- 16 દિવસની તપાસ બાદ જયરાજ આહીર SIT સમક્ષ નિવેદન નોંધાવવા ભાવનગર IG કચેરીએ હાજર થયા.
- આ કેસમાં SIT એ રામભાઈ વાળા અને ચેતન સોનીના પણ નિવેદનો લીધા છે.
- ફરિયાદી નવનીત બાલધીયાએ તપાસ ટીમ સમક્ષ કેસને લગતા 15 સજ્જડ પુરાવા રજૂ કર્યા હતા.
- તપાસમાં ખુલ્યું છે કે જયરાજ આહીરે રામભાઈ વાળાને ફોન કરીને નવનીત વિશે માહિતી માંગી હતી.
- SIT એ રજૂ કરાયેલા પુરાવા અને કોલ ડિટેલ્સના આધારે તપાસનો ગાળિયો મજબૂત કર્યો છે.
Bagdana Assault Case: ભાવનગર (Bhavnagar) જિલ્લાના મહુવા તાલુકાના બગદાણા (Bagdana) ગામે કોળી યુવક નવનીત બાલધીયા પર થયેલા જીવલેણ હુમલાનો મામલો હવે ટોક ઓફ ધી ટાઉન બન્યો છે. આ ચકચારી પ્રકરણમાં રચાયેલી સ્પેશિયલ ઇન્વેસ્ટિગેશન ટીમ (SIT) દ્વારા તપાસનો ધમધમાટ તેજ કરવામાં આવ્યો છે. છેલ્લા 16 દિવસથી ચાલી રહેલી તપાસમાં આજે એક મહત્વનો વળાંક આવ્યો હતો, જ્યારે આ કેસમાં ચર્ચામાં રહેલા જયરાજ આહીર (Jayraj Ahir) પોતાનું નિવેદન નોંધાવવા માટે ભાવનગર રેન્જ આઈજી કચેરી (Range IG Office) ખાતે આવી પહોંચ્યા હતા.
તપાસનો રેલો જયરાજ આહીર સુધી પહોંચ્યો
નવનીત બાલધીયાને માર મારવાના કેસમાં SIT ની ટીમ ઝીણવટભરી તપાસ ચલાવી રહી છે. પોલીસ સૂત્રોના જણાવ્યા અનુસાર, SIT દ્વારા આ પ્રકરણમાં સંડોવાયેલા મનાતા અન્ય વ્યક્તિઓની પૂછપરછ બાદ જયરાજ આહીરને પણ સમન્સ પાઠવીને બોલાવવામાં આવ્યા હતા. જેને પગલે તેઓ આજે તપાસ અધિકારીઓ સમક્ષ હાજર થયા હતા.
રામભાઈ વાળા અને ચેતન સોનીની પણ પૂછપરછ
જયરાજ આહીર પહેલાં SIT ની ટીમે રામભાઈ વાળા અને મહુવાના ચેતન સોની નામના વ્યક્તિઓના પણ નિવેદન (Statement) નોંધ્યા હતા. તપાસમાં એવું સામે આવ્યું છે કે જયરાજ આહીરે રામભાઈ વાળાને ફોન કરીને નવનીત બાલધીયા વિશે માહિતી માંગી હતી. ઉલ્લેખનીય છે કે રામભાઈ વાળા ભોગ બનનાર નવનીત અને જયરાજ આહીર બંનેના પરિચિત મિત્ર હોવાનું કહેવાય છે. આ કોલ ડિટેલ્સ અને સંપર્કોના આધારે પોલીસ કડીઓ જોડી રહી છે.
15 પુરાવાઓએ તપાસને વેગ આપ્યો
થોડા દિવસો પહેલા જ ભોગ બનનાર નવનીત બાલધીયાએ SIT સમક્ષ હાજર થઈને આ કેસ સંબંધિત 15 જેટલા મહત્વના પુરાવાઓ (Evidence) રજૂ કર્યા હતા. આ પુરાવાઓમાં રામભાઈ વાળાના નામનો પણ સ્પષ્ટ ઉલ્લેખ કરવામાં આવ્યો હતો. નવનીતે આપેલા સજ્જડ દસ્તાવેજો અને પુરાવાઓને આધારે જ હવે SIT એ તપાસનો ગાળિયો મજબૂત કર્યો છે અને એક પછી એક વ્યક્તિઓના નિવેદન લેવાની તજવીજ હાથ ધરી છે. આગામી દિવસોમાં આ કેસમાં નવા ખુલાસા થવાની શક્યતા નકારી શકાય નહીં.