lpg cylinder new rules july 1: જૂન મહિનો પૂર્ણ થવામાં હવે ગણતરીના કલાકો બાકી છે, ત્યારે આગામી 1 જુલાઈથી સામાન્ય માણસના ખિસ્સા અને રસોડા સાથે જોડાયેલા કેટલાક મહત્વપૂર્ણ ફેરફારો થવા જઈ રહ્યા છે. કેન્દ્ર સરકાર અને ઓઈલ માર્કેટિંગ કંપનીઓ દ્વારા 1 જુલાઈથી ઘરેલુ LPG ગેસ સિલિન્ડરના બુકિંગ, ડિલિવરી અને સબસિડીના નિયમોમાં મોટા ફેરફાર કરવામાં આવી રહ્યા છે. જો તમારા ઘરમાં પણ ઘરેલુ ગેસ સિલિન્ડરનો ઉપયોગ થતો હોય, તો સુરક્ષા સુનિશ્ચિત કરવા અને સબસિડીનો લાભ અવિરતપણે ચાલુ રાખવા માટે તમારે તાત્કાલિક આ નવા નિયમો જાણી લેવા જોઈએ.
સબસિડી માટે e-KYC અને ડિલિવરી માટે OTP ફરજિયાત
કાળાબજાર અટકાવવા અને યોગ્ય લાભાર્થીઓ સુધી સબસિડી પહોંચાડવા માટે સરકાર તેમજ ઇન્ડેન (Indane), ભારત ગેસ (Bharat Gas) અને HP જેવી ગેસ કંપનીઓએ તમામ ગ્રાહકો માટે e-KYC ફરજિયાત બનાવ્યું છે. જો તમે હજુ સુધી તમારું ઈ-કેવાયસી પૂર્ણ કર્યું નથી, તો આગામી મહિનાથી તમારા સિલિન્ડરની ડિલિવરી અને સબસિડીની રકમ અટકી શકે છે. આ ઉપરાંત, ગેસ ચોરી અને સંગ્રહખોરીને સંપૂર્ણપણે ડામવા માટે ગેસ બુકિંગ બાદ રજિસ્ટર્ડ મોબાઈલ નંબર પર આવતો OTP ડિલિવરી કરનાર વ્યક્તિને આપવો ફરજિયાત કરવામાં આવ્યો છે. OTP વેરીફાઈ થયા વિના હવે સિલિન્ડરની ડિલિવરી કરવામાં આવશે નહીં.
'એક ઘર, એક ગેસ કનેક્શન' નો નવો નિયમ અને 25 દિવસની મર્યાદા
સરકાર દ્વારા હવે 'એક ઘર, એક ગેસ કનેક્શન' નો નિયમ કડકાઈથી લાગુ કરવામાં આવી રહ્યો છે. આ નવા નિયમ અંતર્ગત જે ઘરોમાં પાઇપ્ડ નેચરલ ગેસ (PNG) ની લાઈન અને સુવિધા ઉપલબ્ધ છે, તેવા પરિવારોએ તેમના ઘરેલુ LPG સિલિન્ડર એજન્સીમાં જમા કરાવવા પડશે. હવે એક જ સરનામે PNG અને LPG બંને ગેસ કનેક્શન રાખવા ગેરકાયદેસર ગણાશે. વધુમાં, સરકારે એક નવો નિયમ પણ લાગુ કર્યો છે, જેના હેઠળ ગ્રાહકો હવે 25 દિવસની અંદર બીજો ગેસ સિલિન્ડર બુક કરી શકશે નહીં.
આ પણ વાંચોઃ 30 જૂન પહેલા પતાવી લો આ મહત્વના કામ: LPG e-KYC થી લઈને ટેક્સ સંબંધિત નિયમોમાં ફેરફાર
કનેક્શન પુનઃસ્થાપિત કરવાની વિશેષ સુવિધા
નોકરી કે અન્ય કારણોસર સ્થળાંતર કરતા પરિવારોની સુવિધાને ધ્યાનમાં રાખીને સરકારે ખાસ છૂટછાટ પણ આપી છે. જો કોઈ ગ્રાહક એવી જગ્યાએ રહેવા જાય છે જ્યાં PNG ની સુવિધા ઉપલબ્ધ નથી, તો તેવા કિસ્સામાં તેઓ તેમના જમા કરાવેલા (સોંપાયેલા) LPG કનેક્શનને ફરીથી સક્રિય કરી શકશે.
ગેસ કનેક્શનને લગતી કોઈપણ સમસ્યાના નિરાકરણ માટે કે તમારા વિસ્તારમાં PNG ની નવી માર્ગદર્શિકા જાણવા અંગે ગ્રાહકો તેમની સંબંધિત ગેસ એજન્સી અથવા 'MyPNG-D' પોર્ટલનો સંપર્ક કરી શકે છે. સરકારી અધિકારીઓના મતે, આ નવા નિયમો લાગુ થવાથી ગેસ વિતરણ વ્યવસ્થામાં વધુ પારદર્શિતા આવશે.
આ પણ વાંચોઃ LPG સિલિન્ડર ગ્રાહકો સાવધાન! ઇન્ડિયન ઓઇલે જારી કરી ચેતવણી, ભૂલથી પણ આ કામ ન કરતા