રાષ્ટ્રીય રાજધાની દિલ્હીમાં ગુરુવારે સોનાનો ભાવ પ્રતિ 10 ગ્રામ 3,600 રૂપિયા વધીને 1,02,620  રૂપિયા પ્રતિ 10 ગ્રામના ઓલ ટાઈમ હાઈ પર પહોંચી ગયો. તેવી જ રીતે ચાંદીનો ભાવ પણ 1,500 રૂપિયા વધીને 1,14,000  રૂપિયા પ્રતિ કિલો (બધા કર સહિત) થયો. બુધવારે, ચાંદીનો ભાવ પ્રતિ કિલો 1,12,500 રૂપિયા હતો. પીટીઆઈના સમાચાર અનુસાર, ઓલ ઈન્ડિયા સરાફા એસોસિએશને આ માહિતી આપી. અમેરિકા દ્વારા ભારતીય આયાત પર વધારાનો 25 ટકા ટેરિફ લાદવાની જાહેરાત કર્યા પછી, ગુરુવારે રોકાણકારોનો ઝુકાવ સુરક્ષિત રોકાણ તરફ વળ્યો, જેની અસર કિંમતી ધાતુઓ પર સ્પષ્ટપણે જોવા મળી. 6 ઓગસ્ટના રોજ ભાવ 10 ગ્રામ દીઠ 98,600 હતો

ઓલ ઈન્ડિયા સરાફા એસોસિએશનના જણાવ્યા અનુસાર, બુધવારે 99.9% શુદ્ધતા ધરાવતું સોનું 10 ગ્રામ દીઠ 99,020 પર બંધ થયું હતું, જ્યારે ગુરુવારે 99.5% શુદ્ધતા ધરાવતું સોનું 3,600 વધીને 10 ગ્રામ દીઠ 1,02,200 પર પહોંચ્યું (બધા કર સહિત). એક દિવસ પહેલા તે 10 ગ્રામ દીઠ  98,600 પર હતું. HDFC સિક્યોરિટીઝના સિનિયર કોમોડિટી વિશ્લેષક સૌમિલ ગાંધીએ જણાવ્યું હતું કે વેપાર તણાવને કારણે રોકાણકારોનો ઝૂકાવ સલામત વિકલ્પો તરફ વધ્યો છે. ભારત અને અમેરિકા વચ્ચે વધતા તણાવે આ વધારાને વધુ મજબૂત બનાવ્યો

MCX પર પણ ભાવ વધ્યા

ઓક્ટોબર ડિલિવરી માટેનું સોનું  893 અથવા 0.88 % વધીને 10  ગ્રામ દીઠ  1,02,155 પર પહોંચ્યું.

ડિસેમ્બર ડિલિવરી કોન્ટ્રાક્ટ 80  અથવા 0.86% વધીને 1,03,047 પ્રતિ 10 ગ્રામના સર્વકાલીન ઉચ્ચતમ સ્તર પર પહોંચ્યો.

સપ્ટેમ્બર ડિલિવરી માટે ચાંદી ₹1,503 અથવા 1.32% વધીને ₹1,15,158 પ્રતિ કિલો થઈ ગઈ.

આંતરરાષ્ટ્રીય બજારોમાં સ્પોટ ગોલ્ડ મજબૂત રહ્યું છે

ન્યૂ યોર્કમાં સ્પોટ ગોલ્ડ 9.76 USD અથવા 0.29% વધીને USD 3,379.15 પ્રતિ ઔંસ પર પહોંચ્યો. સ્પોટ સિલ્વર 1.37% વધીને USD 38.34 પ્રતિ ઔંસ પર પહોંચ્યો. LKP સિક્યોરિટીઝના VP, જતીન ત્રિવેદીએ જણાવ્યું હતું કે ડોલર ઇન્ડેક્સમાં નબળાઈ અને યુએસ-રશિયા વચ્ચે સંભવિત નવા પ્રતિબંધોએ સોનાને ટેકો આપ્યો છે. આંતરરાષ્ટ્રીય સ્તરે સોનું USD 3,375 થી ઉપર મજબૂત રહ્યું છે.

ટ્રમ્પે ચિપ્સની આયાત પર 100% ટેરિફની ચેતવણી આપી છે 

મિરે એસેટ શેર ખાનના એસોસિયેટ VP પ્રવીણ સિંહે જણાવ્યું હતું કે યુએસ પ્રમુખ ટ્રમ્પે ચિપ્સની આયાત પર 100% ટેરિફની ચેતવણી આપી છે. આ ઉપરાંત, આ અઠવાડિયે નવા ફેડ ચેરની જાહેરાત પણ થવાની સંભાવના છે, જે સોનાના ભાવને વધુ અસર કરી શકે છે. કોટક સિક્યોરિટીઝના AVP, કૈનાત ચૈનવાલાએ જણાવ્યું હતું કે રોકાણકારો યુએસ બેરોજગારીના ડેટાની રાહ જોઈ રહ્યા છે, જે નજીકના ભવિષ્યમાં વ્યાજ દરો અને બુલિયન બજારની દિશા નક્કી કરવામાં મદદ કરશે.