LPG Price Hike: બુધવાર, 06 જુલાઈ, 2022ના રોજ, સરકારી ઓઈલ કંપનીઓએ બિન-સબસિડીવાળા એલપીજી સિલિન્ડરના ભાવમાં રૂ. 50નો વધારો કર્યો. મોંઘવારીના આ આંચકાને કારણે સરકારની ટીકા થઈ રહી છે, તેથી સરકારે એલપીજી સિલિન્ડરના ભાવ વધારા અંગે સ્પષ્ટતા આપી છે. પેટ્રોલિયમ મંત્રી હરદીપ સિંહ પુરીએ કહ્યું કે એલપીજી ગેસના ભાવને અલગ કરીને ન જોઈ શકાય. તેમણે કહ્યું કે આંતરરાષ્ટ્રીય બજારોમાં કાચા તેલની કિંમતોમાં અસ્થિરતા હોવા છતાં દેશમાં પેટ્રોલ અને ડીઝલની કિંમતો સ્થિર છે.
એલપીજી સિલિન્ડરની કિંમતોમાં વધારા અંગે હરદીપ પુરીએ કહ્યું કે આંતરરાષ્ટ્રીય બજારોમાં કિંમતો વધુ હોવાને કારણે સ્થાનિક બજારમાં કિંમતોમાં વધારો થયો છે અને ગેસના ભાવને અલગ રીતે ન જોઈ શકાય. તેમણે કહ્યું કે સરકાર ગેસનું ઉત્પાદન વધારવાનો પ્રયાસ કરી રહી છે અને સાથે જ તેમણે કહ્યું કે દેશમાં ક્યાંય પણ ઈંધણની અછત નથી. તેમણે કહ્યું કે કેટલાક દેશોએ ઈંધણ પુરવઠા સંકટનો સામનો કર્યો છે પરંતુ દેશના કોઈપણ ભાગમાં ઈંધણની અછત નથી. સાથે જ તેમણે કહ્યું કે સરકાર પેટ્રોલ અને ડીઝલની કિંમતો સ્થિર રાખવામાં સફળ રહી છે.
હરદીપ સિંહ પુરીએ કહ્યું કે સબસિડી ચોક્કસ લાભાર્થીઓ માટે અને ચોક્કસ સમયગાળા માટે છે. હકીકતમાં, બિન-સબસિડીવાળા એલપીજીના ભાવમાં એક વર્ષમાં 244 રૂપિયા એટલે કે 30 ટકાનો વધારો થયો છે. અને હવે 14.2 કિલોના સિલિન્ડરની કિંમત 1,053 રૂપિયા છે. છેલ્લા એક વર્ષમાં રાંધણ ગેસના ભાવ આઠ વખત વધ્યા છે, પરંતુ સરકારનું કહેવું છે કે તે પડતરનેને અનુરૂપ નથી.
નોંધનીય છે કે, ઓઈલ કંપનીઓ દ્વારા એલપીજી સિલિન્ડરની કિંમતમાં ભારે વધારો કરવામાં આવ્યો છે. કંપનીઓએ 6 જુલાઈની સવારથી ઘરેલુ ગેસ સિલિન્ડર 50 રૂપિયા મોંઘા કરી દીધા છે. આ સાથે દિલ્હીમાં ગેસ સિલિન્ડરની કિંમત વધીને 1053 રૂપિયા થઈ ગઈ છે. આ સિવાય ઘરેલું ગેસ સિલિન્ડરની કિંમત કોલકાતામાં 1079 રૂપિયા, મુંબઈમાં 1052.50 રૂપિયા અને ચેન્નાઈમાં 1068.50 રૂપિયા થઈ ગઈ છે.