Jagadish Vishwakarma: જગદીશ વિશ્વકર્મા બન્યા ગુજરાત ભાજપના નવા પ્રદેશ પ્રમુખ, મુખ્યમંત્રીએ પાઠવી શુભેચ્છા

Jagadish Vishwakarma: આજે જગદીશ વિશ્વકર્મા ગુજરાત ભાજપના નવા પ્રદેશ પ્રમુખ તરીકે કમલમ (ભાજપ કાર્યાલય) ખાતે પદગ્રહણ કરવા જઈ રહ્યા છે. તેમની સાથે જોડાયેલી તમામ અપડેટ તમને અહીં મળશે.

બ્રેકગ્રાઉન્ડ

Jagadish Vishwakarma: આજે જગદીશ વિશ્વકર્મા ગુજરાત ભાજપના નવા પ્રદેશ પ્રમુખ તરીકે કમલમ (ભાજપ કાર્યાલય) ખાતે પદગ્રહણ કરવા જઈ રહ્યા છે. આજે સવારે 10 વાગ્યે આ અંગેની ઔપચારિક જાહેરાત કરવામાં આવશે. આ સમારોહમાં પ્રભારી ભૂપેન્દ્ર યાદવ અને ચૂંટણી અધિકારી કે. લક્ષ્મણ ઉપસ્થિત રહેશે. તેમની સાથે પૂર્વ પ્રદેશ પ્રમુખ સી.આર. પાટીલ અને મુખ્યમંત્રી ભૂપેન્દ્ર પટેલ પણ હાજર રહેશે. જગદીશ વિશ્વકર્મા તેમના નિવાસસ્થાનેથી રેલી સ્વરૂપે કમલમ જવા રવાના થશે. આ પદગ્રહણ સમારોહમાં ભાજપના સાંસદો અને ધારાસભ્યો પણ મોટી સંખ્યામાં હાજર રહે તેવી શક્યતા છે.

04/10/2025 12:06:55

જગદીશ વિશ્વકર્મા બન્યા ગુજરાત ભાજપના નવા પ્રદેશ પ્રમુખ

ગુજરાત ભાજપના નવા પ્રદેશ પ્રમુખ તરીકે જગદીશ વિશ્વકર્માની સત્તાવાર વરણી કરવામાં આવી છે. આ પ્રસંગે આયોજિત સમારોહમાં મુખ્યમંત્રી ભૂપેન્દ્ર પટેલે તેમને શ્રીફળ અર્પણ કર્યું હતું, જ્યારે પૂર્વ પ્રમુખ સી.આર. પાટીલે જગદીશ વિશ્વકર્માને ભાજપનો ઝંડો સુપરત કર્યો હતો. નવનિયુક્ત પ્રદેશ પ્રમુખનું ફૂલહાર પહેરાવીને સ્વાગત કરવામાં આવ્યું હતું. મુખ્યમંત્રી ભૂપેન્દ્ર પટેલે જગદીશ વિશ્વકર્માને શુભેચ્છાઓ પાઠવતા જણાવ્યું હતું કે ભાજપ હંમેશા સરકાર અને સંગઠનના તાલમેલથી આગળ વધે છે, અને દરેકને સાથે લઈને ચાલવું એ જ વડાપ્રધાન નરેન્દ્ર મોદીનો મંત્ર છે.

Continues below advertisement

04/10/2025 11:43:25

પૂર્વ પ્રદેશ પ્રમુખ સીઆર પાટીલનું નિવેદન

ગુજરાત પ્રદેશ ભાજપના પૂર્વ પ્રમુખ સી.આર. પાટીલે તેમના કાર્યકાળની સફળતાઓ અને પડકારો અંગે નિવેદન આપ્યું હતું. તેમણે જણાવ્યું હતું કે સવા પાંચ વર્ષ પહેલાં તેમને પ્રદેશ ભાજપની જે જવાબદારી સોંપવામાં આવી હતી, તે તમામ કાર્યકરોના સાથ-સહકારથી તેમણે સફળતાપૂર્વક નિભાવી.

કાર્યકાળની સિદ્ધિઓ:

• તેમના નેતૃત્વમાં ભાજપ 2022ની વિધાનસભા ચૂંટણીમાં 156 બેઠકો જીતવામાં સફળ રહ્યું.


