Vimal Chudasama FIR: સોમનાથમાં રેલવે સ્ટેશન સામે આવેલી સરકારી જમીન પરથી દબાણ હટાવવાની કાર્યવાહી દરમિયાન વિરોધ પ્રદર્શન થતાં પોલીસે કોંગ્રેસના ધારાસભ્ય વિમલ ચુડાસમા અને અન્ય 14 લોકોની અટકાયત કરી છે. દબાણ હટાવવાની કાર્યવાહીનો વિરોધ કરવા મોટી સંખ્યામાં લોકો સોમનાથ-વેરાવળ હાઈવે પર બેસી ગયા હતા, જેના કારણે રસ્તો બ્લોક થઈ ગયો હતો અને ચક્કાજામના દ્રશ્યો સર્જાયા હતા.
પ્રશાસન દ્વારા આજે દબાણ હટાવવાની તૈયારી કરવામાં આવતા અનેક ઝૂંપડા અને અન્ય ગેરકાયદેસર બાંધકામો દૂર થવાની ભીતિથી લોકો રસ્તા પર ઉતરી આવ્યા હતા અને આકરો વિરોધ નોંધાવ્યો હતો. ખાસ કરીને ગુડલક સર્કલ નજીક ગેરકાયદેસર જમીન પર દબાણ હટાવવા ગયેલા અધિકારીઓ સામે મહિલાઓ અને શ્રમજીવી પરિવારોએ ઉગ્ર વિરોધ કર્યો હતો.
આ ઘટનાને પગલે પ્રભાસ પાટણ પોલીસ સ્ટેશનમાં ધારાસભ્ય વિમલ ચુડાસમા સામે ફરિયાદ નોંધાવવામાં આવી છે. વેરાવળના મામલતદારે આ ફરિયાદ નોંધાવી છે, જેમાં રાયોટિંગ (હુલ્લડ), ફરજમાં રુકાવટ અને પોલીસ પર હુમલા જેવા ગંભીર આરોપો લગાવવામાં આવ્યા છે. આ ઘટના દરમિયાન એક પ્રભાસ પાટણ પોલીસ સ્ટેશનના એએસઆઈ હિરેન ઝાલાને માથામાં ઈજા પહોંચી હતી, જ્યારે અન્ય એક પોલીસ કર્મચારીને પણ મૂંઢ માર વાગ્યો હતો. બંને ઈજાગ્રસ્ત પોલીસ કર્મચારીઓએ સારવાર લીધી હતી.
પોલીસે આ મામલે વિમલ ચુડાસમા સહિત 15થી વધુ લોકોની અટકાયત કરી છે, જ્યારે 30થી વધુ લોકો સામે ફરિયાદ નોંધવામાં આવી છે. જેમાં 15 વ્યક્તિઓ પર નામજોગ ફરિયાદ દાખલ કરવામાં આવી છે, જ્યારે 40થી વધુના ટોળા પર પણ ફરિયાદ દાખલ કરવામાં આવી છે. નામજોગ ફરિયાદમાં સામેલ વ્યક્તિઓની યાદી નીચે મુજબ છે:
અટકાયત કરાયેલા લોકોના નામ:
- વિમલભાઈ કાનાભાઈ ચુડાસમા (ધારાસભ્ય)
- અજય વિનેશભાઈ મારડિયા
- મુકેશ રવજીભાઈ પરમાર
- અશરફ ઉમરભાઈ ભાદરકા-ઘાંચી
- હસમુખ ઉર્ફે દુલ્લભ બાબુભાઈ મકવાણા-દે.પુ.
- મનોજ ઉર્ફે ભાવેશ નથુભાઈ મકવાણા-દે.પુ.
- વલ્લભ ઉર્ફે ભરત ધીરુભાઈ મકવાણા-દે.પુ.
- સંજયભાઈ મનસુખભાઈ સોલંકી
- મહેશભાઈ રાજુભાઈ સોલંકી
- રમણ ઉર્ફે રમેશ બચુભાઈ ચુડાસમા-દે.પુ.
- ભાવનાબેન ઉર્ફે ભાનુ કનુભાઈ મકવાણા દે.પુ.
- ભારતીબેન ઉર્ફે જોશના શંભુભાઈ પંચોલી દે.પુ.
- મંજુબેન ધનજીભાઈ પંચોલી-દે.પુ.
- મધુબેન ભરતભાઈ સોલંકી દે.પુ.
- લક્ષ્મીબેન ઉર્ફે ગીતા મનસુખભાઈ સોલંકી દે.પુ.
આ ઘટનાને પગલે સોમનાથ અને વેરાવળ પંથકમાં તંગદિલીનો માહોલ જોવા મળી રહ્યો છે. પોલીસ દ્વારા વધુ તપાસ હાથ ધરવામાં આવી છે.