8th Pay Commission: કેન્દ્ર સરકારના લાખો કર્મચારીઓ અત્યારે 8મા પગાર પંચની આતુરતાથી રાહ જોઈ રહ્યા છે, ત્યારે આ અંગેની ચર્ચાઓએ હવે દેશભરમાં જોર પકડ્યું છે. વિવિધ સરકારી કર્મચારી સંગઠનો દ્વારા કેન્દ્ર સરકાર પાસે પગાર, ભથ્થાં અને ફિટમેન્ટ ફેક્ટરમાં મોટા ફેરફારો કરવાની જોરદાર માંગ ઉઠાવવામાં આવી રહી છે. સંગઠનોએ સરકારને કેટલાક મહત્વના સૂચનો પણ મોકલ્યા છે. જો સરકાર આ દરખાસ્તોને લીલી ઝંડી આપી દેશે, તો આવનારા સમયમાં સરકારી કર્મચારીઓના પગારમાં બમ્પર વધારો જોવા મળશે, જે તાજેતરના વર્ષોનો સૌથી મોટો ફેરફાર સાબિત થઈ શકે છે.
પગાર માળખામાં મોટા ફેરફારોની માંગ
કેન્દ્રશાસિત પ્રદેશોના સરકારી શિક્ષકોના સંગઠન 'પ્રોગ્રેસિવ ટીચર્સ જસ્ટિસ ફોરમ (PSNM)' એ સમગ્ર પગાર અને ભથ્થાની સિસ્ટમમાં જ મોટા ફેરફારની માંગણી કરી છે. સંગઠને પોતાના પ્રસ્તાવમાં સ્પષ્ટ જણાવ્યું છે કે, લેવલ-1 ના કર્મચારીઓનો લઘુત્તમ મૂળ પગાર (બેઝિક સેલરી) વધારીને ₹50,000 થી ₹60,000 ની વચ્ચે કરવામાં આવે. 7મા પગાર પંચ મુજબ અત્યારે આ લઘુત્તમ મૂળ પગાર ₹18,000 છે, જેની સરખામણીમાં આ માંગણી નોંધપાત્ર રીતે વધારે છે.
ફિટમેન્ટ ફેક્ટર અને ઇન્ક્રીમેન્ટ પર ભાર
આ ઉપરાંત, યુનિયને ફિટમેન્ટ ફેક્ટર વધારવા પર પણ ભાર મૂક્યો છે. વર્તમાન ફિટમેન્ટ ફેક્ટર 2.57 છે, જેને વધારીને 2.62 થી 3.83 ની વચ્ચે રાખવાનું સૂચન કરાયું છે. સાથોસાથ, કર્મચારીઓને જે વાર્ષિક 3 ટકા ઇન્ક્રીમેન્ટ (પગાર વધારો) મળે છે, તેને બમણું કરીને 6 થી 7 ટકા કરવાની પણ રજૂઆત કરવામાં આવી છે. સંગઠનનું કહેવું છે કે સતત વધી રહેલી મોંઘવારી (ફુગાવા) ને પહોંચી વળવા માટે આ ફેરફારો તાતી જરૂરિયાત છે, જેનાથી કર્મચારીઓની વાસ્તવિક આવકમાં સારો એવો વધારો થશે.
પગારમાં સીધો 4 ગણો વધારો કરવાની માંગ
આ મામલે 'ભારતીય પ્રતિરક્ષા મઝદૂર સંઘ (BPMS)' એ તો સરકાર સામે વધુ મોટી માંગ મૂકી છે. તેમણે લઘુત્તમ મૂળ પગાર વધારીને સીધો ₹72,000 કરવાની રજૂઆત કરી છે, જે હાલના 18,000 ના સ્તર કરતા બરાબર 4 ગણો વધારે છે. આ સાથે જ, તેઓ ફિટમેન્ટ ફેક્ટરમાં પણ 4 ગણા વધારાની માંગ કરી રહ્યા છે. એટલું જ નહીં, ઉચ્ચ-સ્તરીય હોદ્દાઓ પર બેઠેલા અધિકારીઓ માટે મહત્તમ પગાર ₹10 લાખ સુધી લઈ જવાનું પણ સૂચન છે. હવે જોવાનું એ રહે છે કે, કેન્દ્ર સરકાર આમાંથી કેટલી અને કઈ સૂચનાઓ સ્વીકારે છે. જો આ માંગણીઓ સ્વીકારાઈ તો સરકારી કર્મચારીઓના પગારમાં ઐતિહાસિક ઉછાળો આવશે.