806 Crore GST Notice: જાહેર ક્ષેત્રની વીમા કંપની LICને વર્ષ 2024ની શરૂઆતમાં મોટો આંચકો લાગ્યો છે. વીમા કંપનીને 806 કરોડની GST નોટિસ મળી છે. નોટિસ અનુસાર, તેમાં 365.02 કરોડ રૂપિયા જીએસટી, 404.7 કરોડ દંડ અને 36.5 કરોડ રૂપિયાના વ્યાજનો સમાવેશ થાય છે. એલઆઈસીએ કહ્યું છે કે તે આ નોટિસ સામે અપીલ દાખલ કરશે.
કંપનીએ રેગ્યુલેટરી ફાઇલિંગમાં માહિતી આપી હતી
ભારતીય જીવન વીમા નિગમને આ GST નોટિસ ડેપ્યુટી કમિશનર ઑફ સ્ટેટ ટેક્સ, મુંબઈ તરફથી મળી છે. કંપનીએ તેની રેગ્યુલેટરી ફાઈલિંગમાં કહ્યું કે તે આ નોટિસ સામે અપીલ દાખલ કરશે. કંપની પર ઇનપુટ ટેક્સ ક્રેડિટના નોન રિવર્સલ નિયમોનું ઉલ્લંઘન કરવાનો આરોપ છે.
કંપનીએ કહ્યું- કોઈ અસર નહીં થાય
GSTની મોટી નોટિસ મળ્યા બાદ LICએ કહ્યું કે તે નિર્ધારિત સમયની અંદર મુંબઈમાં કમિશનર સમક્ષ અપીલ દાખલ કરશે. જો કે, સરકારી કંપનીએ કહ્યું કે આ GST નોટિસ કંપનીની નાણાકીય, ઓપરેશનલ અથવા અન્ય કોઈપણ પ્રવૃત્તિઓ પર કોઈ અસર કરશે નહીં.
ઓક્ટોબર, 2023માં 37 હજાર કરોડ રૂપિયાની નોટિસ મળી હતી
અગાઉ ઓક્ટોબર, 2023માં LICને લગભગ 37 હજાર કરોડ રૂપિયાનો GST ડિમાન્ડ ઓર્ડર મોકલવામાં આવ્યો હતો. સરકારી કંપની પર એસેસમેન્ટ વર્ષ 2019-20 દરમિયાન કેટલાક ઇનવોઇસ પર 18 ટકાના બદલે 12 ટકાના દરે ટેક્સ ચૂકવવાનો આરોપ હતો. શ્રીનગરના રાજ્ય આવકવેરા અધિકારીએ કંપની પર 10462 કરોડ રૂપિયાની જીએસટી, 20 હજાર કરોડ રૂપિયાનો દંડ અને 6,382 કરોડ રૂપિયાનું વ્યાજ લગાવ્યું હતું.
ઓક્ટોબર અને સપ્ટેમ્બરમાં પણ નોટિસો મળી હતી
આ પહેલા પણ ઓક્ટોબરમાં એલઆઈસીને 84 કરોડ રૂપિયા અને સપ્ટેમ્બરમાં 290 કરોડ રૂપિયાની ઈન્કમ ટેક્સ પેનલ્ટી નોટિસ મોકલવામાં આવી હતી. સોમવારે BSE પર LICનો શેર 3.1 ટકા વધીને રૂ. 858.35 પર બંધ થયો હતો.
વર્ષ 2023માં ટેક્સ નિયમોમાં ઘણા ફેરફારો કરવામાં આવ્યા છે, જેની સીધી અસર 2024માં કરદાતાઓ પર થવાની છે. બજેટ 2023માં કેન્દ્ર સરકારે આવકવેરા સંબંધિત ઘણા નિયમોમાં ફેરફાર કર્યા છે, જેની સીધી અસર વર્ષ 2024માં કરદાતાઓ પર પડશે. નાણાકીય વર્ષ 2023-24 માટેના તેમના બજેટ ભાષણમાં, નાણાં પ્રધાન નિર્મલા સીતારમણે એક મહત્વપૂર્ણ જાહેરાત કરીને નવી કર વ્યવસ્થાને વધુ આકર્ષક બનાવવાનો પ્રયાસ કર્યો હતો. આ સિવાય આવકવેરા વિભાગે આવા ઘણા ફેરફારો કર્યા છે, જેની સીધી અસર 2024માં સામાન્ય લોકો પર થવાની છે.