• લોકસભાની ચૂંટણીમાં પણ 26માંથી 25 બેઠકો જીતી.


• 2022ની વિધાનસભા ચૂંટણીમાં પક્ષને 2 કરોડથી વધુની લીડ મળી હતી.


• વિધાનસભાની તમામ પેટાચૂંટણીઓ અને તમામ 31 જિલ્લા પંચાયતો પર ભાજપે વિજય મેળવ્યો.

04/10/2025 11:25:46

જગદીશ વિશ્વકર્માના નામની સત્તાવાર જાહેરાત

ગુજરાત ભાજપના નવા પ્રદેશ પ્રમુખ તરીકે જગદીશ વિશ્વકર્માના નામની સત્તાવાર જાહેરાત કરવામાં આવી છે. પ્રદેશ ભાજપ કાર્યાલય ખાતે યોજાયેલા કાર્યક્રમમાં પ્રભારી ભૂપેન્દ્ર યાદવે આ નામની ઔપચારિક જાહેરાત કરી હતી. આ મહત્વપૂર્ણ ઘોષણા સમયે ગુજરાતના મુખ્યમંત્રી ભૂપેન્દ્ર પટેલ અને પૂર્વ પ્રદેશ પ્રમુખ સી.આર. પાટીલ પણ ઉપસ્થિત રહ્યા હતા.

Continues below advertisement

04/10/2025 10:51:27

જગદીશ વિશ્વકર્માનું કમલમ ખાતે ભવ્ય સ્વાગત

જગદીશ વિશ્વકર્મા પદગ્રહણ સમારોહ માટે પ્રદેશ કાર્યાલય પહોંચ્યા છે, જ્યાં તેમનું ભવ્ય સ્વાગત કરવામાં આવ્યું. સમારોહ દરમિયાન ગુજરાત ભાજપના અનેક મહત્ત્વપૂર્ણ સાંસદો અને આગેવાનો ઉપસ્થિત રહ્યા. અમદાવાદ પૂર્વના સાંસદ હસમુખ પટેલ, પાટણના સાંસદ ભરતસિંહ ડાભી અને કચ્છના સાંસદ વિનોદ ચાવડા પણ વિશેષ હાજરી નોંધાવી. કૃષિ મંત્રી રાઘવજી પટેલ અને ભરત બોઘરાએ પણ કાર્યક્રમમાં હાજરી આપી હતી. 

04/10/2025 10:14:58

થોડીવારમાં કમલમ પહોંચશે જગદીશ વિશ્વકર્મા

ગુજરાત ભાજપના નવા પ્રદેશ પ્રમુખ જગદીશ વિશ્વકર્મા આજે ગાંધીનગરના કમલમ (પ્રદેશ કાર્યાલય) ખાતે પદગ્રહણ કરવા જઈ રહ્યા છે. તેઓ મોટી સંખ્યામાં ભાજપના કાર્યકરો સાથે રેલી સ્વરૂપે કમલમ પહોંચી રહ્યા છે. આ પદગ્રહણ સમારોહમાં વર્તમાન મુખ્યમંત્રી ભૂપેન્દ્ર પટેલ અને પૂર્વ પ્રદેશ પ્રમુખ સી.આર. પાટીલ ખાસ ઉપસ્થિત રહેશે. આ ઉપરાંત, ગુજરાત ભાજપના પ્રભારી ભૂપેન્દ્ર યાદવ અને ચૂંટણી અધિકારી કે. લક્ષ્મણ પણ હાજર રહેશે. આ પ્રસંગે અમદાવાદ ભાજપના ધારાસભ્યો સહિત મોટી સંખ્યામાં પક્ષના સાંસદો અને કાર્યકરો રેલીમાં ઉમટી પડ્યા છે. ધારાસભ્યો અમિત શાહ, અમિત ઠાકર, પાયલ કુકરાણી અને કૌશિક જૈન સહિતના નેતાઓએ જગદીશ વિશ્વકર્માને શુભેચ્છાઓ પાઠવી હતી.

