Bapu For Gujarat CM: વિધાનસભાની ચુંટણી નજીક આવતાં જ શંકરસિંહ સોશિયલ મીડિયા પર સક્રીય

Bapu For Gujarat CM ફેસૂબક પેજ લગભગ આઠેક મહિના પહેલાં બન્યું છે. જે શંકરસિંહ વાઘેલાનું ફેન પેજ છે. અત્યારે આ પેજ 34,467 લોકોએ લાઇક કર્યું છે, જ્યારે 34,494 લોકો આ પેજ ફોલો કરી રહ્યા છે. આ પેજ પર શંકરસિંહ વાઘેલાને મુખ્યમંત્રી તરીકે પ્રમોટ કરવામાં આવી રહ્યા છે.

ગાંધીનગરઃ કોંગ્રેસના રાષ્ટ્રીય ઉપાધ્યક્ષ રાહુલ ગાંધી ગઈ કાલે મહેસાણા આવ્યા હતા. જ્યાં તેમણે ખેડૂતો અને નોટબંધીનો મુદ્દો ઉઠાવીને નરેન્દ્ર મોદી પર અનેક પ્રહાર કર્યા હતા. આ સાથે જ ગુજરાત વિધાનસભાની ચુંટણીના પડધમ શરૂ થઈ ગયા છે. ત્યારે વિધાનસભામાં વિપક્ષના નેતા શંકરસિંહ વાઘેલાને ગુજરાતના મુખ્યમંત્રી તરીકે પ્રમોટ કરતું Bapu For Gujarat CM નામનું ફેસબૂક પેજ સક્રીય થઈ ગયું છે.

ગત લોક સભાની ચુંટણી પહેલા જે રીતે નરેન્દ્ર મોદીએ પોતાને નેક્સ્ટ વડાપ્રધાન તરીકે પ્રમોટ કર્યા હતા, તે જ રીતે શંકરસિંહ પણ આગળ વધી રહ્યા છે. તેઓ પણ અત્યારથી જ પોતાને ગુજરાતના મુખ્યમંત્રી તરીકે પ્રમોટ કરી રહ્યા છે.

આ પેજ કોણે બનાવ્યું છે, તે સ્પષ્ટ નથી. પણ પેજ પર જે રીતે શંકરસિંહ વાઘેલાને લગતાં લેટેસ્ટ સમાચારો મુકવામાં આવે છે, તે જોતાં આ પેજ શંકરસિંહ વાઘેલાના આશીર્વાદથી બન્યું છે, તે દેખાય છે. આ પેજ પર રાહુલ ગાંધીની સભામાં રાહુલ શંકરસિંહ વિશે શું બોલ્યા તે અંગેની છેલામાં છેલ્લી ક્લિપ પણ મુકેલી છે. આ ઉપરાંત શંકરસિંહની તમામ પ્રેસ કોન્ફરન્સ પણ અહીં લાઇવ મુકવામાં આવેલી છે.