Gandhinagar: અમદાવાદ અને ગાંધીનગરની અનેક મહત્વપૂર્ણ સરકારી કચેરીઓને બોમ્બથી ઉડાવી દેવાની ધમકી મળતા પોલીસ, બોમ્બ ડિસ્પોઝલ સ્ક્વોડ (BDDS) અને ફાયર વિભાગ એલર્ટ થઈ ગયા હતા.ધમકીભર્યા ઈ-મેઈલમાં ગાંધીનગરના સ્વર્ણિમ સંકુલ-1, RSS ભવન, મુખ્યમંત્રી કાર્યાલય (CMO) તેમજ અમદાવાદ મ્યુનિસિપલ કોર્પોરેશન (AMC)ની મુખ્ય કચેરી સહિત વિવિધ સરકારી સંસ્થાઓને નિશાન બનાવવાની વાત કરવામાં આવી છે. ધમકી બાદ સંબંધિત કચેરીઓમાં સુરક્ષા ગોઠવવામાં આવી છે અને તપાસ શરૂ કરવામાં આવી છે.
મળતી માહિતી મુજબ, અમદાવાદના કારંજ પોલીસ સ્ટેશનને ઈ-મેઈલ મારફતે આ ધમકી મળી હતી. ઈ-મેઈલમાં ગાંધીનગરના સ્વર્ણિમ સંકુલ-1ને બોમ્બથી ઉડાવી દેવાની ધમકી આપવામાં આવી હતી. તે સિવાય RSS ભવનને સાંજે 5:10 વાગ્યે, મુખ્યમંત્રીની કચેરીને રાત્રે 11 વાગ્યે અને AMCની મુખ્ય કચેરીને બપોરે 3 વાગ્યે બોમ્બથી ઉડાવી દેવાની ધમકી આપવામાં આવી હતી. સાથે જ અમદાવાદ અને ગાંધીનગરની અન્ય સરકારી કચેરીઓને પણ બોમ્બથી ઉડાવી દેવાનો ધમકીભર્યા ઈમેઈલમાં ઉલ્લેખ કરવામાં આવ્યો હતો. જુદા-જુદા ઈ-મેલ આઈડી પરથી મોકલવામાં આવેલી આ ધમકીઓમાં ખાસ કરીને CM ઓફિસને બપોરે 1:11 વાગ્યે, AMC ઓફિસને બપોરે 3:11 વાગ્યે અને RSS કચેરીને સાંજે 5:11 વાગ્યે બ્લાસ્ટથી ઉડાવી દેવાનો ઉલ્લેખ કરવામાં આવ્યો છે. ખાલિસ્તાન નેશનલ આર્મીના નામથી ધમકી આપવામાં આવી છે. અમદાવાદની AMC ઓફિસને બોમ્બથી ઉડાવવાની ધમકી મળતા ખાલી કરાવાઈ હતી. AMC કચેરીના તમામ વિભાગની કચેરીને ખાલી કરી દેવાઈ હતી. BDDSની ટીમ અને ફાયર વિભાગની ટીમે તપાસ શરૂ કરી હતી. હાલ કોઈ પણ પ્રકારની શંકાસ્પદ વસ્તુ મળી નથી. મેયર. ડેપ્યુટી મેયર, સ્ટે.કમિટી ચેરમેન બહાર દોડી આવ્યા હતા. શાસક પક્ષના નેતા, દંડક સહિત મુખ્ય ઓફિસનો સ્ટાફ પણ બહાર દોડી આવ્યો હતો.
ધમકી મળતા જ દાણાપીઠ ખાતે આવેલી AMCની કચેરી સહિત વિવિધ સ્થળોએ BDDSની ટીમ, ફાયર બ્રિગેડ અને પોલીસનો કાફલો પહોંચ્યો હતો. સુરક્ષાના ભાગરૂપે કચેરીઓ ખાલી કરાવવાનો નિર્ણય લેવામાં આવ્યો હતો અને તમામ વિભાગોને સતર્ક રહેવા સૂચના આપવામાં આવી હતી. શંકાસ્પદ વસ્તુઓની તપાસ માટે સઘન સર્ચ ઓપરેશન હાથ ધરવામાં આવ્યું છે.
પોલીસ દ્વારા ઈ-મેઈલના સ્ત્રોત અને મોકલનારની ઓળખ કરવા માટે સાયબર ક્રાઈમ ટીમની મદદ લેવામાં આવી છે. હાલ સમગ્ર મામલે તપાસ ચાલી રહી છે અને સુરક્ષા એજન્સીઓ કોઈપણ સંભાવનાને ધ્યાનમાં રાખીને કાર્યવાહી કરી રહી છે.