિયારાના પિતા જગદીપ અડવાણી મોટા બિઝનેસમેન છે. તેની માતા જીનીવીવ જાફરી એક શિક્ષિકા છે. ફિલ્મોમાં આવતા પહેલા કિયારાનું નામ આલિયા અડવાણી હતું, તેણે ડેબ્યૂ સાથે જ પોતાનું નામ બદલી નાખ્યું. કિયારાએ તેનો પ્રારંભિક અભ્યાસ મુંબઈથી કર્યો હતો અને તેણે અનુપમ ખેરની એક્ટિંગ સ્કૂલમાંથી એક્ટિંગની બારીકાઈ શીખી હતી. કિયારા અડવાણીના જન્મદિવસના અવસર પર જાણીએ રસપ્રદ વાતો.
'ફગલી'થી ડેબ્યૂ
કિયારાએ 2014માં ફિલ્મ 'ફગલી'થી ડેબ્યૂ કર્યું હતું. કિયારાને વર્ષ 2016માં આવેલી ફિલ્મ 'એમએસ ધોની..'થી બોલિવૂડમાં ઓળખ મળી હતી. આમાં તેણે ક્રિકેટર ધોનીની પત્ની સાક્ષીનું પાત્ર ભજવ્યું હતું. વર્ષ 2019માં રિલીઝ થયેલી કિયારાની ફિલ્મ 'કબીર સિંહ'એ બોક્સ ઓફિસ પર કમાણીના નવા રેકોર્ડ બનાવ્યા હતા. આ ફિલ્મમાં કિયારાએ શાહિદના પાત્ર કબીર સિંહની ગર્લફ્રેન્ડનો રોલ કર્યો હતો. કિયારાએ એક વર્ષની ઉંમરે બેબી સોપની ટીવી એડ પણ કરી છે.
તેલુગુ ફિલ્મોમાં પણ કામ કર્યું છે
2018 માં, કિયારા તેલુગુ ફિલ્મ ભારત આને નેનુમાં મહેશ બાબુ સાથે જોવા મળી હતી. આ પછી વર્ષ 2019 માં તે ફરીથી તેલુગુ ફિલ્મ વિનય વિધેયા રામમાં જોવા મળી હતી.
સલમાન ખાનના કહેવા પર નામ બદલ્યું
કિયારાના સોશિયલ મીડિયા એકાઉન્ટ પર તેનું નામ હજી પણ આલિયા છે. જોકે તેણે તેને પોતાનું મધ્યમ નામ બનાવ્યું છે. ઈન્સ્ટાગ્રામ પર તે કિયારા આલિયા અડવાણી તરીકે ઓળખાય છે. નામ બદલવા અંગે કિયારા કહે છે કે તે જ્યોતિષમાં વિશ્વાસ નથી કરતી, તે પોતાની મહેનતના આધારે ઓળખ બનાવવા માંગતી હતી તેથી નામ બદલ્યું છે. કિયારાએ એક ઈન્ટરવ્યુમાં જણાવ્યું હતું કે જ્યારે તે નાની હતી ત્યારે સલમાન ખાન તેની માતાને મળતો હતો અને ઘણીવાર કહેતો હતો કે તે મોટી થઈને સ્ટાર બનશે. કિયારા અડવાણીનું સાચું નામ આલિયા અડવાણી છે, પરંતુ સલમાન ખાનના કહેવા પર તેણે પોતાનું નામ બદલીને કિયારા રાખ્યું હતું, કારણ કે ત્યાં સુધીમાં આલિયા ભટ્ટે બોલિવૂડમાં એન્ટ્રી કરી લીધી હતી. એક જ નામની બે અભિનેત્રીઓને બદલે સલમાને તેને આ નામ આપ્યું હતું.
સિદ્ધાર્થ મલ્હોત્રાને ડેટ કરી રહી છે
કિયારા પોતાની પ્રોફેશનલ લાઈફની સાથે સાથે પર્સનલ લાઈફને લઈને પણ ચર્ચામાં રહે છે. સમાચાર અનુસાર, કિયારા સિદ્ધાર્થ મલ્હોત્રાને ડેટ કરી રહી છે. જો કે બંનેએ હજી સુધી મીડિયાની સામે આ સંબંધનો સ્વીકાર કર્યો નથી, પરંતુ બંને ઘણીવાર લંચ ડેટ પર સાથે જોવા મળે છે.