Crime: ગુજરાતમાં ફરી એકવાર યુવા ધનને નશાના રવાડે ચઢાવવાનું ષડયંત્ર એસઓજીએ પકડી પાડ્યુ છે, એસઓજીની ટીમની કાર્યવાહીમાં કચ્છમાથી ફરી એકવાર 20 પેકેટ ચરસનો જથ્થો પકડાયો છે. આની કિંમત લગભગ 53 લાખથી વધુની છે.
મળતી માહિતી પ્રમાણે, કચ્છમાંથી આજે સવારે એસઓજીની ટીમે બતામીના આધારે મોટી કાર્યવાહી હાથ ધરી હતી, કચ્છના દરિયાઈ વિસ્તારમાંથી ચરસના પેકેટ મળવાનો સિલસિલો યથાવત હજુ પણ યથાવત રહ્યો છે. બીએસએફ બાદ પશ્ચિમ કચ્છ SOGએ આ દરિયાઇ પટ્ટીમાંથી ચરસના 20 પેકેડ પકડ્યા છે. પશ્ચિમ કચ્છ વિસ્તારમાં SOGની ટીમ જ્યારે પેટ્રૉલિંગ કરી રહી હતી, તે દરમિયાન અબડાસાના કૉસ્ટલ વિસ્તારમાંથી 20 જેટલા ચરસના પેકેટ મળી આવ્યા હતા. પકડાયેલો આ ચરસના જથ્થાની બજાર કિંમત 53,43,900 રૂપિયા હોવાનું સામે આવ્યું છે. ઉલ્લેખનીય છે કે, ગઇકાલે બીએસએફની ટીમને પણ કચ્છના જખૌના દરિયાઇ વિસ્તારમાંથી 10 પકેટ ચરસનો જથ્થો મળી આવ્યો હતો, આજે ફરી એકવાર ચરસના પેકેટ મળવાની ઘટનાને લઇને એજન્સીઓ દ્વારા પેટ્રૉલિંગની કાર્યવાહી તેજ કરી દેવામાં આવી છે.
ગઇકાલે BSF એ જખૌના દરિયાઈ વિસ્તારમાંથી ચરસના 10 પેકેટ પકડ્યા હતા
કચ્છના દરિયાઈ વિસ્તારમાંથી સતત બીજા દિવસે ચરસ અને એક હેરોઈન ડ્રગનું પેકેટ ઝડપાયું છે. બીએસએફ દ્વારા જખૌના દરિયાઈ વિસ્તારમાંથી ચરસના 10 પેકેટ જપ્ત કરવામાં આવ્યા છે. આ ઉપરાંત હેરોઈનનું પણ એક પેકેટજપ્ત કરાયું છે. જખૌથી 11 કિલોમીટર દૂર નિર્જન કુંડી બેટ પરથી 1 કિલોગ્રામના એવા 10 ચરસના પેકેટ અને એક કિલો હેરોઈન ડ્રગ્સનું પેકેટ મળ્યા છે. એપ્રિલ મહિનાથી અત્યાર સુધીમાં ચરસના 50 પેકેટ અને હેરોઈનના 9 પેકેટ જપ્ત કરવામાં આવ્યા છે. સ્વતંત્રતા દિવસને ધ્યાનમાં રાખીને બીએસએફ હાઈ એલર્ટ છે ત્યારે આ પેકેટ ઝડપાઈ રહ્યા છે.
રવિવારે અબડાસા તાલુકાના જખૌ નજીક આવેલ ખીદરત બેટ નજીક ફરી એક વખત ચરસના 10 પેકેટ મળી આવતા સુરક્ષા એજન્સીઓ દોડતી થઈ ગઈ હતી. કચ્છના દરિયામાં ભરતી હોય ત્યારે વહેણ સાથે દરિયામાંથી જ અફઘાન બનાવટના ચરસના પેકેટો તરતાં મુકી દેવાય છે. આ પ્રકારે કચ્છના જખૌ આસપાસના બેટ વિસ્તારોમાં પહોંચી ચૂકેલા ચરસના ઘણા પેકેટ્સ અત્યાર સુાધીમાં સીમા સુરક્ષા દળની ટૂકડીઓ પકડી ચૂકી છે.
સીમા સુરક્ષાદળને પેટ્રોલિંગ દરમિયાન ખીદરતબેટ ટાપુ પાસે એક પીળા કલરની પ્લાસ્ટિકની બેગમાં 10 ચરસના પેકેટ મળી આવ્યા હતા. દરેક પેકેટ ઉપર ઉડતા બાજનું નિશાન જોવા મળ્યું હતું. 1 કિલોગ્રામના 10 પેકેટ કબજે કરાયા હતા. બિનવારસી હાલતમાં આ પેકેટો મળી આવ્યા હતા. ગુજરાતની તમામ સીમાઓ ઉપર સીમા સુરક્ષાદળ હાઈએલર્ટ પર છે અને જુદા જુદા સ્થળોએ ચાંપતી નજર રાખવામાં આવી રહી છે. એપ્રિલ 2023થી અત્યાર સુાધી જખૌ વિસ્તારમાં 40થી વધુ પેકેટો કબજે કરાયા છે. દરિયાઈ વિસ્તારમાં ડ્રગ્સની હેરાફેરી છેલ્લા લાંબા સમયાથી થઈ રહી છે. આ પ્રકરણમાં અગાઉ પણ કેટલાક આરોપીઓ ઝડપાઈ ચુક્યા છે. ડ્રગ્સની હેરાફેરી સામે પારાથી થઈ રહી હોવાનું એજન્સીઓ જણાવી રહી છે. ત્યારે આ દિશામાં તંત્ર એલર્ટ મોડમાં જોવા મળે છે. ભારતમાં યુવાધનને બરબાદ થતું અટકાવવા માટે ગૃહમંત્રાલય પણ આગળ આવ્યું છે અને કડક પગલા લઈ રહ્યું છે. ઉપરાંત જુદા જુદા સ્થળોએ સ્થાનિક પોલીસની મદદાથી ડ્રગ્સ માફિયાઓને ખુલ્લા પાડવા માટે ઝુંબેશ ઉપાડવામાં આવી છે. અત્યાર સુધી અનેક ડ્રગ્સ માફિયાઓને પોલીસે જેલ ભેગા કર્યા છે. અગાઉ મળેલા પેકેટો અફઘાન પ્રોડક્ટના હતા, જ્યારે રવિવારે મળી આવેલા પેકેટો અલગ પ્રોડક્ટના હોવાનું સુત્રો જણાવી રહ્યા છે. જોકે આ બાબતે સીમાસુરક્ષા દળ દ્વારા આ ચરસ ક્યાથી આવ્યું છે તે અંગેની ઝીણવટભરી તપાસ હાથ ધરી છે.
