નવસારી: શહેરના ડેપો વિસ્તારમાં મહિલાએ આત્મહત્યા કરી લીધી છે. કે કે પ્લાઝા એપાર્ટમેન્ટ ખાતે રહેતી 34 વર્ષીય મહિલાએ આત્મહત્યા કરી લેતા ચકચાર મચી જવા પામી છે. આ અંગે સામે આવેલી વિગતો અનુસાર છેલ્લા ચાર વર્ષથી પતિથી અલગ રહેતી મહિલાએ જીવન ટૂંકાવ્યું છે. બહેન સાથે રહેતી મહિલાએ ગળેફાંસો લગાવી જીવનલીલા સંકેલી લેતા અનેક સવાલો ઉઠ્યા છે. પંખા ઉપર ઓઢણી વડે ફાંસો લગાવી મહિલાએ આત્મહત્યા કરી લીધી હતી. જો કે, મહિલાએ પોતાનું જીવન કેમ ટૂંકાવ્યું તે અંગે કોઈ માહિતી સામે આવી નથી. પોલીસ તપાસ બાદ જ સામે આવશે કે મહિલાએ આત્મહત્યા કેમ કરી.
પ્રેમ લગ્નનો આવ્યો કરુણ અંજામ
22 વર્ષીય યુવતીને પ્રેમ લગ્ન કરીને પસ્તાવવાનો વારો આવ્યો છે ડાયમંડ નગરી સુરતમાં. લગ્નના 3 મહિના બાદ પરિણીતાને શારીરિક માનસિક ત્રાસ આપવામાં આવતો હતો અને મારઝૂડ કરવામાં આવતી હતી. આ ઉપરાંત પરિણીતાના વાળ કાપી નાખવામાં આવ્યા હતા અને જાનથી મારી નાખીને મા-બાપના ઘરે ફેકી દેવાની ધમકીઓ આપવામાં આવી હોવાનો આક્ષેપ કરવામાં આવ્યો છે. આ સમગ્ર મામલે પરિણીતાએ કતારગામ પોલીસ મથકમાં પતિ, સાસુ અને નણંદ સામે પોલીસ ફરિયાદ નોંધાવી હતી. જે ફરિયાદના આધારે પોલીસે ત્રણેયની ધરપકડ કરી કોર્ટમાં રજૂ કર્યા હતા.
સુરતમાં રહેતી ૨૨ વર્ષીય યુવતીએ વર્ષ 2021માં કતારગામ વિસ્તારમાં રહેતા વિવેક કાચરિયાની સાથે પ્રેમ લગ્ન કર્યા હતા. લગ્નગાળા દરમ્યાન તેઓને સંતાનમાં 1 વર્ષની દીકરી પણ છે. પ્રેમ લગ્ન કરનાર પરિણીતાને ઢોર માર મારવામાં આવ્યો હતો. ઈજાગ્રસ્ત પરિણીતા હાલ હોસ્પિટલમાં સારવાર હેઠળ છે. તો બીજી તરફ આ સમગ્ર મામલે પરિણીતાએ કતારગામ પોલીસ મથકમાં પતિ, સાસુ મીનાબેન અને નણંદ સ્નેહા સામે કતારગામ પોલીસ મથકમાં ફરિયાદ નોંધાવી હતી.
પરિણીતાએ નોંધાવેલી ફરિયાદમાં જણાવ્યું હતું કે, પ્રેમલગ્નના ૩ મહિના સુધી તેણીને સારી રીતે રાખવામાં આવી હતી અને ત્રણ મહિના બાદ ઘરના કામ કાજ બાબતે ઝઘડો તકરાર કરીને તેણીની સાથે મારઝૂડ કરી શારીરિક માનસિક ત્રાસ આપવામાં આવતો હતો. પરિણીતાને ફોન પણ રાખવા દેતા ન હતા અને ઘરની બહાર એકલા નીકળવા દેતા ન હતા. તેમજ પરિણીતાને પિયરમાં વાત પણ કરવા દેતા ન હતા, પરિણીતા જયારે ગર્ભવતી હતી ત્યારે પણ બોલાચાલી કરી મારઝુડ કરતા હતા. આ ઉપરાંત ઘરે કોઈ મહેમાન આવે તો પરિણીતાને તેના પિયર વિષે ખોટા ધંધા કરે છે. તેવી વાત કરવા જણાવતા હતા અને પરિણીતા આમ ન કરે તો મારુઝુડ કરતા હતા.
ગત 14 ઓગસ્ટના રોજ રાત્રિના 1 વાગ્યાના આસપાસ સાસુએ મોઢા પર કપડાનો પટ્ટો બાંધીને ઘરના દરવાજા બંધ કરીને પતિ અને નણંદએ વેલણ, લાકડી તથા કાતરથી ઢોર માર માર્યો હતો અને બાદમાં વાળ પણ કાપી નાખ્યા હતા અને સાસુએ ધમકી આપી હતી કે ફ્લેટ રાખ્યો છે તેનું કામકાજ પૂર્ણ થઇ જાય પછી તને મારીને તારા માતા-પિતાના ઘરની સામે ફેકી દઈશું. મહિલાની ફરિયાદના આધારે કતારગામ પોલીસે ત્રણેય આરોપીની ધરપકડ કરી વધુ તપાસ હાથ ધરી છે