DefExpo 2022: કેન્દ્રીય રક્ષા મંત્રાલય દ્વારા યોજાનાર DefExpo 2022 અંતર્ગત ગાંધીનગર અને અમદાવાદ ખાતે તા. 18 થી 22 ઓક્ટોબર 2022 દરમિયાન વિવિધ કાર્યક્રમોનું આયોજન કરવામાં આવ્યું છે. આ એક્સપો અંતર્ગત સાબરમતી રિવર ફ્રન્ટના પૂર્વ કાંઠે જાહેર જનતા માટે પ્રદર્શન જોવા જરૂરી સૂચનાઓ જાહેર કરાઈ છે.
ઈ-ટિકિટ દ્વારા એન્ટ્રી આપવામાં આવશેઃ
Def-Expo 2022ના વિવિધ કાર્યક્રમનો લ્હાવો લેવા મુલાકાતીઓને ઈ-ટિકિટ દ્વારા એન્ટ્રી આપવામાં આવશે સાથે જ ઇ-ટિકિટમાં ઉલ્લેખિત તારીખ અને સમય પર જ મુલાકાતીઓને પ્રવેશ આપવામાં આવશે. આ ઇ-ટીકીટ eventreg.in/registration/visitor વેબસાઇટ પર વિનામૂલ્યે ઉપલબ્ધ થશે. મુલાકાતીઓએ પ્રદર્શન સ્થળના પ્રવેશ દ્વાર પર પ્રવેશ કરતા પહેલા QR કોડ/બાર કોડ સ્કેન કરવાનો રહેશે અને સરકાર દ્વારા જારી કરાયેલ ઓળખકાર્ડ દા.ત. આધાર કાર્ડ/ડ્રાઈવિંગ લાયસન્સ/મતદાર આઈડી/પાન કાર્ડ વગેરે રજૂ કરવાના રહેશે.
આ વસ્તુઓ સાથે ના લઈ જવીઃ
પ્રદર્શનની મુલાકાત દરમિયાન કોવિડના નિયમોનું પણ ચુસ્તપણે પાલન કરવામાં આવશે. જેમાં મુલાકાતીઓને કેન્દ્ર/રાજ્ય સરકાર દ્વારા જાહેર કરાયેલી માર્ગદર્શિકાનું પાલન કરવાનું રહેશે. પ્રદર્શન સ્થળે મુલાકાતીઓનું થર્મલ સ્ક્રીનીંગ પણ કરવામાં આવશે. પ્રદર્શન સ્થળ પર પીવાના પાણી, શૌચાલય, મોબાઇલ ચાર્જીંગ પોઇન્ટ, હેલ્પ ડેસ્ક, વગેરે સુવિધા ઉપલબ્ધ કરાઈ છે. મુલાકાતીઓ કોઈપણ ખાદ્યપદાર્થો/હેન્ડ બેગ, છૂટક વસ્તુ જેવી કે કાગળ, પ્લાસ્ટિક, પોલીબેગ વગેરે લઇ જઇ શકશે નહીં.
પાર્કિંગની સુવિધા મર્યાદિત હશેઃ
પ્રદર્શનની મુલાકાતે વાહન લઈને આવતા મુલાકાતીઓને નિર્ધારિત પાર્કિંગ સાઈટ પર જ પોતાના જોખમે વાહન પાર્ક કરવાના રહેશે. પાર્કિંગની સુવિધા મર્યાદિત હોવાથી મુલાકાતીઓને આવવા-જવા માટે જાહેર પરિવહનનો ઉપયોગ કરવાની સલાહ પણ આપવામાં આવી છે. પ્રદર્શન સ્થળે ધૂમ્રપાન, તમાકુ ઉત્પાદનો અને દારૂ સખત પ્રતિબંધિત છે. મુલાકાતીઓને સ્વચ્છતા, શાંતિ અને સામાજિક વ્યવસ્થા જાળવવા અને સુરક્ષા કર્મચારીઓને સહકાર આપવા વિનંતી કરવામાં આવી છે.
રિવરફ્રન્ટ પર યોજાશે લાઈવ ઓપરેશન ડેમોનસ્ટ્રેશનઃ
ભારતીય નેવીના જાંબાજ જવાનો અમદાવાદ સાબરમતી રિવરફ્રન્ટ પર પોતાની યુદ્ધ કુશળતા બતાવતાં લાઈવ ઓપરેશનનું ડેમોનસ્ટ્રેશન પણ કરશે. ડિફેન્સ એક્સપોનો કાર્યક્રમ ઘરેલું સંરક્ષણ ઉદ્યોગની તાકાતનું પ્રદર્શન કરશે, જે હવે સરકાર અને દેશના 'મેક ઇન ઇન્ડિયા, મેક ફોર ધ વર્લ્ડ'ના સંકલ્પને શક્તિ આપી રહી છે. આ ઈવેન્ટ માત્ર ભારતીય કંપનીઓ માટે પ્રથમ એડિશન હશે. સંરક્ષણ મંત્રાલયનું કહેવું છે કે DRDO અત્યાધુનિક અને ભાવિ સંરક્ષણ ઉત્પાદનો અને તકનીકોમાં ઉચ્ચ સ્તરની સ્વદેશીતાનું પ્રદર્શન કરશે, જે સંરક્ષણમાં આત્મવિશ્વાસને સમર્થન આપે છે. તે તેની પ્રયોગશાળાઓ અને તાજેતરની ઉદ્યોગ ભાગીદારી દ્વારા કરવામાં આવેલી તકનીકી પ્રગતિને પણ પ્રકાશિત કરશે.