લગ્ન બાદ કેટરિના કૈફની થશે ધમાકેદાર વાપસી, 'મૈરી ક્રિસમસ'ના સેટ પરથી લીક થઇ એક્ટ્રેસની તસવીર

કેટરિના કૈફે 25 ડિસેમ્બરના રોજ પોતાના કોસ્ટાર વિજય સેતુપતિ અને ડિરેક્ટર શ્રીરામ રાઘવન સાથે તસવીર શેર કરી ફિલ્મની જાહેરાત કરી હતી

મુંબઇઃ બોલિવૂડ એક્ટ્રેસ કેટરિના કૈફ અને વિક્કી કૌશલના લગ્ન બાદ તેના ફેન્સ કેટરિનાને મોટા પડદા પર જોવા માટે ખૂબ ઉત્સુક છે. હાલમાં એક્ટ્રેસ ફિલ્મ ‘મૈરી ક્રિસમસ’ના શૂટિંગમાં વ્યસ્ત છે. સોશિયલ મીડિયા પર કેટરિના કૈફની તસવીરો વાયરલ થઇ રહી છે. તસવીરમાં કેટરિના પોલીસની ભૂમિકામાં નિભાવનારી એક્ટ્રેસ રાધિકા સરથકુમાર સાથે જોઇ શકાય છે. આ તસવીરોમાં કેટરિના પોલ્કા ડોટ ડ્રેસમાં જોવા મળી રહી છે.

લગ્ન બાદ ફરી એકવાર કેટરિના કૈફ પોતાની પ્રોફેશનલ લાઇફમાં વ્યસ્ત થઇ ગઇ છે. કેટરિના કૈફની આ તસવીરો દર્શકોને પસંદ આવી રહી છે. કેટરિના કૈફ પ્રથમવાર સાઉથના સુપરસ્ટાર ગણાતા એક્ટર વિજય સેતુપતિ સાથે ફિલ્મમાં જોવા મળશે.

બોલિવૂડ એક્ટ્રેસ કેટરિના કૈફે 25 ડિસેમ્બરના રોજ પોતાના કોસ્ટાર વિજય સેતુપતિ અને ડિરેક્ટર શ્રીરામ રાઘવન સાથે તસવીર શેર કરી ફિલ્મની જાહેરાત કરી હતી. એક્ટ્રેસે તસવીર શેર કરતા લખ્યું હતું કે નવી ઇનિંગની શરૂઆત...મૈરી ક્રિસમસ માટે ડિરેક્ટર શ્રીરામ રાઘવન સાથે સેટ પર વાપસી, હું હંમેશાથી શ્રીરામ રાઘવન સાથે કામ કરવા માંગતી હતી. આ ફિલ્મમાં એક્ટર વિજય સેતુપતિ સાથે કામ કરવા માટે ખૂબ એક્સાઇટેડ છું.