04/10/2025 10:01:11

જગદીશ વિશ્વકર્માએ કમલમ પહોંચતા પહેલા કેમ્પ હનુમાન મંદિર ખાતે કર્યા દર્શન

04/10/2025 08:39:19

સીઆર પાટીલે જગદીશ પંચાલનું મોઢું મીઠું કરાવ્યું

સીઆર પાટીલે જગદીશ પંચાલનું મોઢું મીઠું કરાવ્યું હતું.

 

04/10/2025 08:38:23

તેમના નિવાસસ્થાને ભવ્ય સ્વાગત અને સન્માન

ગુજરાત ભાજપના નવા પ્રદેશ પ્રમુખ જગદીશ વિશ્વકર્માનું તેમના નિવાસસ્થાને ભવ્ય સ્વાગત કરવામાં આવ્યું હતું. તેમને અભિનંદન આપવા માટે મોટી સંખ્યામાં કાર્યકરો ઉમટી પડ્યા હતા. શહેર ભાજપના હોદ્દેદારો અને કાર્યકરોએ સાલ ઓઢાડીને તેમનું સન્માન કર્યું હતું. આ પ્રસંગે અમદાવાદના ધારાસભ્ય અમિત શાહ અને અમિત ઠાકર પણ જગદીશ વિશ્વકર્માના નિવાસસ્થાને પહોંચ્યા હતા. આ ઉપરાંત, ધારાસભ્ય કૌશિક જૈન અને ધારાસભ્ય પાયલ કુકરાણી પણ તેમને શુભેચ્છા આપવા તેમના નિવાસસ્થાને પહોંચ્યા હતા, જ્યાં મોટી સંખ્યામાં કાર્યકરોનો પ્રવાહ જોવા મળ્યો હતો.

04/10/2025 08:38:04

ગુજરાતની રાજનીતિમાં OBC નેતાઓનો દબદબો

ગુજરાતની રાજનીતિમાં હવે ઓબીસી (OBC) નેતાઓનું પ્રભુત્વ સ્પષ્ટપણે દેખાઈ રહ્યું છે. રાજ્યના ત્રણેય મુખ્ય રાજકીય પક્ષો  ભાજપ, કૉંગ્રેસ અને આમ આદમી પાર્ટી (AAP)એ પોતાનું પ્રદેશ નેતૃત્વ ઓબીસી નેતાઓને સોંપ્યું છે, જે દર્શાવે છે કે રાજ્યની રાજનીતિ હવે ઓબીસી તરફ ઝુકી રહી છે.

• આપ (AAP): ઈસુદાન ગઢવી


• કૉંગ્રેસ: શક્તિસિંહ ગોહિલ (પૂર્વે જગદીશ ઠાકોર) / પૂર્વે અમિત ચાવડા


• ભાજપ (BJP): જગદીશ વિશ્વકર્મા

રાજ્યની મોટાભાગની વિધાનસભા બેઠકો પર ઓબીસી મતદારોનું પ્રભુત્વ છે. ગુજરાતમાં 50 ટકા કરતાં પણ વધુ મતદારો ઓબીસી સમુદાયના છે, જેના કારણે ત્રણેય પક્ષોએ ઓબીસી નેતૃત્વ પર ભરોસો મૂક્યો છે.

04/10/2025 08:37:34

દિવાળી પહેલા થઈ શકે છે રાજ્ય મંત્રીમંડળનું વિસ્તરણ

ગુજરાતના રાજકારણને લઈને હાલમાં મહત્વના સમાચાર સામે આવી રહ્યા છે. એક તરફ ગુજરાત બીજેપીને નવા પ્રદેશ અધ્યક્ષ મળવા જઈ રહ્યા છે તો બીજી તરફ એવી પણ માહિતી સામે આવી છે કે, દિવાળી પહેલા રાજ્ય મંત્રીમંડળનું વિસ્તરણ નક્કી છે. જો કે, આ વિસ્તરણમાં કેટલાક નેતાઓને આંચકો લાગી શકે છે. એબીપી અસ્મિતાની EXCLUSIVE જાણકારી મુજબ, દિવાળીના તહેવાર પહેલા રાજ્ય મંત્રીમંડળનું વિસ્તરણ નિશ્ચિત છે. શરદ પૂનમથી દિવાળી સુધીના સમયગાળામાં ગમે ત્યારે મંત્રીમંડળનું વિસ્તરણ થઈ શકે છે.

