સોનુ સૂદની બહેન માલવિકા સચર સમાજસેવા કરે છે અને પંજાબના મોગા વિસ્તારમાં તેનું સારું વર્ચસ્વ છે. માલવિકાને પંજાબ વિધાનસભાની ચૂંટણીમાં મોગા વિધાનસભા બેઠકની ટિકિટ જોઈએ છે. આ બેઠક પર નવજોત સિધ્ધુના ખાસ ગણાતા ડો. હરજીત કમલ સિંહ ધારાસભ્ય છે. તેમને કાપવા કેપ્ટન અમરિન્દરસિંહે માલવિકા સચરને આગળ કર્યાં હતાં પણ સિધ્ધુને વાંધો પડતાં માલવિકાની ટિકિટ પાકી નથી થઈ. માલવિકાએ પોતાની ટિકિટ પાકી કરાવવા સોનુના માધ્યમથી આમ આદમી પાર્ટીનો સંપર્ક કરતાં ભાજપ બગડ્યું છે.
તમને જણાવી દઈએ કે લગભગ અઢી મહિના પહેલા મુખ્યમંત્રી કેપ્ટન અમરિંદર સિંહે રસીકરણના બ્રાન્ડ એમ્બેસેડરની જાહેરાત કરવા માટે સોનુ સૂદને ચંદીગઢ બોલાવ્યા હતા. તે સમયે સોનુ સૂદે તેની બહેન માલવિકા સૂદ સચરને મુખ્યમંત્રી કેપ્ટન અમરિંદર સિંહ સાથે પરિચય કરાવ્યો હતો. તે બેઠક બાદ જ શહેરમાં માલવિકા રાજકારણમાં આવવાની અટકળો વધી હતી.
જ્યારે ચંદીગઢથી પરત ફર્યા બાદ માલવિકા સૂદ સચરની પ્રવૃત્તિઓ વધી ત્યારે આ ચર્ચાઓને વધુ બળ મળ્યું હતું. દરમિયાન, અભિનેતા સોનુ સૂદનું ધ્યાન પણ મોગા પર વધુ વધ્યું. સોનુ સૂદે મોગામાં સામાજિક સેવાના કાર્યમાં સક્રિય રહેવા માટે માલવિકા સૂદ સચરના નામનો ત્રણ વખત ઉલ્લેખ કર્યો હતો.
માલવિકા સૂદ પોતે પણ કોંગ્રેસની રાજકીય બેઠકોમાં ભાગ લઈ રહી છે. તાજેતરમાં જ વિધાનસભા સભા સમિતિની બેઠક દરમિયાન પણ તેઓ હાજર રહ્યા હતા. અત્યાર સુધી માલવિકા સૂદ સચર કોંગ્રેસની પ્રાથમિક સભ્ય પણ નથી, પરંતુ એવું માનવામાં આવે છે કે માલવિકા સૂદ પોતે રાજકારણમાં પગ મૂકવા માટે ખૂબ જ ગંભીર દેખાઈ રહી છે.
નોંધનીય છે કે, પંજાબમાં કેપ્ટન અમરિંદર સિંહની સરકાર હાલમાં વિપક્ષ કરતાં કોંગ્રેસના આંતરિક મતભેદોથી વધુ પરેશાન છે. પાર્ટીના પ્રદેશ અધ્યક્ષ નવજોત સિંહ સિદ્ધુએ જે રીતે પોતાની સરકાર સામે મોરચો ખોલ્યો છે, વિપક્ષનું કામ ખૂબ જ સરળ બની રહ્યું છે. શિરોમણી અકાલી દળ અને ભાજપનું ગઠબંધન તૂટી ગયું છે. ભાજપ ત્યાં ચૂંટણીની દિશા પોતાના દમ પર ફેરવી શકે તેવી સ્થિતિમાં હોય તેવું લાગતું નથી. મજબૂત સ્થાનિક નેતૃત્વની ગેરહાજરી અને આંતરિક વિખવાદ છતાં આમ આદમી પાર્ટી પંજાબમાં ખૂબ અસરકારક માનવામાં આવે છે. ખાસ કરીને દિલ્હીના મતદારોને મફત વીજળીનો એવો સ્વાદ આપવામાં આવ્યો છે કે તેઓ હવે પંજાબની ચૂંટણીમાં પણ તેનો સ્વાદ લેવાનું વિચારી રહ્યા છે. તમામ સંજોગોને જોતા, જો અમરિંદર સિંહ પોતાની જ પાર્ટીમાં નબળા પડી જાય, તો પછી તેમને પાર્ટીમાં લાવ્યા વગર, કેજીવાલ સોનુ સૂદનો ઘણો રાજકીય લાભ લેવાનો પ્રયાસ કરી શકે છે, જેની લોકપ્રિયતા હાલમાં 'નિષ્કલંક' દેખાઈ રહી છે.
કેજરીવાલની સાથે સોનુ સૂદના સંબંધ આગળ વધવાને કારણે જ તેના પર ઇનકમ ટેક્સ વિભાગની રેડ પડી હોવાની ચર્ચા ચાલી રહી છે.