બનાસકાંઠામાં કાળજુ કંપાવનારી ઘટના બની હતી. મળતી જાણકારી અનુસાર, બનાસકાંઠામાં પત્નીથી છૂટકારો મેળવવા પતિએ પોતાના જ ત્રણ વર્ષના માસૂમની હત્યા કરી હતી. પાટણના ધાયણોજ ગામના શૈલેષ રબારીએ પત્નીથી છૂટકારો મેળવવા માટે પોતાના ત્રણ વર્ષના બાળકને કેનાલમાં ફેંકી તેની હત્યા કરી દીધી હતી. પોલીસે મૃતક દીકરાની માતાની ફરિયાદના આધારે હત્યારા પતિને ઝડપી લીધો હતો.
બનાસકાંઠાના થરા વિસ્તારમાં સગા બાપે ત્રણ વર્ષના પુત્રની હત્યા કરી દીધાની ઘટના બની હતી. કાંકરેજના નેકોઈ ગામની યુવતીના પાટણના ધાયણોજ ગામના શૈલેષ રબારી સાથે સાત વર્ષ પહેલા લગ્ન થયા હતા પરંતુ પત્ની સાથે અણ બનાવના કારણે અને પત્ની પસંદ ન હોવાથી શૈલેષ રબારી છૂટાછેડા લેવા માંગતો હતો. પરંતુ પત્ની સાથે ડિવોર્સ લેવામાં તેનો ત્રણ વર્ષનો પુત્ર આડે આવતો હતો.
પતિ- પત્ની વચ્ચે કોઈ અણબનાવ હોવાથી મહિલા પોતાના ત્રણ વર્ષના દિકરાને લઈ કાંકરેજના થરા ચાલી ગઈ હતી. 28 સપ્ટેમ્બરના શૈલેષ રબારી પત્નીથી છૂટકારો મેળવવા થરા ગયો હતો. જ્યાંથી પોતાના ત્રણ વર્ષના માસૂમ દીકરાને લઈ ઘરે આવવા નીકળ્યો હતો. આ દરમિયાન થરાદ નજીક પોતાના વ્હાલસોયા પુત્રને કેનાલમાં ફેંકી દઈ નરાધમ પિતા ફરાર થઈ ગયો હતો.ઘટનાની જાણ માતાને થતા તેણે પતિ વિરૂદ્ધ પોલીસમાં ફરિયાદ નોંધાવી હતી. પોલીસે હત્યાનો ગુનો નોંધી હત્યારા પિતાને ઝડપી લીધો હતો. પોલીસે શૈલેષનો મોબાઈલ નંબર ટ્રેસ કરી તેને ઝડપી લીધો હતો.