central government da hike 2026: કેન્દ્રીય કર્મચારીઓ અને પેન્શનરો માટે એક ખુશખબર છે! તેમના મોંઘવારી ભથ્થા (DA) માં ફરી એકવાર 3% નો વધારો થવાના એંધાણ મળી રહ્યા છે. લેબર બ્યુરો દ્વારા જાહેર કરવામાં આવેલા એપ્રિલ 2026 ના તાજેતરના ડેટા પરથી આ સ્પષ્ટ સંકેત મળે છે. જો આમ થશે, તો કર્મચારીઓનું કુલ મોંઘવારી ભથ્થું 60% થી વધીને 63% થઈ જશે. જોકે, આ અંગેનો ફાઈનલ નિર્ણય મે અને જૂન મહિનાના આંકડા આવ્યા બાદ લેવાશે, પરંતુ અત્યારના ટ્રેન્ડને જોતા કર્મચારીઓ માટે આ એક મોટી રાહતના સમાચાર છે.
આંકડા શું કહે છે?
હકીકતમાં, લેબર બ્યુરોના ડેટા મુજબ એપ્રિલ 2026 માં ઔદ્યોગિક કામદારો માટેનો 'ઓલ ઈન્ડિયા કન્ઝ્યુમર પ્રાઈસ ઈન્ડેક્સ' (AICPI-IW) વધીને 149.9 પોઈન્ટ પર પહોંચી ગયો છે, જે માર્ચ મહિનામાં 149.1 પોઈન્ટ પર હતો. આ જ સમયગાળા દરમિયાન મોંઘવારીનો દર પણ 4.27% થી વધીને 4.46% થઈ ગયો છે. સરકાર આગામી મોંઘવારી ભથ્થું નક્કી કરવા માટે આ જ ઇન્ડેક્સના વધારાને ધ્યાનમાં લે છે.
કેવી રીતે થાય છે ગણતરી?
કેન્દ્ર સરકાર હંમેશા 12 મહિનાના સરેરાશ AICPI-IW ડેટાના આધારે કર્મચારીઓનું DA નક્કી કરે છે. જુલાઈ 2026 માં જે DA વધવાનું છે, તેની ગણતરી માટે જુલાઈ 2025 થી લઈને જૂન 2026 સુધીના આંકડા ધ્યાનમાં લેવાશે. અત્યારની સ્થિતિએ જોઈએ તો મે 2025 થી એપ્રિલ 2026 સુધીનો સરેરાશ ઇન્ડેક્સ 147.51 થાય છે. આ આંકડા પ્રમાણે ગણતરી કરીએ તો DA નો આંકડો 62.51% આસપાસ બેસે છે. નિયમ મુજબ આને રાઉન્ડ ફિગરમાં ગણીએ તો DA સીધું 63% થાય. હાલમાં કર્મચારીઓને 60% DA મળી રહ્યું છે, એટલે કે તેમને સીધો 3% નો વધુ લાભ મળી શકે છે.
આ પણ વાંચોઃ મોંઘવારી સાતમા આસમાને: છૂટક ફુગાવો 15 મહિનાની ટોચે 3.48% પર પહોંચતા સામાન્ય ઘરનું બજેટ ખોરવાયું
પગારમાં કેટલો વધારો થશે?
આ વધારાથી પગારમાં કેટલો ફેર પડશે તેનું એક ઉદાહરણ જોઈએ. ધારો કે, લેવલ-5 ના કોઈ કર્મચારીનો બેઝિક પગાર 29,200 રૂપિયા છે. અત્યારે 60% ના હિસાબે તેમને 17,520 રૂપિયા મોંઘવારી ભથ્થું મળે છે. હવે જો DA 63% થઈ જાય, તો આ ભથ્થું વધીને 18,396 રૂપિયા થઈ જશે. એટલે કે દર મહિને સીધો 876 રૂપિયાનો પગારમાં વધારો થશે! આનો સીધો લાભ દેશના લાખો કેન્દ્રીય કર્મચારીઓ અને પેન્શનરોને મળશે.
જોકે, અત્યારે એપ્રિલ મહિનાના ડેટા પ્રમાણે 3% વધારાનું ચિત્ર સ્પષ્ટ દેખાઈ રહ્યું છે, પણ અંતિમ જાહેરાત મે અને જૂન 2026 ના આંકડા આવ્યા બાદ જ ફાઈનલ થશે. ત્યારબાદ કેન્દ્ર સરકાર સત્તાવાર રીતે નવા મોંઘવારી ભથ્થાની જાહેરાત કરશે.
આ પણ વાંચોઃ બેંક કર્મચારીઓ માટે ખુશખબર: સરકારે મોંઘવારી ભથ્થામાં કર્યો વધારો, જાણો પગાર કેટલો વધશે?