નવી દિલ્હીઃ આજથી એટલે કે 12 ઓક્ટોબરથી ફરી એકવાર સોવરિન ગોલ્ડ બોન્ડ (ગોલ્ડ ETF) ખરીદવાની તક મળશે. 12થી 16 ઓક્ટોબર સુધી ગોલ્ડ બોન્ડમાં રોકાણ કરી શકાશે. આ અંતર્ગત ગ્રામદીઠ સોનાની કિંમત 5,051 રૂપિયા નક્કી કરવામાં આવી છે. જે લોકો આના માટે ઓનલાઇન અરજી કરશે અને ડિજિટલ પેમેન્ટ દ્વારા ચુકવણી કરશે તેમને પ્રતિ ગ્રામ 50 રૂપિયાનું ડિસ્કાઉન્ટ મળશે. અગાઉ 31 ઓગસ્ટથી 4 સપ્ટેમ્બરથી સુધી ખૂલેલી સિરીઝ-6 માટે 5,117 રૂપિયાની ઇશ્યુ પ્રાઇઝ નક્કી કરવામાં આવી હતી. આઠમી સિરીઝ 9-13 નવેમ્બરે આવશે.

સોવરિન ગોલ્ડ બોન્ડ યોજનામાં ભારતીય નાગરિકો, હિન્દુ અવિભાજિત પરિવારો, ટ્રસ્ટ, યુનિવર્સિટીઓ અને ચેરિટેબલ સંસ્થાઓ સોનાના બોન્ડ ખરીદી શકે છે. અહીં તમને જણાવી દઇએ કે સોવરિન ગોલ્ડ બોન્ડ આઠ વર્ષ માટે આપવામાં આવે છે. તો પાંચમા વર્ષ પછી રોકાણકારને આ બોન્ડ યોજનામાંથી બહાર નીકળવાનો વિકલ્પ મળે છે. આ ગોલ્ડ બોન્ડનું વેચાણ વેપારી બેન્કો, સ્ટોક હોલ્ડિંગ કોર્પોરેશનો, પોસ્ટ ઓફિસ અને સ્ટોક એક્સ્ચેંજ બીએસઈ અને એનએસઈ દ્વારા થાય છે.

સોવરિન ગોલ્ડ બોન્ડ વિશે જાણવા માટેની મુખ્ય બાબતો

કોઈ વ્યક્તિ નાણાકીય વર્ષમાં 1 ગ્રામ અને મહત્તમ 4 કિલો સુધીની વેલ્યુના બોન્ડ ખરીદી શકે છે. જોકે કોઈ ટ્રસ્ટ માટે ખરીદીની મહત્તમ મર્યાદા 20 કિલો છે.

ગોલ્ડ બોન્ડ યોજના ડીમેટ અને પેપર ફોર્મમાં ઉપલબ્ધ છે.

બોન્ડ્સ સ્ટોક એક્સચેંજ એનએસઈ અને બીએસઈ દ્વારા વેચે છે.

આ યોજનાનો કાર્યકાળ આઠ વર્ષનો છે, જેમાં 5 મી વર્ષથી બહાર નીકળવાના વિકલ્પો છે.

લોન મેળવવા માટે ગોલ્ડ બોન્ડનો ઉપયોગ કોલેટરલ તરીકે થઈ શકે છે.

ગોલ્ડ બોન્ડ ભારત સરકાર દ્વારા સમર્થિત છે, તેથી તે સાર્વભૌમ ગ્રેડ છે.

રોકાણની કૂંમત પર 2.5 ટકા ગેરેન્ટેડ ફિક્સ વ્યાજ પણ મળે છે.

બોન્ડનો ગાળો 8 વર્ષનો હોય છે અને 5માં વર્ષ બાદ પ્રીમેચ્યોર વિથડ્રોલ કરી શકાય છે.

3 વર્ષ બાદ તેના પર લોંગ ટર્મ કેપિટલ ગેન ટેક્સ લાગે છે.

મેચ્યોરિટી સુધી રાખવા પર કેપિટલ ગેન ટેક્સ નહીં લાગે.