મુંબઈઃ દેશમાં કોરોનાનો કેર ફરી વર્તાઈ રહ્યો છે. દેશમાં કોરોનાની ત્રીજી લહેર ચાલુ થઈ ગઈ છે તેના કારણે ઠેર ઠેર કેસો વધી રહ્યા છે. મુંબઈમાં પણ કેસમાં વધારો થયો છે તેથી લોકો મુંબઈથી દૂર રહેવાનું પસંદ કરી રહ્યાં છે. કોમેડિયન ભારતી સિંહે પણ કોરોનાના કારણે મુંબઈથી થોડાં દિવસ દૂર રહેવાનું નક્કી કર્યું છે. ભારતી સિંહ હાલમાં પ્રેગ્નન્ટ છે અને તેણે પોતાની તતા પોતાના બાળકની સલામતી માટે આ પગલું ભર્યું છે. ભારતી પોતાના પતિ હર્ષ લિમ્બાચિયા સાથે મુંબઈથી દૂર આવેલા પોતાના ફાર્મહાઉસમાં રહે છે. ભારતી સિંહે કપિલ શર્મા શો સહિતના કાર્યક્રમોનું શૂટિંગ પણ કામચલાઉ રીતે બંધ કરી દીધું છે.
ભારતીએ ગયા વર્ષે પ્રેગ્નન્ટ હોવાની વાત જાહેર કરી હતી. ભારતી એપ્રિલ, 2022માં પોતાના પહેલાં બાળકને જન્મ આપશે. ભારતીએ પ્રેગ્નન્સીમાં પણ કામ કરવાનું ચાલુ રાખ્યું છે. ભારતીએ કહ્યું હતું કે, પોતે પ્રેગ્નન્સીની તારીખ સુધી કામ કરશે.
ભારતી સિંહે પોતાની યુ ટ્યૂબ ચેનલના પર પોતાના ચાહકોને કહ્યું હતું કે, મુંબઈમાં કોરોનાનું જોખમ ઘણું જ વધી ગયું છે. કોરોનાથી બચવા માટે અમે બધાં ફાર્મહાઉસમાં આવી ગયા છે. ફાર્મહાઉસમાં જ પોતે યુ-ટ્યુબ ચેનલ માટે શૂટિંગ કરશે અને વ્લોગ બનાવશે. આ ઉપરાંત ભારતીએ મજાક કરતાં ફરિયાદના સૂરમાં કહ્યું હતું કે પોતે પ્રેગ્નન્ટ હોવા છતાં હર્ષ તેની પાસે તમામ કામો કરાવે છે. તેને પ્રેગ્નન્ટ મહિલા પર સહેજ પણ દયા આવતી નથી.
વીડિયોમાં ભારતી તથા હર્ષ પોતાના પાલતુ કૂતરતા ગોગો સાથે રમતા જોવા મળ્યા હતા. ભારતીએ સગડી પર રાતનુ ભોજન બનાવ્યું હતું. હર્ષે ચિકન કબાબ બનાવ્યા હતા તો ભારતીએ દાલ મખ્ખની તથા રોટલી બનાવી હતી. ભારતીના ફાર્મ હાઉસમાં સ્વિમિંગ પૂલ પણ છે.
ભારતીએ 2017માં લેખક હર્ષ લિંબાચિયા સાથે લગ્ન કર્યાં હતાં. ભારતી હર્ષથી 7 વર્ષ મોટી છે. 7 વર્ષ ડેટિંગ કર્યા બાદ એકબીજાને પાર્ટનર તરીકે પસંદ કર્યા હતા. હર્ષે ‘પીએમ નરેન્દ્ર મોદી’ બાયોપિકના ડાયલોગ લખ્યા હતા. આ ઉપરાંત ફિલ્મ ‘મલંગ’નો ટાઇટલ ટ્રેક પણ લખ્યો હતો.