Aadhaar Name Change: જો લગ્ન પછી તમે તમારું નામ કે સરનેમ બદલી રહ્યો છો, તો માત્ર બેંક એકાઉન્ટ, પાન કાર્ડ કે પાસપોર્ટમાં નવું નામ અપડેટ કરાવવું પૂરતું નથી, પરંતુ આધાર કાર્ડમાં પણ નવું નામ અપડેટ કરાવવું ખૂબ જ જરૂરી છે. જોકે, લોકો અવારનવાર આ મહત્વપૂર્ણ અપડેટને અવગણે છે, જેના કારણે તેમને પાછળથી અન્ય દસ્તાવેજોના વેરિફિકેશન અને ઓળખ ચકાસણી વખતે ભારે મુશ્કેલીઓનો સામનો કરવો પડે છે. આધાર કાર્ડ આજે દરેક મહત્વપૂર્ણ કામ માટે અનિવાર્ય છે, પછી તે બેંકિંગ કામકાજ હોય, નવું સિમ કાર્ડ લેવું હોય કે પછી કોઈ સરકારી યોજનાનો લાભ મેળવવો હોય. તેથી, જો લગ્ન કે અન્ય કોઈ કાયદેસરના કારણે નામ બદલવું પડે, તો આધાર રેકોર્ડને વહેલી તકે અપડેટ કરાવવો અત્યંત જરૂરી છે.
આધાર કાર્ડમાં નામ અપડેટ કરાવવાની જરૂરિયાત ત્યારે ઊભી થાય છે જ્યારે નામના સ્પેલિંગમાં ભૂલ હોય, કાનૂની પ્રક્રિયા હેઠળ નામ બદલવામાં આવ્યું હોય, લગ્ન પછી નામ કે અટક બદલાઈ હોય અથવા અન્ય કોઈ માન્ય કારણોસર નામ બદલવાનું થાય. નામ અપડેટ કરાવવા માટે પાન કાર્ડ, પાસપોર્ટ, ડ્રાઈવિંગ લાઈસન્સ, મતદાર ઓળખપત્ર (વોટર આઈડી), મેરેજ સર્ટિફિકેટ (લગ્ન નોંધણી પ્રમાણપત્ર), ગેઝેટ નોટિફિકેશન, સરકારી વિભાગ દ્વારા જારી કરાયેલું ફોટો ઓળખપત્ર અથવા બેંક કે પોસ્ટ ઓફિસની ફોટો સાથેની પાસબુક જેવા દસ્તાવેજો ઉપયોગી થાય છે. સામાન્ય રીતે અલગ-અલગ કિસ્સાઓમાં અલગ દસ્તાવેજો માંગવામાં આવી શકે છે, તેથી અરજી કરતા પહેલા UIDAI ની સત્તાવાર યાદી ચકાસી લેવી હિતાવહ છે.
આ પણ વાંચો...Senior Citizen Scheme: પોસ્ટ ઓફિસની આ યોજના આપશે દર મહિને ₹9,250 સુધી વ્યાજ
આધાર કાર્ડમાં ઓનલાઈન એપોઈન્ટમેન્ટ બુક કરીને નામ અપડેટ કરવાની પ્રક્રિયા ખૂબ જ સરળ છે. તે માટે સૌપ્રથમ UIDAI ની વેબસાઈટ પર જઈને ‘My Aadhaar’ વિભાગમાં ‘બુક એન એપોઈન્ટમેન્ટ’ વિકલ્પ પસંદ કરવાનો રહે છે. ત્યારબાદ તમારું શહેર પસંદ કરી મોબાઈલ નંબર અને ઓટીપી દ્વારા લોગિન કરીને નામ અપડેટનો વિકલ્પ પસંદ કરો. અનુકૂળ તારીખ અને સમય નક્કી કરીને એપોઈન્ટમેન્ટ બુક કરી શકાય છે. ત્યારબાદ નજીકના આધાર સેવા કેન્દ્ર પર જઈને આધાર અપડેટ ફોર્મ ભરવું, નામ બદલવા સંબંધિત દસ્તાવેજો જમા કરાવવા, બાયોમેટ્રિક ચકાસણી પૂર્ણ કરવી અને નક્કી કરેલી ફી ચૂકવવાની રહે છે. અરજી સબમિટ થયા પછી તમને અપડેટ રિક્વેસ્ટ નંબર (URN) મળશે, જેની મદદથી તમે તમારી અરજીનું સ્ટેટસ ઓનલાઈન ટ્રેક કરી શકો છો.