આવકવેરા રિટર્ન ફાઈલ કરવાની અંતિમ તારીખમાં એક સપ્તાહ કરતાં ઓછો સમય બાકી છે. રિટર્ન ફાઈલ કરવાનું કામ આવતા અઠવાડિયે 3 દિવસ સુધી ચાલશે અને તે પછી ITR ફાઈલ કરવા પર પેનલ્ટી લાગશે. આવકવેરા વિભાગે સમયમર્યાદા પહેલા સંકેત આપ્યો છે કે રિટર્ન ફાઈલ કરવાની અંતિમ તારીખ વધારવાની શક્યતા ઓછી છે.
સમયમર્યાદા વધારવાનો અવકાશ ઓછો
નાણાકીય વર્ષ 2023-24 અથવા મૂલ્યાંકન વર્ષ 2024-25 માટે આવકવેરા રિટર્ન ફાઇલ કરવાની અંતિમ તારીખ 31 જુલાઈ છે. કરદાતાઓનું એક જૂથ સમયમર્યાદા વધારવાની માંગ કરી રહ્યું છે. તેઓ આવકવેરા રિટર્ન ફાઇલિંગ પોર્ટલ એકદમ ધીમુ ચાલતુ હોવાની ફરિયાદ કરી રહ્યા છે. રિટર્ન ભરવાની સમયમર્યાદા લંબાવવાની આશા ઓછી છે. વિભાગને લાગે છે કે કરદાતાઓ યોગ્ય ઝડપે રિટર્ન ફાઈલ કરી રહ્યા છે અને આ વર્ષે ફરીથી ITR ફાઈલ કરવાનો નવો રેકોર્ડ બનવા જઈ રહ્યો છે.
4 કરોડથી વધુ રિટર્ન ફાઇલ
આવકવેરા ફાઇલિંગ પોર્ટલ પર ઉપલબ્ધ ડેશબોર્ડ અનુસાર, અત્યાર સુધીમાં 12.39 કરોડથી વધુ કરદાતાઓએ પોર્ટલ પર પોતાનું રજીસ્ટ્રેશન કરાવ્યું છે. અત્યાર સુધીમાં લગભગ 4 કરોડ 60 લાખ આવકવેરા રિટર્ન ફાઇલ કરવામાં આવ્યા છે. તેમાંથી 4 કરોડ 22 લાખથી વધુ રિટર્ન કરદાતાઓ દ્વારા ચકાસવામાં આવ્યા છે. આવકવેરા વિભાગે તેમાંથી 1 કરોડ 89 લાખથી વધુ રિટર્નની પ્રક્રિયા પણ કરી છે.
આ રેકોર્ડ ગયા વર્ષે બન્યો હતો
આવકવેરા વિભાગે આ વર્ષે જ 24 જુલાઈના રોજ 4 કરોડ ITR ફાઇલિંગનો માઈલસ્ટોન હાંસલ કર્યો હતો. ગયા વર્ષે 26 જુલાઈએ 4 કરોડ ITRનો આંકડો પાર થયો હતો. 23 જુલાઈએ એક જ દિવસમાં 22 લાખથી વધુ આઈટીઆર ફાઈલ કરવામાં આવ્યા હતા. આ કારણોસર, વિભાગને લાગે છે કે આ વર્ષે ITR ફાઇલિંગનો નવો રેકોર્ડ બની શકે છે. ગયા વર્ષે 31 જુલાઈ સુધી રેકોર્ડ 6.77 કરોડ આવકવેરા રિટર્ન ફાઈલ કરવામાં આવ્યા હતા.
31મી જુલાઈ પછી 5 હજારનો દંડ
આવકવેરા વિભાગને લાગે છે કે સમયમર્યાદા પહેલા બાકીના દિવસોમાં કરદાતાઓ દ્વારા રિટર્ન ફાઇલિંગમાં વધુ વધારો થશે. આવી સ્થિતિમાં, સમયમર્યાદાને આગળ વધારવાની જરૂર નથી. આવકવેરા રિટર્ન ફાઈલ કરવાની અંતિમ તારીખ એટલે કે 31મી જુલાઈ 2024 સુધી ઈન્કમ ટેક્સ રિટર્ન ફાઈલ કરવું મફત છે. સમયમર્યાદા પછી, કરદાતા પાસે રિટર્ન ફાઇલ કરવા માટે 31 ડિસેમ્બર સુધીનો સમય છે, પરંતુ તેના માટે કરદાતાએ 5,000 રૂપિયા સુધીનો દંડ ચૂકવવો પડશે.