વ્યાજ દરમાં ઘટાડા બાદ હવે ₹50 લાખની લોન પર દર મહિને કેટલો હપ્તો ઘટી જશે, જાણો નવી EMI ગણતરી

RBI MPC home loan impact: આ રેપો રેટમાં ઘટાડાથી સામાન્ય જનતાને લોનની EMIમાં નોંધપાત્ર રાહત મળશે.

RBI MPC home loan impact: રિઝર્વ બેંક ઓફ ઈન્ડિયા (RBI) ની મોનેટરી પોલિસી કમિટી (MPC) એ સામાન્ય માણસને મોટી રાહત આપતા રેપો રેટમાં ઘટાડો કર્યો છે. પાંચ વર્ષના લાંબા અંતરાલ બાદ RBI MPCએ વ્યાજ દરમાં ઘટાડો કરીને હોમ લોન લેનારાઓને ખુશ કરી દીધા છે. 7 ફેબ્રુઆરી, 2025 ના રોજ, RBI MPCની ત્રણ દિવસીય બેઠક બાદ 0.25 ટકાના ઘટાડાની જાહેરાત કરવામાં આવી હતી. આ ઘટાડા સાથે રેપો રેટ 6.50 ટકાથી ઘટીને 6.25 ટકા થયો છે. છેલ્લે મે 2020માં રેપો રેટમાં ઘટાડો કરવામાં આવ્યો હતો, ત્યારબાદ મે 2022 થી ફેબ્રુઆરી 2023 સુધીના સમયગાળામાં 2.50 ટકાનો વધારો જોવા મળ્યો હતો. ત્યાર પછીના બે વર્ષ સુધી દરોમાં કોઈ ફેરફાર કરવામાં આવ્યો ન હતો.

આ રેપો રેટમાં ઘટાડાથી સામાન્ય જનતાને લોનની EMIમાં નોંધપાત્ર રાહત મળશે. હવે બેંકો પણ હોમ લોનના વ્યાજ દરમાં ઘટાડો કરશે, જેના પરિણામે સામાન્ય લોકોની હોમ લોન EMI ઘટશે, જેની તેઓ ઘણા સમયથી રાહ જોઈ રહ્યા હતા. મુખ્ય પ્રશ્ન એ છે કે હોમ લોન EMI કેટલી ઘટશે? ચાલો ગણતરી દ્વારા સમજીએ.

ધારો કે સ્ટેટ બેંક ઓફ ઈન્ડિયા (SBI) હાલમાં હોમ લોન પર 9.65 ટકાના દરે વ્યાજ વસૂલે છે. રેપો રેટમાં 25 બેસિસ પોઈન્ટ્સનો ઘટાડો થવાથી SBI હોમ લોનનો વ્યાજ દર આશરે 9.40 ટકા થઈ શકે છે. અમે 25 લાખ, 40 લાખ અને 50 લાખ રૂપિયાની હોમ લોનના ઉદાહરણો લઈને EMIની ગણતરી કરીને સમજીએ:

₹25 લાખની હોમ લોન પર EMI કેટલી ઘટશે?

જો તમે SBI પાસેથી 9.65 ટકાના વ્યાજ દરે 20 વર્ષ માટે ₹25 લાખની હોમ લોન લીધી હોય, તો હાલમાં તમારી EMI ₹23,549 થાય છે. રેપો રેટમાં 0.25 ટકાના ઘટાડા બાદ વ્યાજ દર 9.40 ટકા થવા પર, તમારી નવી EMI ₹23,140 થશે. આમ, તમારી માસિક EMIમાં ₹409 નો ઘટાડો થશે.

₹40 લાખની હોમ લોન પર કેટલી રાહત મળશે?

હાલમાં 9.65 ટકાના વ્યાજ દરે 20 વર્ષ માટે ₹40 લાખની હોમ લોન પર EMI ₹37,678 થાય છે. પરંતુ રેપો રેટ ઘટ્યા બાદ 9.40 ટકાના વ્યાજ દરે તમારી EMI ₹37,024 થશે. એટલે કે, દર મહિને તમારા ખિસ્સા પરથી ₹654 નો બોજ ઓછો થશે.

₹50 લાખની હોમ લોન માટે EMI કેટલી રહેશે?

9.65%ના દરે 20 વર્ષ માટે ₹50 લાખની હોમ લોન પર હાલમાં EMI ₹47,097 છે. રેપો રેટમાં ઘટાડા પછી તમારી લોનની EMI ₹46,281 થશે. આ ગણતરી મુજબ, તમને દર મહિને ₹816 નો ફાયદો થશે.

આ ગણતરીઓ દર્શાવે છે કે RBI દ્વારા રેપો રેટમાં કરવામાં આવેલો ઘટાડો હોમ લોન લેનારાઓ માટે નોંધપાત્ર રાહત લઈને આવ્યો છે. વ્યાજ દરોમાં ઘટાડાથી EMI નું ભારણ ઓછું થશે અને સામાન્ય લોકો માટે ઘર ખરીદવાનું સપનું સાકાર કરવામાં મદદ મળશે.

આ પણ વાંચો....