નર્મદા: સરદાર સરોવર નર્મદા ડેમમાંથી પાણી છોડવામાં આવતા નર્મદા નદી કાંઠા વિસ્તારોમાં આવેલા ગામના લોકોને ભારે મુશ્કેલીનો સામનો કરવો પડ્યો છે. નર્મદા નદીના કાંઠા વિસ્તારમાં આવેલા ગામના લોકોને સ્થાળાંતર કરાયા છે. અનેક ગામડાઓમાંથી લોકોનું સ્થળાંતર કરવામાં આવ્યું છે. રામાનંદ આશ્રમમાં 100 સાધુ સંતો સહિત ભક્તો પાણી ભરાવાના કારણે ફસાયા છે. નર્મદા નદીના કાંઠા વિસ્તારમાં આવેલુ વસંતપરા ગામની બાજુમાં પણ લોકો ફસાયા છે. NDRFની ટીમ દ્વારા બચાવ કામગીરી હાથ ધરવામાં આવી છે.
નાંદોદ તાલુકાના ગુવાર ગામ ખાતે રામાનંદ આશ્રમ ખાતે હજુ પણ 100થી વધુ લોકો પાણી ભરાવાના કારણે ફસાયા છે. આશ્રમના ગુરુ અભિરામદાસજી મહારાજ પણ રામાનંદ આશ્રમ ખાતે ફસાયા છે. જો કે એન ડી આર એફની ટીમ આ તમામ લોકોને સુરક્ષિત બહાર લાવવા માટે પ્રયાસો કરી રહી છે. એનડીઆરએફની ટીમને રામાનંદ આશ્રમ સુધી પહોંચવામાં અનેક અડચણો આવી રહી છે. આશ્રમના બીજા માળ સુધી પાણી પહોંચી ગયું છે.
સરદાર સરોવર નર્મદા ડેમની જળ સપાટીમાં થયો ઘટાડો
સરદાર સરોવર નર્મદા ડેમની જળસપાટીમાં ઘટાડો થયો છે. નર્મદા નદીના કાંઠા વિસ્તારના લોકો માટે રાહતના સમાચાર સામે આવ્યા છે. મુખ્યમંત્રી ભુપેન્દ્ર પટેલે સરદાર સરોવર નર્મદા ડેમ પૂર્ણ સપાટીએ છલકાઈ જતાંજળના વધામણાં કર્યા હતા. મુખ્યમંત્રીએ રવિવારે વહેલી સવારે એકતા નગર પહોંચ્યા હતા અને નર્મદાના પવિત્ર જળનું પૂજન કર્યું હતું.
સરદાર સરોવર નર્મદા ડેમ સાંજે 6 કલાકે
નર્મદા કાંઠાવાસીઓ માટે વધારે રાહતના સમાચાર સામે આવ્યા છે. પાણીની સપાટીમાં ઘટાડો નોંધાયો છે. 3 કલાકમાં 8 સે.મીનો ઘટાડો નોંધાયો છે. પાણીની આવકમાં ઘટાડો થયો છે. 3 કલાકમાં 1,08,467 ક્યુસેકનો ઘટાડો થયો છે. પાણીની જાવકમાં પણ નોંધપાત્ર ઘટાડો થયો છે. 3 કલાકમાં 1,08,220 ક્યૂસેકનો ઘટાડો થયો છે. નર્મદા ડેમ પાણીની સપાટી - 138.60 મીટર પર છે.
સિઝનમાં પહેલીવાર નર્મદા ડેમ સંપૂર્ણ ભરાયો છે. ડેમ પર ગેટ મુકાયા બાદ 6 વખત સંપૂર્ણ ભરાયો છે. હાલ નર્મદા ડેમની સપાટી 138 મીટર આસપાસ છે. નર્મદા ડેમની મહત્તમ સપાટી 138.68 મીટર છે. નર્મદા ડેમના 23 દરવાજા ખોલી 18 થી 19 લાખ ક્યુસેક પાણી નદીમાં છોડવામાં આવ્યું છે.
નર્મદા જિલ્લા કલેક્ટર દ્વારા જણાવવામાં આવ્યું છે કે, નર્મદા ડેમના 23 દરવાજા ખોલી 18 થી 19 લાખ ક્યુસેક પાણી નદીમાં છોડવામાં આવતા નર્મદા જિલ્લાના નર્મદા નદી કાંઠાના માંગરોળ,જીઓર, ગુવાર,અકતેશ્વર,ગાભાણા અને વસંતપુરા જેવા ગામોમાં પાણી ભરાયા હતા. આ ગામોમાં પરિવારો ફસાયા હતા નર્મદા જિલ્લા વહીવટી તંત્ર સતર્ક રહેતા નર્મદા જિલ્લામાં 2500થી વધુ લોકોનું સ્થળાંતર કરવામાં આવ્યું છે. નર્મદા જિલ્લામાં 3 એસ ડી આર એફની ટીમ કામ કરી રહી છે જ્યારે 2 એનડીઆરએફની ટીમો પાણીમાં ફસાયેલા ગામોમાં રેસ્ક્યૂનું કામ કરી રહી છે. અત્યાર સુધીમાં 125થી વધુ લોકોના રેસ્ક્યૂ કરવામાં એસડીઆરએફ અને એનડીઆરએફની ટીમને સફળતા મળી છે. જ્યારે સૌથી વધુ રામાનંદ આશ્રમ ખાતે 100 થી વધુ સાધુ સંતો ફસાયા છે તેમનું પણ રેસ્ક્યુ એન ડી આર એફની ટીમ દ્વારા કરવામાં આવી રહ્યું છે.