અમદાવાદ: ગુજરાતના અનેક શહેરમાં રખડતા ઢોરનો ત્રાસ દિવસેને દિવસે વધી રહ્યો છે. રખડતા ઢોરોના કારણે અનેક લોકોએ જીવ ગુમાવવાનો વારો આવ્યો છે. જેને લઈને લોકોમાં રોષ જોવા મળી રહ્યો છે. હવે આ મામલે અમદાવાદ પોલીસ કમિશનર દ્વારા જાહેરનામું બહાર પાડવામાં આવ્યું છે. આગામી 60 દિવસમાં RFID પ્રક્રિયા પૂર્ણ કરવા પશુમાલિકોને આદેશ કરવામાં આવ્યો છે. આ ઉપરાંત ગુજરાત હાઇકોર્ટની આસપાસના વિસ્તારને નો કેટલ ઝોન જાહેર કરવામાં આવ્યો છે. પોતાના પશુઓ અંગેની તમામ માહિતી AMCના CNCD વિભાગને સોંપવા પોલીસ કમિશનરે આદેશ કર્યો છે. ગુજરાત હાઇકોર્ટ આસપાસમાં રખડતા પશુઓ જોવા મળશે તો માલિકો સામે કડક સજા કરવા પણ ઉલ્લેખ કરવામાં આવ્યો છે.
અમરેલીમાં ઝૂંપડામાં સૂતેલા વૃદ્ધાને દીપડાએ ફાડી ખાતા ચકચાર
અમરેલી: સાવરકુંડલા તાલુકાના જાબાળ ગામે દીપડાએ એક વૃદ્ધ મહિલાને ફાડી ખાધી હતી. બે દિવસ પહેલા ઝૂંપડામાં સૂતેલ વૃદ્ધ મહિલા ઉપર ખૂખાર દીપડાએ હુમલો કરતા મહિલા મોતને ભેટી હતી. જો કે, અન્ય કોઈ લોકોને દીપડો હુમલો ન કરે તે માટે વન વિભાગે તાત્કાલિક ધોરણે દીપડાને પકડવા કવાયત હાથ ધરી હતી. વન વિભાગ દ્વારા જુદી જુદી જગ્યાએ ખુંખાર દીપડાને પકડવા પાંજરા મુકવામાં આવ્યા હતા. ગઈ રાત્રે માનવ ભક્ષી દીપડાને વન વિભાગ દ્વારા પકડી પાડવામાં આવ્યો.. હાલ આ દીપડાને જસાધાર એનિમલ કેર ખાતે લઈ જવામાં આવ્યો છે. દીપડો પકડાઈ જતા લોકોએ રાહતનો શ્વાસ લીધો છે.
કચ્છ જિલ્લામાં મેઘરાજા મહેરબાન
ગાંધીનગરઃ ગુજરાતમા સૌરાષ્ટ્ર, કચ્છ અને દક્ષિણ ગુજરાતમાં ધોધમાર વરસાદ વરસી રહ્યો છે. છેલ્લા 24 કલાકમાં રાજ્યના 215 તાલુકામાં વરસાદ વરસ્યો છે. ખાસ કરીને કચ્છ જિલ્લામાં મેઘરાજા મહેરબાન થયા હતા. નખત્રાણા, લખપત, અબડાસા તાલુકામાં વરસાદનું ઝોર વધ્યું છે. કચ્છમાં ગઈકાલથી આજ વહેલી સવાર સુધીમાં 8 ઈંચ વરસાદ પડી ચૂક્યો છે. લખપતમાં 11 ઇંચ વરસાદ ખાબક્યો હતો. તે સિવાય કચ્છના નખત્રાણામાં સાત ઇંચ વરસાદ ખાબક્યો હતો. અબડાસાના કાંઠાળ વિસ્તારમાં ભારે વરસાદના કારણે સ્થાનિક નદી નાળા છલકાયા અને ડેમ તેમજ તળાવોમાં પણ જળસ્તર વધ્યું છે.
ભૂજમાં 2 ઈંચ, નખત્રાણામાં 6 ઈંચ, નલિયામાં 3 ઈંચ, અબડાસામાં 2થી 7 ઈંચ, મુંદ્રામાં સાડા 3 ઈંચ, ગાંધીધામમાં દોઢ ઈંચ અને ભચાઉમાં અડધો ઈંચ વરસાદ પડ્યો હતો. નખત્રાણા તાલુકાના કોટડા જડોદર, ઉખેડા, રસલિયા, ખોંભડી, મથલ, ટોડિયા, કાદિયા, વ્યાર, જાડાય, આમારા, નારણપર, બેરૂ, મોસુણા, ગંગોણ, વિભાપર, ભીટારા સહિતના ગામોમાં 24 કલાકમાં 4થી 8 ઈંચ વરસાદ પડ્યો હતો. જ્યારે નાગલપર, અંગિયા, વિથોણ, દેવપર યક્ષ, આણંદપર, સાયરા, મોરગર, પલીવાડ, મંજલ સહિતના ગામોમાં 6 ઈંચ વરસાદ પડ્યો હતો. ભારે વરસાદના કારણે ભુજ-નખત્રાણા હાઈવે પર આવેલો પાલરધુના ધોધ સોળે કળાએ ખીલ્યો હતો.
છેલ્લા 24 કલાકમાં રાજ્યના 215 તાલુકામાં વરસાદ
ગુજરાતના મોટાભાગના વિસ્તારોમાં વરસાદ વરસી રહ્યો છે. છેલ્લા 24 કલાકમાં રાજ્યના 215 તાલુકામાં વરસાદ વરસ્યો હતો. તેમાં સૌથી વધુ લખપતમાં 11 ઈંચ અને વલસાડના કપરાડામાં નવ ઈંચ વરસાદ વરસ્યો હતો. રાજ્યમાં અત્યાર સુધીના સિઝનનો સરેરાશ 27.69 ટકા સુધી વરસાદ વરસ્યો હતો. રાજ્યના 12 તાલુકામાં 0 થી બે ઇંચ સુધીનો વરસાદ વરસ્યો હતો. રાજ્યના 69 તાલુકામાં બેથી પાંચ ઇંચ સુધીનો વરસાદ વરસ્યો હતો. રાજ્યના 88 તાલુકામાં સિઝનનો પાંચથી 10 ઇંચ સુધીનો વરસાદ વરસ્યો હતો. ઉપરાંત કચ્છ જિલ્લામાં અત્યાર સુધીમાં સરેરાશ 51.84 ટકા વરસાદ વરસ્યો હતો.