LIC Smart Pension Plan: દરેક માણસ પોતાની કમાણીમાંથી થોડી બચત ચોક્કસ કરે છે. મોટાભાગના લોકો એવું વિચારતા હોય છે કે આ બચતનું ક્યાંક એવી જગ્યાએ રોકાણ કરીએ કે જેથી નિવૃત્તિ (રિટાયરમેન્ટ) પછી દર મહિને નિયમિત આવક મળતી રહે અને પૈસાનું ટેન્શન ન રહે. જો તમે પણ આવું જ કોઈ પ્લાનિંગ કરી રહ્યા છો, તો દેશની સૌથી મોટી વીમા કંપની LIC (લાઈફ ઈન્સ્યોરન્સ કોર્પોરેશન) ની એક શાનદાર સ્કીમ તમારા માટે ખૂબ જ કામની સાબિત થઈ શકે છે. આ સ્કીમનું નામ છે LIC સ્માર્ટ પેન્શન પ્લાન (LIC Smart Pension Plan). આમાં માત્ર એક જ વખત પૈસા રોકીને તમે દર મહિને ₹25,000 સુધીનું પેન્શન મેળવી શકો છો.
વય મર્યાદા: 18 થી 100 વર્ષ સુધી કોઈ પણ રોકાણ કરી શકે
LIC નો આ 'સ્માર્ટ પેન્શન પ્લાન' એક સિંગલ-પ્રીમિયમ સ્કીમ છે (એટલે કે તમારે હપ્તેથી નહીં, પણ એક જ વારમાં રકમ ભરવાની હોય છે). આ સ્કીમ તમને સિંગલ અને જોઈન્ટ એમ બંને રીતે પેન્શનનો લાભ આપે છે. આ પ્લાન ખાસ એટલા માટે છે કારણ કે તે તમને આજીવન પેન્શનની 100% ગેરેન્ટી આપે છે, જેથી ઘડપણ તણાવમુક્ત વીતે.આ સ્કીમમાં 18 વર્ષના યુવાનથી લઈને 100 વર્ષના વડીલ સુધી કોઈ પણ વ્યક્તિ રોકાણ કરી શકે છે. અને સૌથી સારી વાત એ છે કે, જો પોલિસીધારકનું મૃત્યુ થાય, તો પેન્શનની રકમ તેમના નોમિનીને સોંપી દેવામાં આવે છે.
શું ખાસ છે LIC ના આ સ્માર્ટ પેન્શન પ્લાનમાં?
જે લોકો રિટાયરમેન્ટ પછી રેગ્યુલર ઇન્કમ ચાલુ રાખવા માંગે છે, તેમના માટે આ એક બેસ્ટ ઓપ્શન છે. LIC એ આ પ્લાન એ જ હેતુથી બનાવ્યો છે કે વ્યક્તિ એકવાર પૈસા રોકી દે, પછી આખી જિંદગી તેને કમાણીની ચિંતા ન રહે. તમે જ્યારે પ્રીમિયમ ભરો છો, ત્યારે જ પેન્શનની રકમ નક્કી થઈ જાય છે અને તે આજીવન મળતી રહે છે. વળી, જરૂર પડે ત્યારે રકમ આંશિક (થોડી) કે પૂરેપૂરી ઉપાડી લેવાનો ઓપ્શન પણ આમાં મળે છે.
જેટલું મોટું રોકાણ, તેટલું મોટું પેન્શન
આ સ્કીમમાં તમે ઓછામાં ઓછા ₹1 લાખ ના રોકાણથી શરૂઆત કરી શકો છો. જ્યારે મહત્તમ (મેક્સિમમ) રોકાણની કોઈ જ લિમિટ નથી! સીધી વાત છે, તમે જેટલી મોટી રકમ રોકશો, તમને આજીવન એટલું જ મોટું ગેરેન્ટીડ પેન્શન મળશે. જો તમે પરિણીત છો, તો તમે તમારા જીવનસાથી સાથે મળીને 'જોઈન્ટ એકાઉન્ટ' પણ ખોલાવી શકો છો અને બંને પેન્શનનો લાભ લઈ શકો છો.
લોનની સુવિધા અને અન્ય જબરદસ્ત ફાયદા
શેરબજારનું નો-ટેન્શન: આ પ્લાન તાત્કાલિક વાર્ષિકી (Immediate Annuity) સ્કીમ છે. તે શેરબજાર સાથે જોડાયેલી નથી, એટલે માર્કેટ ઘટે કે વધે, તમારા પેન્શન પર તેની કોઈ જ અસર પડતી નથી.
ઇમરજન્સીમાં લોન: પોલિસી લીધાના માત્ર 3 મહિના પછી તમે તેના પર લોન પણ લઈ શકો છો.
વધતું પેન્શન: આ સ્કીમમાં એક એવો વિકલ્પ પણ છે, જેમાં તમારું પેન્શન દર વર્ષે 3% થી 6% જેટલું વધતું રહે.
મૂળ રકમ સેફ: જો પોલિસીધારકનું મૃત્યુ થઈ જાય, તો રોકાણ કરેલી મૂળ રકમ તેમના નોમિનીને પાછી આપી દેવામાં આવે છે.
આ પણ વાંચોઃ ઓછા પ્રીમિયમમાં મોટું ફંડ: આ 5 LIC પોલિસીઓ છે શાનદાર, આજીવન રિટર્નની આપે છે ગેરંટી
મહિને ₹25,000 નું પેન્શન કેવી રીતે મળશે? સમજો ગણતરી
ચાલો સમજીએ કે આ સ્કીમમાંથી દર મહિને ₹25,000 કેવી રીતે મેળવી શકાય. જો કોઈ વ્યક્તિ 60 વર્ષની ઉંમરે રિટાયર થાય છે અને તે આ પ્લાનમાં એકસાથે ₹32 લાખ (3.2 મિલિયન) નું રોકાણ કરે છે (અને સિંગલ લાઈફ એન્યુટી ઓપ્શન પસંદ કરે છે), તો તેને વાર્ષિક ₹3,01,056 નું પેન્શન મળશે.
એટલે કે, તેમને દર મહિને ₹25,088 નું માસિક પેન્શન ગેરેન્ટી સાથે મળશે, અને તે પણ આખી જિંદગી! જો રોકાણની રકમ વધારવામાં આવે, તો પેન્શનની રકમ પણ વધી જશે.
આ પોલિસી ક્યાંથી અને કેવી રીતે ખરીદવી?
દેશનો કોઈ પણ નાગરિક આ પ્લાનનો લાભ લઈ શકે છે. તેમાં પેન્શન લેવાના અલગ-અલગ ઓપ્શન છે: તમે દર મહિને, દર ત્રણ મહિને, છ મહિને કે વર્ષે એકસાથે પેન્શન લઈ શકો છો.આ પોલિસી તમે ઘરે બેઠા LIC ની સત્તાવાર વેબસાઈટ પરથી ઓનલાઇન ખરીદી શકો છો. અથવા તો તમારા પરિચિત LIC એજન્ટ, POSPs કે કોમન સર્વિસ સેન્ટર (CSC) પર જઈને ઓફલાઈન પણ ખરીદી શકો છો.
આ પણ વાંચોઃ LIC ના શેરમાં ભારે વેચવાલી: 9% સુધી તૂટ્યો શેર, જાણો શું છે સરકારની મોટી જાહેરાત