Ahmedabad Air Pollution: દેશની સાથે સાથે ગુજરાતના વાતાવરણમાં પણ મોટા ફેરફારો જોવા મળી રહ્યાં છે, છેલ્લા બે-ત્રણ દિવસથી ગુજરાતમાં ખાસ કરીને અમદાવાદમાં પ્રદુષણનું સ્તર ખુબ જ ઝડપથી વધ્યુ છે. વહેલી સવારથી જ અમદાવાદમાં એર ક્વૉલિટી ઇન્ડેક્સ 225ને પાર પહોંચી જતા લોકોના સ્વાસ્થ્ય પર ખતરો ઉભો થયો છે. માનવામાં આવી રહ્યું છે કે, ઇથોપિયાના જ્વાળામુખીના ગુબાર અને પ્રદુષણના કારણે અમદાવાદની હવા ઝેરી બની રહી છે અને લોકોને શ્વાસ લેવામાં તકલીફો પડી રહી છે.
અમદાવાદની હવા બની વધુ ઝેરીલી બની છે. અમદાવાદના અનેક વિસ્તારોમાં હવાનું પ્રદૂષણ ગંભીર સ્તરે પહોંચ્યું છે.અનેક વિસ્તારમાં એર ક્વોલિટી ઈન્ડેક્સ 225ને પાર પહોંચ્યો છે. તાજા અપડેટ પ્રમાણે, આજે અમદાવાદમાં પ્રદુષણનું સ્તર સતત વધેલું જોવા મળ્યુ છે. અમદાવાદના મોટા ભાગના વિસ્તારોમાં AQI 225ને પાર પહોંચી ગયો છે, જેમાં ખાસ કરીને બોડકદેવ, ચાંદખેડા, સીપીનગર, ઘૂમા, ગ્યાસપુર, કઠવાડા, મણીનગરમાં AQI 225ને પાર પહોંચ્યો છે. શહેરમાં વહેલી સવારથી જ ધૂમ્મસભર્યું છવાયેલુ છે, જેના કારણે લોકોને શ્વાસ લેવામાં તકલીફો પડી રહી છે અને વાહનચાલકોને પણ લૉ વિઝિબિલીટીનો સામનો કરવો પડી રહ્યો છે.
ગુજરાતના આ શહેરોમાં 'રેડ એલર્ટ' જેવી સ્થિતિ
રાજ્યમાં વધતા પ્રદૂષણે નાગરિકોની ચિંતા વધારી દીધી છે. ઔદ્યોગિક એકમો અને સતત વધતા વાહનોને કારણે રાજ્યના 8 જેટલા મુખ્ય શહેરોનો એર ક્વોલીટી ઇન્ડેક્સ જોખમી સપાટીએ પહોંચ્યો છે. સૌથી પ્રદૂષિત શહેરો: રાજ્યમાં સૌથી ખરાબ હવા દક્ષિણ ગુજરાતના ચીખલીમાં નોંધાઈ છે, જ્યાં AQI 227 પર પહોંચ્યો છે. તેના પછી સંઘપ્રદેશ દમણનો ક્રમ આવે છે, જ્યાં આંકડો 213 નોંધાયો છે. અમદાવાદ અને અંકલેશ્વર: મેગા સિટી અમદાવાદમાં પણ હવાની ગુણવત્તા બગડી છે અને અહીં AQI 195 પર પહોંચ્યો છે. રસાયણ નગરી ગણાતા ભરૂચના અંકલેશ્વરમાં પણ પ્રદૂષણનું સ્તર 195 ને પાર કરી ગયું છે, જે અત્યંત ચિંતાજનક છે. ભાવનગર: સૌરાષ્ટ્રના ભાવનગરમાં પણ પ્રદૂષણનો ગ્રાફ ઉપર ગયો છે, જ્યાં AQI 172 નોંધવામાં આવ્યો છે.