છોટાઉદેપુરઃ બોડેલીમાં એક જ પરિવારના 7 બાળકોની નીકળી અંતિમયાત્રા, આખુ ગામ હિબકે ચડ્યું

મળતી જાણકારી અનુસાર, છોટાઉદેપુર જિલ્લાના બોડેલીનો ખત્રી પરિવાર હાલોલમાં પોતાના સંબંધીના ઘરે જમીને રાત્રે પાછો ફરતો હતો તે સમયે ઈન્ડિકા કારનું ટાયર ફાટતા કાર નાળામાં ખાબકી હતી. આ અકસ્માતમાં એક જ પરિવારના પાંચ દિકરા અને બે દિકરીઓના ઘટનાસ્થળે જ મોત થયા હતા. જ્યારે એક બાળકીને ગંભીર ઈજા થતા તેને સારવાર માટે ખસેડવામાં આવી હતી.

છોટાઉદેપુરઃ હાલોલના ભાટ ગામ પાસે થયેલા કાર અકસ્માતમાં એક જ પરિવારના સાત બાળકોના મોતને પગલે બોડેલી ગામમાં શોક ફેલાઇ ગયો હતો. છોટાઉદેપુર જિલ્લાના બોડેલીનો ખત્રી પરિવાર હાલોલમાં પોતાના સંબંધીના ઘરે ગયો હતો ત્યાંથી પાછા ફરતા સમયે ભાટ ગામના પાટીયા નજીક આ ઘટના બની હતી. એક જ ગામના સાત બાળકોના મોતથી ગામમાં ગમગીની છવાઇ ગઇ હતી. ગામમાં નીકળેલી અંતિમયાત્રામાં આખુ ગામ ઉમટી પડ્યું હતું.

ખત્રી પરિવારના ત્રણ ભાઈઓ પૈકી અલ્તાફ હુસૈનના સંતાન મહંમદ સાજીદ અને આશીનાબાનું, મહંમદ સલીમના સંતાન મહંમદ બિલાલ, મહંમદ રઉફ અને મહંમદ તાહિર તેમજ ત્રીજા ભાઈ અને કારચાલક એવા તસ્લિમ આરીફની પુત્રી ગુલ અફરોજ અને પુત્ર મહંમદ યુસુફ મળી સાત બાળકોનું ઘટના સ્થળે જ દુઃખદ મૃત્યુ નીપજ્યું હતું. જ્યારે બે બાળકીઓ ગંભીર રીતે ઈજાગ્રસ્ત થતાં સારવાર અર્થે ખસેડાયા હતા.