8th Pay Commission latest news: કેન્દ્ર સરકારના કર્મચારીઓ અને પેન્શનરો માટે હાલમાં 8મું પગાર પંચ (8th Pay Commission) સૌથી મોટો ચર્ચાનો વિષય બન્યું છે. સોશિયલ મીડિયા પર દરરોજ પગાર વધારાને લઈને અવનવા દાવાઓ અને અફવાઓ સામે આવી રહી છે. આ દરમિયાન, રેલવે કર્મચારીઓના એક અગ્રણી ટ્રેડ યુનિયન પ્રતિનિધિના ઇન્ટરવ્યુ બાદ લેવલ-1 કર્મચારીઓનો પગાર, હાઉસ રેન્ટ એલાઉન્સ (HRA), પેન્શન, MACP અને પ્રમોશનના નિયમોને લઈને નવી ચર્ચાઓએ જોર પકડ્યું છે. જોકે, કર્મચારીઓએ ખાસ ધ્યાન રાખવું જરૂરી છે કે આ તમામ વિગતો કર્મચારી સંગઠનો દ્વારા મૂકવામાં આવેલી માત્ર માંગણીઓ અને સૂચનો છે, જેના પર સરકાર કે પગાર પંચ દ્વારા હજુ સુધી કોઈ પણ પ્રકારનો અંતિમ કે સત્તાવાર નિર્ણય લેવામાં આવ્યો નથી.
સામાન્ય રીતે એવું જોવા મળ્યું છે કે જ્યારે પણ નવું પગાર પંચ લાગુ થાય છે, ત્યારે એન્ટ્રી લેવલ એટલે કે લેવલ-1 ના નીચલા સ્તરના કર્મચારીઓને પ્રમાણમાં વધુ ફાયદો થતો હોય છે. આ વખતે પણ ટ્રેડ યુનિયનોની મુખ્ય દલીલ એ છે કે ઉચ્ચ અને નીચલા પગાર ધોરણ વચ્ચેનો તફાવત સમય જતાં ઘણો વધી ગયો છે. તેથી, 8મા પગાર પંચે લઘુત્તમ પગારમાં મોટો વધારો કરીને આ ગુણોત્તર (રેશિયો) ઘટાડવો જોઈએ, જેથી નીચલા સ્તરના કર્મચારીઓને મોંઘવારીની સામે આર્થિક રાહત મળી શકે.
આ સિવાય કર્મચારીઓના જીવન નિર્વાહના વધતા ખર્ચને ધ્યાનમાં રાખીને હાઉસ રેન્ટ એલાઉન્સ (HRA) માં પણ ફેરફાર કરવાની માંગ ઉઠી છે. યુનિયનોનું સૂચન છે કે સરકારી આવાસના ભાડા અને HRA વચ્ચે યોગ્ય સંતુલન હોવું જોઈએ અને તેને ફુગાવા (મોંઘવારી) ના દર સાથે લિંક કરવું જોઈએ. બીજી તરફ, મોડિફાઇડ એશ્યોર્ડ કરિયર પ્રોગ્રેસન (MACP) અંતર્ગત લાંબા સમય સુધી એક જ પગાર ધોરણ પર અટકી રહેલા કર્મચારીઓને ઉચ્ચ નાણાકીય અપગ્રેડેશન અને પ્રમોશન સાથે મોટો પગાર વધારો આપવાની પણ રજૂઆત કરવામાં આવી છે.
આ પણ વાંચોઃ 8મું પગાર પંચ: 1947 થી અત્યાર સુધી ક્યારે કેટલો વધ્યો લઘુત્તમ પગાર? જુઓ આંકડા
પેન્શનના મોરચે, ટ્રેડ યુનિયનોએ જૂની પેન્શન યોજના (OPS) ને સામાજિક સુરક્ષાનું મજબૂત માધ્યમ ગણાવીને તેનું જોરદાર સમર્થન કર્યું છે, તેમજ નવી લાવવામાં આવેલી UPS અને NPS ની સમીક્ષા કરવાની માંગ કરી છે. પેન્શનરોને વધુ તબીબી સુવિધાઓ અને કમ્યુટેડ પેન્શન પુનઃસ્થાપિત કરવાના નિયમો પર ફરી વિચાર કરવા જણાવાયું છે. કરિયર પ્રોગ્રેસનની વાત કરીએ તો, સંગઠનો ઇચ્છે છે કે કર્મચારીઓને તેમની આખી સર્વિસ દરમિયાન ઓછામાં ઓછી 5 પ્રમોશનની તકો તો મળવી જ જોઈએ.
જોકે, આ બધી માંગણીઓ વચ્ચે કેન્દ્ર સરકારનું સત્તાવાર વલણ એકદમ સ્પષ્ટ છે. સરકારે 8મા પગાર પંચની રચનાની જાહેરાત ચોક્કસ કરી દીધી છે, પરંતુ કમિશને હજુ સુધી કોઈ અંતિમ ભલામણો જાહેર કરી નથી. ફિટમેન્ટ ફેક્ટર, પગારનું નવું માળખું કે પેન્શન અંગે કોઈ ઓફિશિયલ મહોર લાગી નથી. તેથી, સરકારી કર્મચારીઓએ સોશિયલ મીડિયાના ભ્રામક દાવાઓથી દૂર રહેવું જોઈએ અને પગાર પંચના સત્તાવાર અહેવાલની રાહ જોવી જોઈએ.
આ પણ વાંચોઃ ૮મું પગાર પંચ: લઘુત્તમ પગાર ₹18,000 થી વધીને ₹72,000 થશે? સરકારી તિજોરી પર 9 લાખ કરોડનો બોજ