04/10/2025 08:36:54

મુખ્યમંત્રી ભુપેન્દ્ર પટેલ સાથે પણ કર્યું છે કામ

તમને જણાવી દઈએ કે, મુખ્યમંત્રી ભુપેન્દ્ર પટેલ અને મંત્રી જગદીશ વિશ્વકર્મા ભૂતકાળમાં સાથે કામ કરી ચૂક્યા છે. જગદીશ વિશ્વકર્મા અમદાવાદ ભાજપ પ્રમુખ હતા ત્યારે ભૂપેન્દ્ર પટેલ સ્ટેન્ડિંગ કમિટીના ચેરમેન હતા. બંનેએ અમદાવાદ મહાપાલિકાની ચૂંટણીમાં ભાજપને જ્વલંત સફળતા આપવી હતી. હવે બંને રાજ્યક્ષાની જોડી તરીકે કામગીરી કરશે.

04/10/2025 08:36:25

અમદાવાદના સૌથી ધનિક ધારાસભ્ય

નોધનિય છે કે, નિકોલ બેઠકના બીજેપીના ધારાસભ્ય જગદીશ વિશ્વકર્માએ ગત ચૂંટણીમાં તેમના સોગંદનામામાં 29 કરોડ રૂપિયાથી વધુની સંપત્તિ જાહેર કરી હતી. આ આંકડો તેમને અમદાવાદના સૌથી ધનિક ધારાસભ્ય બનાવે છે. જો આપણે તેમના વ્યવસાય અંગે વાત કરીએ તો,તેઓ  ટેક્સટાઇલ મશીનરી મેન્યુફેક્ચરિંગ, ડેવલપર્સ અને ઇન્ફ્રા માર્કેટિંગ સાથે જોડાયેલા છે. તેમના શિક્ષણ અંગે વાત કરીએ તો તેમણે BA અને MBA ઇન માર્કેટીંગનો અભ્યાસ કરેલો છે અને તેમને રિડીંગ, સ્વિમિંગ,બેડમિન્ટન અને સમાજ સેવાનો શોખ છે.

04/10/2025 08:36:00

કોણ છે જગદીશ વિશ્વકર્મા ?

જગદીશ વિશ્વકર્મા (પંચાલ)  બીજેપીના કદાવર નેતા છે.  જગદીશ વિશ્વકર્માનો જન્મ 12 ઓગસ્ટ, 1973ના રોજ અમદાવાદ ખાતે થયો હતો. તેઓ વર્ષ 2012માં અમદાવાદ શહેરના નિકોલ વિસ્તારમાંથી ધારાસભ્ય તરીકે ચૂંટાયા હતા. ત્યાર બાદ વર્ષ 2017માં ફરી તેઓ નિકોલ વિસ્તારમાંથી ધારાસભ્ય બન્યા હતા. હાલમાં જેઓ વર્તમાનમાં રાજ્ય સરકારમાં રાજ્યકક્ષાના મંત્રી (Minister of State) તરીકે સેવા આપી રહ્યા છે. તેઓ મુખ્યમંત્રી ભૂપેન્દ્ર પટેલના મંત્રીમંડળમાં સહકાર (Co-operation), લઘુ, સૂક્ષ્મ અને મધ્યમ ઉદ્યોગો (MSME), કુટીર, ખાદી અને ગ્રામીણ ઉદ્યોગ (Cottage, Khadi and Rural Industries), અને નાગરિક ઉડ્ડયન (Civil Aviation) જેવા મહત્ત્વના વિભાગોનો સ્વતંત્ર હવાલો સંભાળે છે. રાજકીય કારકિર્દીની વાત કરીએ તો, તેઓ નિકોલ વિધાનસભા મતવિસ્તાર (અમદાવાદ) માંથી ભારતીય જનતા પાર્ટી (BJP) ના ધારાસભ્ય (MLA) છે અને તેમણે ભૂતકાળમાં અમદાવાદ શહેર ભાજપ પ્રમુખ તરીકે પણ સંગઠનમાં યોગદાન આપેલું છે.