Gujarat Rain Forecast: ગુજરાતમાં ફરી એકવાર વરસાદનો રાઉન્ડ શરૂ થયો છે. એક સાથે ચાર સિસ્ટમ સક્રિય થતાં રાજ્યમાં વરસાદી મોહાલ જામ્યો છે. વરસાદના આ રાઉન્ડમાં ઉત્તર ગુજરાત, પૂર્વ ગુજરાત, મધ્ય ગુજરાતમાં મધ્યમથી ભારે વરસાદનું અનુમાન છે. હવામાન વિભાગે આજે ઉત્તર ગુજરાતમાં ભારે વરસાદની આગાહી કરી છે. ઉત્તર ગુજરાતમાં ભારે વરસાદની શક્યતાને જોતા હવામાન વિભાગે રેડ એલર્ટ જાહેર કર્યું છે.
સૌરાષ્ટ્ર અને કચ્છ સિવાયના રાજ્યના ઝોનમાં સારો વરસાદ વરસી રહ્યો છે. હવામાન વિભાગે કેટલાક જિલ્લામાં ભારે તો કેટલાકમાં હળવાથી મધ્યમ વરસાદની આગાહી કરી છે. ઉત્તર ગુજરાતના તમામ જિલ્લાઓમાં વરસાદનું રેડ એલર્ટ છે. ઉપરાંત મધ્ય ગુજરાતમાં પણ વરસાદની શક્યતાને જોતા એલર્ચ જાહેર કરવામાં આવ્યું છે. અમદાવાદ જિલ્લામાં ભારે વરસાદનું એલર્ટ છે. બનાસકાંઠા, સાબરકાંઠા, અરવલ્લી,
મહેસાણા, પાટણમાં વરસાદનું રેડ એલર્ટ જાહેર કરવામાં આવ્યું છે. કચ્છ, સુરેંદ્રનગર, ગાંધીનગરમાં વરસાદનું ઓરેન્જ એલર્ટ જાહેર કરવામાં આવ્યું છે. ખેડા, પંચમહાલ, દાહોદ,દમણ, દાદરાનગર હવેલી, નવસારી, વલસાડમાં વરસાદનું ઓરેન્જ એલર્ટ અપાયું છે. સૌરાષ્ટ્રના ત્રણ જિલ્લામાં ભારે વરસાદનું અનુમાન છે.
અમરેલી, બોટાદ, ભાવનગરમાં વરસાદનું યલો એલર્ટ જાહેર કરવામાં આવ્યું છે.દક્ષિણ ગુજરાતના તમામ જિલ્લાઓમાં પણ વરસાદની શક્યતાને જોતા અહીં યલો એલર્ટ જાહેર કરવામાં આવ્યુંછે. આણંદ, વડોદરા, છોટાઉદેપુરમાં વરસાદનું યલો એલર્ટ અપાયું છે.
અમદાવાદમાં વરસી રહેલા મૂશળધાર વરસાદે શહેરને જળબંબાકાર કરી દીધું છે. હવામાન વિભાગ દ્વારા એક વાગ્યા સુધી રેડ એલર્ટ જાહેર કરવામાં આવ્યું હતું, જેના પગલે શહેરના મોટાભાગના વિસ્તારોમાં જળકફર્યૂ જેવી સ્થિતિ સર્જાઈ છે. ખાસ કરીને મણિનગર, જશોદાનગર, દાણીલીમડા, નારોલ, અને ખોખરા જેવા વિસ્તારો સૌથી વધુ પ્રભાવિત થયા છે. અમદાવાદ મ્યુનિસિપલ કોર્પોરેશન (AMC)ની પ્રિ-મોન્સૂન કામગીરીનો વધુ એક વખત ધબડકો થયો હોવાનું સ્પષ્ટપણે જણાઈ રહ્યું છે.
અમદાવાદમાં વરસાદી આંકડા અને પ્રભાવિત વિસ્તારો
- છેલ્લા કેટલાક કલાકોમાં અમદાવાદ શહેરમાં સરેરાશ 1 થી 2.25 ઇંચ વરસાદ નોંધાયો છે, જેણે શહેરને પાણી-પાણી કરી દીધું છે.
- પૂર્વ ઝોન: સરેરાશ 1.83 ઇંચ વરસાદ
- ઉત્તર ઝોન: સરેરાશ 2.5 ઇંચ વરસાદ
- દક્ષિણ ઝોન: સરેરાશ 1.25 ઇંચ વરસાદ
- રામોલ, ગોમતીપુર, રખિયાલ, મણિનગર: 2 ઇંચ વરસાદ
- ખોખરા: 1.5 ઇંચ વરસાદ
- સરખેજ, જુહાપુરા: 1.5 ઇંચ વરસાદ
- જોધપુર, સેટેલાઇટ, પ્રહલાદનગર, આનંદનગર, વાસણા, પાલડી: 1 થી 1.25 ઇંચ વરસાદ
જળબંબાકારથી પ્રભાવિત મુખ્ય વિસ્તારો:મણિનગર, જશોદાનગર, દાણીલીમડા, લાંભા, નારોલ, ખોખરા, પાલડી, આનંદનગર, વેજલપુર, જીવરાજ પાર્ક, શાહઆલમ, નિકોલ, નરોડા, સરસપુર, રખિયાલ, અજીતમિલ, ઓઢવ, વટવા, વસ્ત્રાલ, અસલાલી, મકરબા, ઠક્કરનગર, બાપુનગર, હાટકેશ્વર, CTM, ઘોડાસર, ઇસનપુર, થલતેજ, ગોતા, શીલજ, શેલા, સાયન્સ સિટી, મોટેરા, સાબરમતી, જગતપુર. આ તમામ વિસ્તારોમાં માર્ગો પર ગોઠણસમા પાણી ભરાઈ ગયા છે, અનેક દુકાનોમાં પાણી ઘૂસી ગયા છે, અને સોસાયટીઓમાં પણ ઘૂંટણસમા પાણી ભરાતા ઘરવખરીને મોટું નુકસાન થયું છે.