ઉનાઃ પિતાએ મોત સામે લડીને દીકરાનો બચાવ્યો જીવ, જાણો વિગત

ઉના: ગઈ કાલે રાત્રે ગીરગઢા તાલુકાના ધોકડવા ગામે દીપડાએ અલગ અલગ ત્રણ જગ્યા પર લોકો પર હુમલો કર્યો હતો. આ ત્રણેય હુમલામાં લોકોને ઇજાઓ પહોંચી છે. એક હુમલામાં દીપડાએ ચાર વર્ષીય બાળક પર હુમલો કરી દીધો હતો. જોકે, તેના પિતાએ દીપડા સામે મોતનો જંગ ખેલીને તેનો જીવ બચાવી લીધો હતો.

આ અંગેની વિગતો એવી છે કે, ગઈ કાલે રાત્રે બાર વાગ્યાની આસપાસ દીપડો રાજુભાઈ પોતાની પત્ની અને ચાર વર્ષીય બાળક સાથે અગાશી પર સૂતા હતા, ત્યારે ત્યાં દીપડો બાળકને દબોચીને ભાગ્યો હતો. જોકે, રાડારાડ થતાં રાજુભાઈ જાગી ગયા હતા અને તેમણે દીપડા પાછળ દોડીને બાળકને બચાવ્યો હતો. તેમણે દીપડાને પૂછડીથી પકડી રાખ્યો હતો અને બીજા હાથે બાળકને છોડાવવાનો પ્રયાસ ચાલું રાખ્યો હતો.

દીપડા અને રાજુભાઈ વચ્ચે ભારે ખેંચાખેંચી પછી દીપડો અંતે પાછો પડ્યો હતો અને બાળકને મૂકી ભાગી ગયો હતો. ચાર વર્ષીય સંતોષને મોઢાના ભાગે ગંભીર ઇજા થતાં તેને સારવાર માટે જુનાગઢ સિવિલ હોસ્પિટલમાં ખસેડવામાં આવ્યો છે. અન્ય એખ ઘટનામાં દીપડાએ રાજેશભાઈ બાલાભાઈ ચુડાસમાનાં ઘર પર હુમલો કર્યો હતો.

રાજેશભાઈના પત્ની શિલ્પાબેન દોઢ વર્ષીય દીકરી અર્પિતાને સ્તનપાન કરાવતા હતા ત્યારે દીપડાએ અર્પિતા પર હુમલો કરતાં તેને આંખ અને ગળાના ભાગે ગંભીર ઇજા થઈ હતી. જેથી તેને 108 મારફત ઊનાની સરકારી હોસ્પિટલમાં ખસેડવામાં આવી હતી. દીપડાએ અન્ય એક મહિલા મંજુબેન વિરાભાઈ ચુડાસમા(ઉ.વ.55) પર પણ હુમલો કર્યો હતો. જેમને પણ સારવાર માટે ખસેડાયા છે.