Terrorist Attack: બુધવારે (12 જૂન) જમ્મુના ડોડા જિલ્લાના ગંડોહ વિસ્તારમાં આતંકવાદીઓએ એક પોલીસકર્મી પર ગોળીબાર કર્યો હતો. ફાયરિંગની આ ઘટનામાં એક પોલીસકર્મી ઘાયલ થયો છે. આ ઘટનાને અંજામ આપ્યા બાદ આતંકીઓ સ્થળ પરથી ફરાર થઈ ગયા હતા. જો કે આ વિસ્તારમાં સર્ચ ઓપરેશન ચાલુ છે.
નોંધનીય છે કે, છેલ્લા ચાર દિવસમાં જમ્મુ ડિવિઝનમાં સુરક્ષાદળો અને આતંકવાદીઓ વચ્ચે ચાર એન્કાઉન્ટર થયા છે. જમ્મુ પોલીસના જણાવ્યા અનુસાર, બુધવારે સાંજે લગભગ 8:20 વાગ્યે ડોડા જિલ્લાના ગંડોહ વિસ્તારના કોટા ટોપમાં સુરક્ષા દળો અને આતંકવાદીઓ વચ્ચે અથડામણ થઈ હતી. આ એન્કાઉન્ટરમાં એક કોન્સ્ટેબલ ફરીદ અહેમદ ઘાયલ થયો છે. આ વિસ્તારમાં સુરક્ષાદળો અને આતંકવાદીઓ વચ્ચે થોડો સમય ગોળીબાર થયો હતો અને હવે સુરક્ષા જવાનોએ સમગ્ર વિસ્તારને ઘેરી લીધો છે.
ડોડા જિલ્લામાં 24 કલાકમાં બીજી આતંકી ઘટના
અધિકારીઓએ જણાવ્યું કે સાંજે લગભગ 7.41 વાગ્યે ભાલેસાના કોટા ટોપ વિસ્તારમાંથી ગોળીબારના સમાચાર મળ્યા, જેના પર સુરક્ષા દળોએ જવાબી કાર્યવાહી કરી. છેલ્લા અહેવાલ મળ્યા ત્યાં સુધી બંને પક્ષો વચ્ચે ગોળીબાર ચાલુ હતો.
તેમણે કહ્યું કે ઘેરાબંધી મજબૂત કરવા માટે વધારાના દળોને વિસ્તારમાં મોકલવામાં આવ્યા છે. છેલ્લા 24 કલાકમાં ડોડામાં આતંકવાદ સંબંધિત આ બીજી અને જમ્મુ-કાશ્મીરમાં ત્રણ દિવસમાં ચોથી ઘટના છે. આ પહેલા 11 જૂનની સાંજે છત્તરગલ્લા પાસ પર આતંકવાદી હુમલામાં રાષ્ટ્રીય રાઈફલ્સના પાંચ જવાનો અને એક વિશેષ પોલીસ અધિકારી ઘાયલ થયા હતા.
9 જૂન પછી ચોથી આતંકવાદી ઘટના
દરમિયાન, 11 જૂનની મોડી રાત્રે અન્ય એક ઘટનામાં, કઠુઆ જિલ્લામાં સુરક્ષા દળો દ્વારા એક શંકાસ્પદ પાકિસ્તાની આતંકવાદી માર્યો ગયો હતો. 12 જૂને રાત્રે ચાલેલી અથડામણનો અંત આવ્યો હતો જ્યારે અન્ય એક આતંકવાદી પણ માર્યા ગયા હતા, પરંતુ આ ઓપરેશનમાં CRPFનો એક જવાન શહીદ થયો હતો.
9 જૂનના રોજ, આતંકવાદીઓએ યાત્રાળુઓને લઈ જતી બસ પર હુમલો કર્યો હતો, જેના કારણે તે રસ્તા પરથી ઉતરી ગઈ હતી અને રિયાસીમાં ઊંડી ખીણમાં પડી હતી, જેમાં 9 લોકો માર્યા ગયા હતા અને 41 ઘાયલ થયા હતા. રિયાસી જિલ્લામાં પેસેન્જર બસ પર આતંકવાદી હુમલાના કિસ્સામાં, જમ્મુ અને કાશ્મીર પોલીસે આ ઘટનામાં સામેલ આતંકવાદીનો સ્કેચ જાહેર કર્યો અને તેના વિશે માહિતી આપનારને 20 લાખ રૂપિયાનું ઈનામ આપવાની જાહેરાત કરી છે.